Wuj Richin Bix Chire ri Dios 31 - Kaqchiquel Bible

Kuqubabel-k'u'x rik'in ri Dios*f31*

¹ Awik'in k'a rat Jehová, nukuquban-nuk'u'x, roma ri' man taya' q'ij richin nisach nuk'u'x. Kinakolo' rik'in ri ruchojmilal ri naben rat.

² Tabana' utzil kinawak'axaj, y kinakolo' chi'anin. Kinawewaj k'a chikiwech ri e etzelanel wichin achi'el xa ta ninwewaj-wi' chirij jun nimalej abej. Kan ja rat k'a ri at nutobal richin yikolotej.

³ Kan awik'in k'a rat ninwewaj-wi-wi' y kan yikolotej. Roma ri nimalej abi', tak'utu' k'a chinuwech ri akuchi utz yibe-wi, y kinayuqej.

⁴ Kinakolo' chuwech ri pikbel ri kewan richin yitzaq chupan, roma kan ja rat ri at nutobal.

⁵ Pan aq'a' k'a rat ninjech-wi' richin yinachajij. Kinakolo' k'a roma rat at jun Dios ri man yinamalij ta kan.

⁶ Yin yenwetzelaj ri nikikuquba' kik'u'x kik'in ri wachibel ri xa man jun kejqalen. Jak'a yin kan awik'in rat Jehová nukuquban-wi nuk'u'x.

⁷ Xkikikot k'a y xkinimaq'ijun roma ri awajowabal rat Jehová, roma kan xatz'et ri nuq'axo'n, kan xatz'et k'a jebel ri wánima toq xk'oje' pa bis.

⁸ Man xinajech ta k'a pa kiq'a' ri e etzelanel wichin, xa kan xinakol y xaben chuwe chi jikil xik'oje'.

⁹ Jehová, tabana' utzil tajoyowaj nuwech, roma kan ink'o pa nimalej bis. Man yitikir ta chik yitzu'un roma oq'ej; ri wánima y ri nuch'akul kan maneq chik kuchuq'a' roma ri q'axo'n.

¹⁰ Kan xirijix yan qa roma q'axo'n; ri k'iy nujuna' nuben chuwe chi xaxe chik yijiq'ijo'x. Ri wuchuq'a' kan xk'is yan k'a roma ri numak; ri nubaqil kan maneq chik ruchuq'a' chuqa'.

¹¹ Kan in yakol k'a kitze'en ri e etzelanel wichin, y ri wachk'uljay chuqa' kan yinkiyojobej; ri etamayon nuwech nikixibij-ki' chinuwech, y ri yetz'eton wichin ye'animej toq yinkitz'et.

¹² Kan ximestex yan k'a; y kan xban chuwe chi kan in kamineq chik. Yin kan in achi'el chik k'a jun qumbel paxineq ri xa man nik'atzin ta chik.

¹³ Kan yentz'et k'a ri winaqi' yech'owiyaj pa taq kixikin y yexebexot chuwij. Nikimol k'a ki' richin nikajo' yinkikamisaj.

¹⁴ Jak'a yin kan nukuquban nuk'u'x awik'in rat Jehová, roma kan ja rat at nu-Dios.

¹⁵ Pan aq'a' k'a rat k'o-wi ri nuk'aslen. Kinakolo' k'a chikiwech ri e etzelanel wichin, y ri kan chaq in kitzeqeliben.

¹⁶ Tabana' utzil kinatzu' rik'in joyowanik; kinakolo' roma ri awajowabal.

¹⁷ Jehová, tabana' chi man ta jun bey xkik'ixbitej, roma kan nuk'utun wuchuq'a' chawe. Tabana' chi ri itzel taq winaqi' yek'ixbitej; Kan ta xkebe pa jul richin muqbel, y man jun ta chik xtikibij.

¹⁸ Kan ketane' k'a qa ri e tz'ukuy taq tzij, roma rije' yech'on rik'in janila nimirisanen, y kan janila k'a itzel yech'on chirij ri choj ruk'aslen.

¹⁹ Kan janila nim ri awutzil rat Jehová, roma kan ye'ato' ri nikiya' aq'ij-ak'ojlen. Re' kan xaben k'a kik'in ri nikito-ki' awik'in, richin nikitz'et ri ch'aqa' chik winaqi'.

²⁰ Kan ye'achajij k'a chuwech ri kich'obonik ri e banoy etzelal. Kan awik'in k'a rat nikito-ki' chire ri kiyoq'onik ri winaqi' ri'.

²¹ Nimalej aq'ij-ak'ojlen rat Jehová, roma rik'in awajowabal xaben meyel taq banobel toq xik'oje' pa latz', xaben wik'in achi'el jun tinamit ri sutin-rij chi tz'aq.

²² Toq yin xik'oje' pa latz', xinch'ob chi kan xinamestaj kan. Jak'a toq xink'utuj to'onik chawe, kan xinawak'axaj k'a chi'anin.

²³ Ri nikitzeqelibej ri Jehová, ruk'amon chi nikiben ri nrajo' rija'. Roma rija' kan yeruchajij k'a ri choj e beneq chuwech. Jak'a ri man nuqasaj ta ri' chuwech, kan pa ruk'iyal k'a ri rutojbalil ri nuya' pa ruwi'.

²⁴ Kan tikitija' k'a kiq'ij ri kikuquban kik'u'x rik'in ri Jehová, y kow kek'oje'.