Wuj Richin Bix Chire ri Dios 38 - Kaqchiquel Bible

Ch'owen richin jun aj-mak*f37*

¹ Jehová, tabana' utzil man yinach'olij toq k'o awoyowal. Man taya' ruk'ayewal pa nuwi' rik'in awoyowal,

² roma ri ruk'ayewal ri' kan e achi'el ch'ab ri ye'ak'eq-pe chuwij. Kan chuwij k'a yin xqaqa-wi.

³ Y chuqa' roma ri', kan niq'axon k'a ri nuch'akul, y kan mulan k'a roma ri numak.

⁴ Y roma ri ralal kan yijiq' yan. Kan achi'el k'a jun ejqa'n rubanon chuwij, ri kan man yitikir ta nink'uaj.

⁵ Roma ri nuch'ujerik, ri ch'a'k chuwij kan nipujan y kan chuw chik.

⁶ Kan chijun k'a q'ij yibison, y man yitikir ta ninyek-q'anej ri nujolon roma ri nuq'axo'n.

⁷ Kan chijun k'a ri ruche'el-wij nirepo. Y kan maneq chik k'a ti juba' chire ri nuch'akul ri man ta yawa'.

⁸ Kan xk'is yan k'a ri wuchuq'a', y ri yabil kan yiruke'ej nina' yin. Kan yijilo k'a roma ri rukiy ri q'axo'n.

⁹ Rat kan awetaman k'a ri nurayibel yin. Ri rurayibel ri wánima kan man ewatel ta chawech.

¹⁰ Ri wánima kan janila k'a nitino y ri wuchuq'a' kan maneq chik, y chuqa' kan man yitzu'un ta chik.

¹¹ Ri wachpochel y ri wachibil kan in kiyonoban kan roma ri ch'a'k ri k'o chuwij. Chuqa' ri wach'alal kan nej xek'oje-wi chuwe yin.

¹² Ri ye'ajowan nikelesaj nuk'aslen, kan nikiyala' k'a pikbel pa nubey. Ri ye'ajowan chi yin yik'oje' pa k'ayew kan itzel k'a yech'on chuwij. Kan chijun q'ij k'a nikich'obola' ri achike ta nikiben richin yinkitzeq.

¹³ Yin kan ninben chi man yinak'ex ta chik, kan achi'el in tokon ninben. Kan in achi'el mem ninben y man ninjeq ta ri nuchi'.

¹⁴ Kan xinben k'a achi'el jun tokon, y achi'el jun mem ri kan man nitikir ta nuto-ri'.

¹⁵ Roma ri' yin kan woyoben chi rat Jehová yato'on wichin. Rat xkach'on pa nuwi' yin, Jehová nu-Dios.

¹⁶ Roma ri' nink'utuj chawe chi man taya' q'ij chi rije' yekikot chuwij, y toq yin yijilijo', man taya' q'ij chi rije' xtikinimirisaj-ki'.

¹⁷ Wakami yin xa kan yitzaq yan k'a. Ri rukiy ri nuq'axo'n kan jantape' k'o.

¹⁸ Roma ri' kan nintzijoj chawe ri numak, xkibison k'a roma ri man utz ta xinben chawech.

¹⁹ Ri e etzelanel wichin kan e janila e k'iy, y kan janila k'a kuchuq'a'. Kan janila k'a e k'iy ri ye'etzelan wichin, y xa man jun nubanon chike.

²⁰ Yin xinben ri utz kik'in, jak'a rije' pa ruk'exel ri', xinkiya' pa k'ayew. Roma ninwajo' ninben ri utz, kan itzel yinkitz'et.

²¹ Tabana' utzil, Jehová, man yinamalij kan. Nu-Dios yin, man yinaya' kan nuyon.

²² Chi'anin katanpe richin yinato', nukolonel yin.