Wuj Richin Bix Chire ri Dios 2 - Kaqchiquel Bible

Ri Jehová kan rucha'on chik jun rey

¹ ¿Achike roma yeyakatej ri tinamit, y ri winaqi' nikich'obola' ri xa man jun rejqalen?

² Yeyakatej k'a ri q'atoy taq tzij kichin ri ruwach'ulew, y ri tata'al nikiya' chikiwech, richin yeyakatej chirij ri Jehová y ri rey ri rucha'on rija'.

³ Nikibij k'a: Jo', Qojyakatej; qaraq'ach'ij ri ximoj ri ruya'on chiqij. ¡qelesaj chiqij ri ximibel!, yecha'.

⁴ Jak'a ri Dios ri k'o chila' chikaj xa xtitze'en, kan nikikot ri ajaw chikij rije'.

⁵ K'ari' rik'in janila royowal xkeruch'olij, y kan xtusech kik'u'x.

⁶ Y xtubij: Yin kan nucha'on chik ri rey pa ruwi' ri tinamit Sión, ri nujuyu' ri k'o janila rejqalen, xticha'.

⁷ Yin kan xtinya' rutzijol ri ruch'obonik ri Dios. Ri Jehová kere' rubin chuwe: Rat at nuk'ajol y yin in atata'.

⁸ Tak'utuj k'a chuwe, y yin xtinya' chawe ronojel ruwach'ulew richin xtawichinaj. Kan chijun k'a ri ruwach'ulew xtok awichin.

⁹ Rat xke'awulaj achi'el xa ta rik'in jun ch'ich', xkek'is achi'el toq nipax jun bojo'y, xcha' chire.

¹⁰ Chike ri rey y ri tata'al kichin ri tinamit, xubij: Tiq'ax k'a chiwech y tibana' re ninbij chiwe.

¹¹ Tik'oje' k'a rukiy ri Dios chiwech toq nisamajij, kixkikot k'a rik'in qasanri'il.

¹² Tiqasaj-iwi' chuwech ri k'ajolaxel richin man nipe ta royowal, roma man xa xkixruk'is kan pa bey, ri royowal rija' xa kan pa jun ti ramaj nuk'is ronojel. ¡Jebel ruwa-kiq'ij ri janipe' kikuquban kik'u'x rik'in, xcha' ri Dios.