Wuj Richin Bix Chire ri Dios 29 - Kaqchiquel Bible

Ri ruchuq'a' y ri ruk'ojlemal ri Jehová*f28*

¹ Tiya' ruq'ij-ruk'ojlen ri Jehová rix ri ix aj-chikajil. Titzijoj ri utzilej rutzijol roma ri ruk'ojlen y ri ruchuq'a'.

² Tiya' ruq'ij-ruk'ojlen ri kan ruk'amon chire rija'. Titzijoj ri utzilej rutzijol akuchi k'o-wi.

³ Ri ruch'abel ri Jehová kan niq'ajan pa ruwi' ri palou; kan achi'el k'a ruch'abel ri koqolajay, keri' ri ruch'abel ri Dios. Ri ruch'abel ri Jehová kan niq'ajan pa ruwi' ronojel ri nima'q taq ya'.

⁴ Ri ruch'abel ri Jehová kan rik'in uchuq'a' nipe. Ri ruch'abel ri Jehová kan k'o ruruwaq'ijaj.

⁵ Toq nich'on, yerupaxij ri tiox taq che'. Rik'in k'a ri ruch'abel ri peteneq chupan ri koqolajay, kan yerupaxij ri tiox taq che' ri ek'o pa Líbano.

⁶ Nuben k'a chi ri juyu' Líbano y ri Hermón*f29* kan yepe silonel pa kiwi'. Kan yesilon k'a achi'el yetzopin ri nima-alaji' achija' taq wákix, y achi'el ri wákix richin k'echelaj.

⁷ Ri ruch'abel ri Jehová kan yeruk'aqala' k'a ruxaq q'aq' achi'el nuben ri koyopa'.

⁸ Toq nich'on ri Jehová, kan nusiloj k'a ri tz'iran ruwach'ulew. Kan nusiloj k'a ri tz'iran ruwach'ulew Cadés.

⁹ Ri ruch'abel ri Jehová kan nuben chi ronojel ri ruxaq ri tuq kan yetzaq-el. Chuqa' nuben chi ri k'echelaj kan man jun chik che' nik'oje' kan chupan, rokik chupan ri rachoch rija' konojel k'a nikiya' ruq'ij-ruk'ojlen.

¹⁰ Kan ja ri Jehová ri niq'aton-tzij pa ruwi' ri ya'. Kan nik'oje' k'a richin nuq'et-tzij jantape'.

¹¹ Nuya' uchuq'a' chire ri rutinamit, y nrurtisaj rik'in uxlanen.