Wuj Richin Bix Chire ri Dios 35 - Kaqchiquel Bible

Ruk'utuxik ruto'onik ri Dios*f34*

¹ Jehová, tapaba-awi' chikiwech ri nikipaba-ki' chinuwech yin. Tabana' oyowal kik'in ri yebanon oyowal wik'in yin.

² Tachapa' ri nimalej atobal y katanpe richin yinato'.

³ Tachapa' ri akum, tapaba-awi' chikiwech ri e tzeqelibeyon wichin. Tabij chuwe chi ja rat at nukolonel.

⁴ Tasacha' k'a kik'u'x y ke'ak'ixbisaj ri nikajo' yinkikamisaj. Kan tikitzolij k'a ki' chikij, y tiqaqa k'ix pa kiwi' ri nikajo' nikiben etzelal chuwe.

⁵ K'ate' ta xke'uk'uex-el, achi'el ri solot ri nuk'uaj-el ri kaq'iq', y chi ri ángel awichin rat xkeruteq-el nej.

⁶ Tabana' chi ri kibey kan q'equ'm y kan yejilijo' ta, y chi ri ángel awichin rat kan xkerutzeqelibej ta k'a.

⁷ Rije' xkiya' jun pikbel pa nubey ri xa man jun achike ta roma. Chuqa' xkiben k'a jun jul richin chi yin yitzaq ta chupan.

⁸ Roma ri' taya' k'a pe ri ruk'ayewal chaq k'ate' pa kiwi' rije'. Y ri pikbel ri xkiben, ja ta rije' ri xketzaq chupan. Y kan ta ja rije' ri xketzaq chupan ri jul ri xkiben.

⁹ K'ari' xtikikot k'a ri wánima awik'in rat Jehová. Y xkikikot rik'in ri akolotajik.

¹⁰ K'ari' xkisik'in rik'in ronojel wuchuq'a' chi maneq chik jun Dios achi'el rat, roma kan ye'akol ri ek'o pa ruk'ayewal, chikiwech ri kan k'o kuchuq'a'. Y kan ye'ato' k'a ri k'o nik'atzin chike, chikiwech ri ye'eleq'an kik'in.

¹¹ Xeyakatej winaqi' chuwij ri nikitz'uk-tzij chuwij. y nikik'utuj chuwe ri xa man wetaman ta.

¹² Yin ninben utz kik'in, jak'a rije' ja ri itzel nikiben chuwe. Y re' xa nuya' bis pa wánima.

¹³ Jak'a toq yeyawej rije', yin kan ninkusaj ri nutziaq richin bis. Yin kan yibison k'a koma rije', y kan yimewayin.

¹⁴ Kan janila k'a yibison achi'el xa ta jun wachpochel o jun wach'alal ri yawa'; yenbisoj achi'el xa ta nte' ri xken.

¹⁵ Jak'a toq xpe wululen chuwij, rije' xa xetze'en chuwij. Xkimol k'a ki' itzel taq winaqi' chuwij, y yin man xinwetamaj achike roma. Y kan janila k'a itzel xkiben chuwe, y man yetane' ta chuwij.

¹⁶ Kan janila k'a yinkiyojobej, y yetze'en chuwij. Yinkimeruj roma yinkixowaj.

¹⁷ Ajaw, ¿k'a janipe' k'a chaq xtatzu' ronojel re'? Tabana' utzil takolo' ri wánima chikiwech ri nikajo' yinkik'is. Xaxe jun nuk'aslen k'o, y roma ri' kinakolo' chikiwech, roma rije' e achi'el koj ri nikajo' yinkiwech'.

¹⁸ Keri' yin kan xkimatioxin k'a chawe chikiwech ri kimolon-ki'. Xtinya' k'a aq'ij chikikojol ri janila chi tinamit.

¹⁹ Man taya' q'ij chi xkekikot chuwij ri e etzelanel wichin, y man ta xkinkimeruj roma yinketzelaj y xa man jun nubanon chike.

²⁰ Kan man jun bey yech'on ta chi utzil, kan xaxe k'a kamulun-tzij nikiben chikij ri choj kik'aslen.

²¹ Xkijaq'aq'ila' k'a tze'en chuwij, y xkibij: Titzu', la xuben, kan rik'in runaq'-qawech xqatz'et, yecha'.

²² Jehová, man kak'oje' kan chaq keri', roma rat kan xatz'et k'a re nikiben. Tabana' utzil man kinaya' kan, Jehová nu-Dios yin.

²³ Tabana' utzil kayakatej, y kinato', richin naben ruchojmilal pa nuwi' yin, nu-Dios y wajaw yin.

²⁴ Tabana' utzil taq'alajirisaj chi yin maneq numak. Tabana' richin man ta xkekikot chuwij.

²⁵ Man tikibij-qa pa taq kánima: Qánima jare' ri niqajo', y man tikibij chuqa': Xojtikir chirij.

²⁶ Xa kan ke'ak'ixbisaj y tasacha' kik'u'x konojel ri yekikot chuwij roma ink'o pa q'axo'n. Taqasaj kiq'ij ri xkinimirisaj-ki' chinuwech yin.

²⁷ Jak'a ri nikajo' chi yin yich'akon ta, kan kebixan y kekikot; tikibij chi rat Jehová ruk'amon ninimirisex aq'ij, roma nawajo' chi ri asamajela' nik'oje' uxlanen kik'in.

²⁸ K'ari' jantape' k'a xtintzijoj ri ruchojmilal ri naben rat, y kan chijun q'ij k'a xtinya' aq'ij.