Wuj Richin Bix Chire ri Dios 21 - Kaqchiquel Bible

Ri Jehová nuya' k'aslen y ch'akonik*f19*

¹ Jehová, ri rey kan janila nikikot rik'in ri ruchuq'a' ri xaya'; kan janila k'a nikikot rik'in ri ch'akonik ri xaya' chire.

² Kan xaya' k'a chire ri rurayibel ri ránima, man xapoqonaj ta k'a xaya' chire ri xuk'utuj chawe.

³ Xaya' k'a pe urtisanik pa ruwi', corona ri banon rik'in q'anapueq xaya' pa rujolon.

⁴ Xuk'utuj ruk'aslen chawe y kan xaya' chire; xaya' k'a k'iy q'ij ruk'aslen chuwech re ruwach'ulew.

⁵ Kan xnimer ruq'ij roma rat kan xaya' ch'akonik chire; kan xaya' k'a ruwaq'ijaj y k'ojlemal chire.

⁶ Kan jantape' k'a anojisan rik'in urtisanik. Kan janila nikikot, roma kan atk'o rik'in.

⁷ Ri rey kan rukuquban ruk'u'x awik'in rat, Jehová. Y kan man jun k'a xtitzaqon richin, roma ri awajowabal kan man k'isel ta.

⁸ Ri awuchuq'a' rat kan nitikir k'a chikij konojel ri e etzelanel awichin. Rat kan ye'atzeq k'a ri ye'etzelan awichin.

⁹ Toq xkape rat, rik'in ri awoyowal xke'aya' pa q'aq' ri man ye'ajowan ta awichin. Rik'in ri q'aq' ri', kan xke'ak'is k'a roma awoyowal.

¹⁰ Chuqa' xke'ak'is k'a el ri kalk'ual chuwech re ruwach'ulew. Kan konojel k'a ri kijatzul, xkek'is-el.

¹¹ Rije' kan man xkech'akon ta k'a chawij, stape' nikitz'ukula-q'anej etzelal y yeyakatej chawij.

¹² Rat kan xtaben k'a chike chi xke'animej, toq ye'aq'ijuj rije' rik'in ri ch'ab.

¹³ Jehová, kan xtiqanimirisaj k'a ri abi' rat, roma ri nimalej awuchuq'a'. Xqojbixan k'a y xtiqaya' aq'ij, roma ri uchuq'a' ri k'o pan aq'a'.