Wuj Richin Bix Chire ri Dios 37 - Kaqchiquel Bible

Kuqubabel-k'u'x rik'in ri Dios*f36*

¹ Man tipe awoyowal koma ri aj-maki', ni man tich'upu-ak'u'x chikij roma ri mak ri nikiben.

² Roma rije' xa e q'axel, e achi'el ri q'ayis ri xa nitzak'ix-el, y achi'el ri rex q'ayis ri xa nichaqi'j-qa.

³ Takuquba' ak'u'x rik'in ri Jehová, y tabana' ri utz. Man tamalij kan y xk'ase' chupan ri ruwach'ulew.

⁴ Kakikot rik'in ri Jehová, y ja rija' xtiya'on chawe ri rurayibel ri awánima.

⁵ Tajacha' ri ak'aslen pa ruq'a' ri Jehová, y takuquba' ak'u'x rik'in rija', y rija' xkaruto'.

⁶ Xtuq'alajirisaj k'a ri ruchojmilal ri ak'aslen, achi'el ri saqil richin ri q'ij, nusaqirisaj ri q'equ'm.

⁷ Man tipe awoyowal toq ri banoy etzelal nibe pa jotol, y toq utz nel chuwech ronojel ri nuch'ob, Xa kan katuxlan rik'in ri Jehová, y tawoyobej pa ruq'a' rija' ronojel.

⁸ Taya' kan ri oyowal, y man taya' q'ij chi nich'akon chawij. Man katoyower, roma re' xa más nuyek-q'anej ruwi' ri oyowal.

⁹ Roma ri e banoy etzelal kan xke'elesex-el chuwech re ruwach'ulew, jak'a ri kikuquban kik'u'x rik'in ri Jehová kan xkek'ase' chiri'.

¹⁰ Roma juba' apo chik, ri banoy etzelal kan man xtik'oje' ta chik. Stape' xtikanox, man xtilitej ta.

¹¹ Jak'a ri xtikiqasaj-ki', kan xtikichinaj k'a ri ruwach'ulew, y kan xkekikot k'a rik'in uxlanibel-k'u'x.

¹² Ri banoy etzelal nuch'ob richin nuben itzel chire ri choj ruk'aslen, y kan nuqach'ach'ej rey chirij.

¹³ Jak'a ri Dios kan nitze'en chikij, roma retaman chi xa napon jun q'ij richin nikik'ul rutojbalil.

¹⁴ Ri e banoy etzelal kan nikelesaj k'a ri ki-espada y nikichojmirisaj ri rute-ch'ab richin yek'aqon, richin chi yekitzeq ri ek'o pa meba'il y ri man jun k'o kik'in, y richin yekikamisaj ri choj kik'aslen.

¹⁵ Jak'a ri ki-espada xa chikij chik rije' xtuch'ik-wi-ri', y chijun k'a ri rute-ch'ab kan xkeq'aj.

¹⁶ Más utz ri ti juba' ok k'o rik'in ri choj ruk'aslen, ke chuwech ri janila chi beyomel k'o rik'in y xa aj-mak.

¹⁷ Roma ri kuchuq'a' ri e banoy taq etzelal xa kan xtelesex k'a chike. Jak'a ri choj kik'aslen, kan ja ri Jehová ri nito'on kichin.

¹⁸ Ri Jehová kan e ruchajin k'a ri choj kik'aslen. Ri kichinan rije' kan man k'isel ta, xa richin q'asen.

¹⁹ Ri choj kik'aslen, stape' k'o ruk'ayewal, kan man xkek'oje' ta pa k'ayew. Stape' xtipe jun nimalej wayjal chikij, rije' kan man xkewayjan ta.

²⁰ Jak'a ri e banoy etzelal kan xkek'is k'a. Ri e etzelanel richin ri Jehová, kan xkek'is k'a, kan xkek'is achi'el toq nik'is ri sib.

