Wuj Richin Bix Chire ri Dios 40 - Kaqchiquel Bible

Bix richin kolotajik*f39*

¹ Yin xinwoyobej rik'in koch'onik ri Jehová. Y rija' kan xrak'axaj ri nuch'owen.

² Jari' k'a toq xirelesaj chupan ri jul richin ri q'axo'n. Xirukol chupan ri puq'upik ch'abeq. Xiruya' pa ruwi' jun abej richin chi chiri' man jun nink'uluwachij, y xuya' k'a el wuchuq'a'.

³ Rija' xuk'ut jun k'ak'a' bix chinuwech, jun bix richin ninya' ruq'ij rija'. Re' kan xtikitz'et k'a e k'iy, y xtikixibij-ki', y kan xtikikuquba' kik'u'x rik'in ri Jehová.

⁴ Jebel ruwa-ruq'ij ri wineq ri nukuquba' ruk'u'x awik'in rat Jehová, y man nukuquba' ta ruk'u'x kik'in winaqi' ri kinimirisan-ki', ni man nutzeqelibej ta ch'aqa' chik dios.

⁵ Kan janila k'a k'iy ri meyel taq abanobal. Ri ach'obonik pa qawi' roj kan k'iy-wi. Kan man jun k'a achoq ik'in ta xkitikir xkatinjunamaj-wi. Yin man yitikir ta nintzijoj ronojel re', roma janila k'iy.

⁶ Rat kan man yakikot ta k'a rik'in ri jalajoj kiwech sipanik. Man ak'utun ta ri chikop ri niporox jumul, ni ta ri kamelabel richin kuyubel-mak. Pa ruk'exel re', xaben chuwe richin xinwak'axaj ri ach'abel.

⁷ Roma ri' xinbij: Jare' ink'o nu-Dios richin yatinsamajij, kan achi'el ri tz'ibatel chuwij chupan ri wuj.

⁸ Yin kan niqa' chinuwech richin niben ri arayibel rat nu-Dios yin. Ri apixa' kan nuyakon k'a pa wánima.

⁹ Toq ninya' aq'ij, ninq'alajirisaj k'a chikiwech konojel winaqi' chi rat yinakol. Rat awetaman Jehová chi yin man xinq'et ta wi' richin xinq'alajirisaj re'.

¹⁰ Kan man xinya' ta kan re' xaxe ta wichin yin, jak'a xinwelesaj rutzijol chi rat yojakol y man yojamalij ta kan. Man jun bey k'a xinwewaj chikiwech ri winaqi' ri qitzijri'il y ri awajowabal ri man k'isel ta.

¹¹ Jehová, tabana' utzil man naq'et ri awutzil pa nuwi' yin. Man yinamalij kan, y ri awajowabal chuwe kan man ta xtik'is.

¹² Roma janila ruk'ayewal ri nuk'uluwachin kan man yitikir ta ninwajlaj. Ri numak kan xiruq'i' yan, y roma ri' kan man yitikir ta chik yitzu'un. Kan más k'a xek'iyer ke chuwech ri rusumal-nuwi', y kan janila xinmalij-qa nuk'u'x.

¹³ Jehová, tabana' utzil kinakolo'. Tabana' utzil kinato' chi'anin.

¹⁴ Ek'o yekanon richin nikelesaj ri nuk'aslen. Roma ri' rat xtaben chike chi xkek'ixbitej y xtisach kik'u'x, Chuqa' ek'o yekanon richin niqaqa itzel chuwij. Roma ri' xtikitzolij ta k'a ki' chikij y xkek'ixbitej ta k'a.

¹⁵ Rije' kan janila yetze'en, y yesik'in chuwij. Tabana' chike chi xke'animej ta k'a roma k'ix.

¹⁶ Jak'a ri yekanon awichin, kan kekikot y kenimaq'ijun awik'in rat. Y konojel ri yematioxin roma ri kolotajik kan jantape' xtikinimirisaj ri abi'.

¹⁷ Jak'a yin k'a ink'o na pa q'axo'n, y kan k'a k'o na ri nik'atzin chuwe. Ninwoyobej chi rat nawak'axaj ri nuch'owen. Ja rat at nuto'onel y nukolonel, nu-Dios yin. Y roma ri' kinato' chi'anin.