Wuj Richin Bix Chire ri Dios 41 - Kaqchiquel Bible

Ch'owen richin jun yawa'*f40*

¹ Jebel ruwa-ruq'ij ri wineq ri yeruto' ri ek'o pa meba'il. Toq xtipe ri q'ij richin ruk'ayewal, kan xtito'ox roma ri Jehová.

² Ja ri Jehová ri xtichajin richin, xtuya' ruk'aslen. Kan xtuya' urtisanik y kikoten chire. Y kan man xtijach ta k'a pa ruq'a' ri etzelanel richin.

³ Y toq xtuk'uluwachij jun yabil, ja ri Jehová ri xtito'on richin. Y kan xtik'achoj-el.

⁴ Jehová tabana' utzil, tajoyowaj nuwech, roma in makuwineq chawech. Taya' chik jun bey nuraxnaqil.

⁵ Ri e etzelanel wichin kan itzel k'a yech'on chuwij y nikik'utula' k'a chikiwech janipe' xkiken, y xtik'is jumul ri nubi'.

⁶ Yepe chinutz'etik richin nokikuquba' kan nuk'u'x, jak'a xa man qitzij ta ri kich'abel. Yepe xaxe richin nokak'axaj-el ri man utz ta rutzijol, y k'ari' nibekitaluj rutzijol.

⁷ Konojel ri e etzelanel wichin nikimol k'a ki' y yexebeloj chuwij. Kan ruyon k'a itzel taq ch'obonik nikibanala' y nikibij chi

⁸ ri yabil ri in chapayon, xa yabil richin aj-tzay, y chi yin man xkiyakatej ta chik jumul.

⁹ Jajun ri wachibil ri achoq ik'in nukuquban-wi nuk'u'x, y chuqa' kan wik'in yin nutej-wi ruway, kan xyakatej chuwij.

¹⁰ Jak'a rat Jehová tabana' utzil chuwe richin xkinayek-el chuwech ri nuwarabel, richin xtinya' rutojbalil chike chire ronojel ri xkiben chuwe.

¹¹ Richin keri' ri e etzelanel wichin man xkinkich'ek ta. Rik'in k'a re' xtinwetamaj chi kan in qajineq chawech.

¹² Ja k'a yin kan in ato'on roma ri ruchojmilal ri nuk'aslen. Xtaben k'a chuwe richin xkik'oje' chawech rat jantape'.

¹³ Nimalej ruq'ij-ruk'ojlen ri Jehová ri qa-Dios, tibe-q'ij tibe-seq, kan keri' wi; ja' kan keri' wi.