Wuj Richin Bix Chire ri Dios 16 - Kaqchiquel Bible

Ri nrichinaj jun ri kuqul ruk'u'x rik'in ri Dios*f13*

¹ Nu-Dios yin, tabana' utzil kinachajij, roma kan nukuquban nuk'u'x awik'in.

² Ri wánima xubij chire ri Jehová chi ja rija' wajaw yin, y ronojel ri utz nink'ul, kan rik'in rija' peteneq-wi.

³ Yin kan yikikot kik'in ri nuwinaq ri nikitzeqelibej ri Dios, y kik'in ri kan tz'aqet ri kik'aslen chuwech rija'.

⁴ Jak'a ri yetzeqeliben ch'aqa' chik dios, kan xtipe k'a nim ruk'ayewal pa kiwi'. Yin kan man xtinyoj ta wi' kik'in toq rije' yekamela'an rik'in kik' chuwech ri ki-dios, ni ri kibi' kan man jun bey k'a xtinnataj.

⁵ Yin kan ja ri Jehová ri xinwichinaj kan, pa ruq'a' k'a rija' k'o-wi ri nuk'aslen.

⁶ Ri xinwichinaj yin kan achi'el ri jebelej ulew ri akuchi xapon-wi ri etabel k'an, kan jebel-wi ri xinwichinaj kan yin.

⁷ Xtinya' ruq'ij ri Jehová, roma yirupixabaj, stape' ri chi'aq'a' nuben chuwe chi ninch'ob rij ri nuk'aslen.

⁸ Yin kan ja ri Jehová ri nuya'on pa nabey. Roma rija' k'o pa wijkiq'a', roma ri' kan man yitzaq ta.

⁹ Ri wánima kan janila k'a nikikot, y ninbixaj rubi' rija'. Kan xkinuxlan k'a rik'in kuqubabel-k'u'x.

¹⁰ Jehová, rat kan man xtaya' ta k'a kan ri wánima chupan ri muqbel kamineq. Man xtaya' ta k'a q'ij chi ri ruch'akul ri acha'on xtichuwir-qa chiri'.

¹¹ Xtak'ut k'a chinuwech ri bey richin k'aslen. Awik'in rat kan k'o kikoten richin jantape'. Kan jebel k'a ri k'aslen awik'in rat