²¹ Ri banoy etzelal k'o ri nuqej, y man nutzolij ta chik; jak'a ri choj ruk'aslen kan k'o joyowanik rik'in y nuya'.

²² Ri e urtisan roma rija' xtikichinaj ri ruwach'ulew. Jak'a ri ruya'on etzelanik pa kiwi', kan xkek'is k'a konojel.

²³ Ja ri Dios nik'utu chuwech ri wineq ri choj bey, y nuyuqej chupan ri k'aslen ri niqa' chuwech rija'.

²⁴ Y stape' nupajk'ij raqen, man nitzaq ta kan jumul. Roma ja ri Jehová ri chapayon chiruq'a'.

²⁵ Yin wakami xirijix yan, y chupan chijun ri nuk'aslen, man jun bey nutz'eton chi ri wineq choj ruk'aslen malin ta kan roma ri Dios, ni man jun bey nutz'eton chi ri ralk'ual, ye'ok ta molonel.

²⁶ Ri choj ruk'aslen jantape' k'o joyowanik rik'in, y nuya' ri niqaj chire. Y koma ri ralk'ual nikil urtisanik ch'aqa' chik winaqi'.

²⁷ Tach'ara' awi' chire ri etzelal, y tabana' ri utz, richin xkak'ase' jantape' chuwech re ruwach'ulew.

²⁸ Roma ri Jehová kan niqa' chuwech ri ruchojmilal ri k'aslen. Y roma ri' man yerumalij ta kan, wi rije' man nikimalij ta kan rija'. Kan jantape' k'a ruya'on ri ruq'a' pa kiwi', jak'a ri kijatzul ri e banoy etzelal kan xkeruk'is k'a.

²⁹ Ri choj kik'aslen chuwech ri Jehová, xtikichinaj ri ruwach'ulew. Y kan xkek'ase' k'a chiri' richin jantape'.

³⁰ Ri choj ruk'aslen kan nich'on rik'in na'oj. Kan nich'on k'a rik'in ruchojmilal.

³¹ Ri rupixa' ri Dios kan jari' ri ruyakon pa ránima. Roma ri' kan man jun bey nijilijo'.

³² Ri banoy etzelal kan chaq nuq'elebej ri choj ruk'aslen, y nukanoj rubanik richin nukamisaj.

³³ Jak'a ri Jehová kan man xtuya' ta q'ij chi ri choj ruk'aslen nitzaq pa ruq'a' ri banoy etzelal. Y man xtrejqalej ta mak toq xtuk'uex-el chuwech ri q'atoy-tzij.

³⁴ Takuquba' ak'u'x rik'in ri Jehová y tanimaj ri rutzij. Y rija' kan xkarunimirisaj, y xtuya' chawe ri ruwach'ulew richin nawichinaj kan. Y kan xtatz'et toq xkek'is-el ri e banoy taq etzelal.

³⁵ Yin kan xintz'et k'a jun wineq ri banoy etzelal kan janila xunimirisaj-ri'. Xnimer k'a achi'el jun nimalej che', ri kan rex-rex nitzu'un.

³⁶ Jak'a rija' xa xken, y wakami kan man jun chik. Stape' xinkanoj, xa man xq'alajin ta chik.

³⁷ Tatz'eta' ri wineq ri choj ruk'aslen, ri man jun itzel banobel nuben. Re wineq re' xtik'ase' rik'in uxlanibel-k'u'x.

³⁸ Jak'a ri man nikinimaj ta tzij kan xkek'is k'a el jumul; ri koyoben-apo rije' ja ri tojbel-mak.

³⁹ Jak'a ri kikolotajik ri choj kik'aslen kan rik'in ri Jehová peteneq-wi. Ja rija' ri kuchuq'a' chupan ri ruk'ayewal.

⁴⁰ Ri Jehová yeruto' y yerukol chikiwech ri banoy etzelal, roma kan nikikuquba' kik'u'x rik'in.