Wuj Richin Bix Chire ri Dios 36 - Kaqchiquel Bible

Ri itzel rubanobal ri wineq y ri rutzil ri Dios*f35*

¹ Ri etzelal kan nich'on k'a pa kánima ri e banoy etzelal. Rije' kan man jun bey nikiquqa' chi nikixibij ta ki' chuwech ri Dios.

² Kan kiyon k'a rije' kinimirisan-ki'. Kan nikibij chi man xke'ilitej ta chire ri kimak. Kan man jun xtetzelan richin ri kibanobal.

³ Ri ch'abel ri yekibij, kan ruyon richin mak y q'oloj. Kan xk'is k'a kina'oj, y man nikiben ta ri utz.

⁴ Toq yekotz'e-qa pa kich'at, kan chaq nikiquqa' ri etzelal. Kan e beneq k'a chupan ri bey richin ri mak, y man niketzelaj ta kan ri itzel taq banobel.

⁵ Jak'a ri awajowabal rat Jehová kan nunojisaj ronojel. Ri awutzil kan nuq'i' k'a chijun ri kaj.

⁶ Ri ruchojmilal ri naben rat, nilitej xabakuchi. Napon k'a pa ruwi' ri juyu' ri más e nima'q. Chuqa' napon-qa, k'a akuchi ri janila nim rupan ri ya'. Rat ye'achajij ri winaqi', y chuqa' ronojel kiwech taq chikopi'.

⁷ Kan janila k'a jebel ri awajowabal rat, ri man k'isel ta. Roma ri' konojel nikito-ki' chuxe' ri amujal rat.

⁸ Kan nikuqer k'a kik'u'x chire ri ruk'iyal ri kiway ri naya-pe. Rat naya' pa ruk'iyal ri nikiqum, kan achi'el jun raqen-ya' ri janila ruki'il.

⁹ Roma kan awik'in rat k'o-wi ri tz'ukubel-ya' richin k'aslen; ri asaqil rat nusaqirisaj ri qak'aslen roj.

¹⁰ Tanimirisaj k'a ri awutzil pa kiwi' ri ketaman awech. Ri ruchojmilal tabana' pa kiwi' ri choj kánima.

¹¹ Man taya' q'ij chi yech'akon chuwij ri janila nikinimirisaj-ki', ni man yinkitzeqelibej ri e etzelanel wichin.

¹² Xketzaq ta k'a ri e banoy taq etzelal. Xketzaq richin q'asen y man ta chik xketikir xkeyakatej.