Wuj Richin Bix Chire ri Dios 25 - Kaqchiquel Bible

Ri David nuk'utuj ruyuqexik chire ri Dios*f24*

¹ Jehová, chawe rat ninya-wi ri nuch'owen.

² Nu-Dios yin, kan nukuquban nuk'u'x awik'in. Kan man jun bey ta k'a yik'ixbitej. Kan man taya' q'ij chi ri e etzelanel wichin yekikot chuwij.

³ Konojel k'a ri nikikuquba' kik'u'x awik'in, kan man jun bey xkek'ixbitej. Jak'a ri yeyakatej chawij rat kan xke'ak'ixbisaj k'a.

⁴ Jehová, tak'utu' k'a chinuwech ri bey awichin rat. Kinayuqej k'a chupan ri bey ri nibe awik'in.

⁵ Kinak'uaj y tak'utu' chinuwech ri qitzij, roma kan ja rat ri at nu-Dios ri yakolon wichin. Kan jantape' k'a nukuquban nuk'u'x awik'in.

⁶ Jehová, tabana' utzil taya' chik k'a pe pa nuwi' ri awajowabal y ri awutzil ri man e k'isel ta,

⁷ Man taya' ruk'exel chuwe roma ri numak ri xenbanala' toq k'a in ak'ual na. Tabana' utzil man toqaqa chi'ak'u'x ri nuyakatajinenri'il. Xa kan taya' k'a pa nuwi' ri awutzil y ri awajowabal rat nimalej Jehová, roma rat janila at utz.

⁸ Rat Jehová kan janila at utz y at choj; kan nak'ut chikiwech ri aj-maki' ri utzilej bey.

⁹ Kan ye'ayuqej k'a ri kiqasan-ki' chawech; kan nak'ut ri ruchojmilal chikiwech.

¹⁰ Kan jantape' k'a naya' ri utzil y ri qitzij pa kiwi' ri nikitaqej ri apixa'.

¹¹ Jehová, roma ri awajowabal tabana' utzil takuyu' ri numak, ri kan janila nim.

¹² Ri nikixibij-ki' chawech kan xtiketamaj ri bey ri k'o chi nikik'uaj.

¹³ Y rije' kan xkebe k'a pa jotol rik'in ronojel. Y ri kijatzul xtikichinaj kan ri ruwach'ulew.

¹⁴ Rat kan junan k'a awech kik'in ri nikinimaj atzij, y kan najikiba' chik jun bey ri asujun.

¹⁵ Yin kan jantape' at nutzuliben, roma kan ja rat ri yakolon wichin chuwech ri ruk'ayewal.

¹⁶ Jehová, kinatzu-pe y tajoyowaj nuwech, roma xa kan nuyon ink'o, y kan ink'o pa q'axo'n.

¹⁷ Ri bis ri k'o pa wánima xa kan más k'a xnimer-pe. Roma ri' kinawelesaj k'a chupan re nuq'axomal re'.

¹⁸ Tatzu' ri nuq'axo'n y re ruk'ayewal re ninq'axaj, y takuyu' ronojel ri numak.

¹⁹ Ri e etzelanel wichin kan janila k'a yek'iyer. Kan nikajo' yinkikamisaj, roma kan janila in ketzelan.

²⁰ Tachapa' k'a ri wánima y kinakolo'. Man ta k'a xkik'ixbitej, roma yin kan nukuquban nuk'u'x awik'in.

²¹ Tabana' utzil kinakolo', roma ri nubanobal kan utz, y kan choj chawech rat. Roma yin kan nukuquban nuk'u'x awik'in.

²² Nu-Dios yin, tabana' utzil takolo' ri atinamit chuwech ri bis.