Wuj Richin Bix Chire ri Dios 27 - Kaqchiquel Bible

Ja ri Jehová ri nusaqil y nukolotajik*f26*

¹ Ja ri Jehová ri saqil y kolotajik chire ri nuk'aslen. ¿Achoq chuwech ta k'a xtinxibij-wi'? Ja ri Jehová nichajin ri nuk'aslen. ¿Achike ta k'a roma xkik'ark'ot-qa?

² Toq xkimol-ki' chuwij ri e etzelanel wichin richin nikajo' yinkich'ek y yinkikamisaj, jari' toq xkipajk'ij kaqen y xetzaq.

³ Stape' jun tzobaj aj-labal xtikisutij-wij richin yinkich'ek, yin man xtinxibij ta wi'. Stape' pa nuwi' yin xtikichop-q'anej oyowal, yin kan kuqul k'a nuk'u'x.

⁴ Yin kan k'o k'a jun ri nuk'utun chire ri Jehová; y kan jari' ri xtinkanoj; chi yin kan xkik'oje' ta chupan ri rachoch ronojel q'ij chire ri nuk'aslen, richin chi ninmey ri ruk'ojlemal y yich'on rik'in chupan ri rachoch.

⁵ Toq yin xkik'oje' pa ruk'ayewal, rija' kan xkirewaj chupan ri rachoch. Kan xkirukuch jebel pan ewel chiri' y xkiruchajij, xtuben chuwe chi achi'el xa ta ink'o pa ruwi' jun nimalej abej y man jun nitikir niq'i'on wichin.

⁶ Keri', kan xkitikir xkench'ek ri e etzelanel wichin. Kan xtinsuj k'a sipanik chire rik'in raqoj-chi'ij y kikoten. Xkibixan y kan ja ri rubi' ri Jehová ri xtinbixaj.

⁷ Jehová, tabana' utzil kinawak'axaj roma kan yatinwoyoj. Tajoyowaj nuwech y tak'uluba-pe ri nuch'abel.

⁸ Ri wánima nubij chuwe chi rat abin kan chi niqaya' aq'ij. Roma ri' yin kan xtinkanoj k'a ri ak'ojlemal rat Jehová.

⁹ Jehová man tawewaj-awi' chinuwech. Man taya' ri awoyowal pa nuwi' yin ri in asamajel, roma kan ja rat k'a ri at nuto'onel yin. Man kinaya' kan, ni man kinawisq'opej kan, nu-Dios y nukolonel yin.

¹⁰ Stape' ri nte-nata' yinkimalij kan, ja rat Jehová ri xkachajin wichin.

¹¹ Jehová, tak'utu' chinuwech ri abey. Kinayuqej chupan ri bey richin ruchojmilal, roma kan ek'o-wi ri e etzelanel wichin.

¹² Tabana' utzil man taya' q'ij richin nikiben ri kirayibel rije'. Roma kan kitz'ukun-tzij chuwij, y kan xaxe k'a ri etzelal ri nikajo' nikiben chuwe.

¹³ Jak'a kan q'axineq chinuwech chi kan xtintz'et ri awutzil rat, rokik in k'es.

¹⁴ Tawoyobej rik'in ri Jehová. Tatija' aq'ij y man tamalij ak'u'x; kan tawoyobej k'a pa ruq'a' ri Jehová.