Wuj Richin Bix Chire ri Dios 145 - Kaqchiquel Bible

Bix roma ri rutzil ri Dios*f128*

¹ Xtinnimirisaj k'a aq'ij, nu-Dios, nu-rey. Xtinya' aq'ij jantape', tibe-q'ij tibe-seq.

² Ronojel q'ij xtinnimirisaj ri abi'. Kan xtinbixaj ri abi' jantape', tibe-q'ij tibe-seq.

³ Kan nimalej aq'ij rat Jehová. Kan ruk'amon richin niya'ox ronojel bix chawe. Ri animirinen rat kan man nuq'i' ta ri qach'obonik roj.

⁴ Ri chi sol chi sol winaqi' ri yeq'ax, kan xtikinimaq'ijuj ri nima'q taq abanobal rat Jehová. Kan xtikitaluj k'a rutzijol ri meyel taq abanobal.

⁵ Xtikitzijoj k'a ri runimirinen ri ak'ojlemal rat Jehová; kan xtikiquqa' ri meyel taq abanobal ri xe'aben.

⁶ Xtitzijox k'a ri samaj ri xaben rik'in uchuq'a' ri kan nak'en rukiy. Y yin kan xtintaluj k'a rutzijol ri animirinen.

⁷ Xtitalux k'a rutzijol ri nimalej awutzil rat. Kan rik'in kikoten xtibixex k'a ri ruchojmilal ri naben.

⁸ Rat Jehová, kan at koch'onel y joyowanel; kan malon k'a nipe awoyowal, y kan janila nim ri ajoyowanik.

⁹ Rat Jehová kan janila k'a at jebel kik'in konojel. Ri ajoyowanik kan aya'on k'a pa ruwi' ronojel ri abanon.

¹⁰ Jehová, ronojel ri samaj ri e abanon, kan tikiya' k'a aq'ij. Konojel ri e awalk'ual rat, kan tikinimirisaj k'a aq'ij.

¹¹ Ja ta ri ruk'ojlemal ri awajawaren ri xtitzijox. Xtiban ta k'a ch'owen pa ruwi' ri awuchuq'a',

¹² richin chi tiketamaj ri ch'aqa' chik winaqi' ri nima'q taq abanobal rat, y richin tiketamaj ri runimirinen y ri ruk'ojlemal ri awajawaren.

¹³ Ri awajawaren kan richin k'a tibe-q'ij tibe-seq. Ri aq'atbel-tzij rat Jehová kan kichin k'a konojel sol winaqi'.

¹⁴ Rat Jehová kan ye'atemej k'a ri yetzaq yan qa; kan ye'ayek k'a ri e k'ayewatajineq.

¹⁵ Jehová, konojel kan at kitzuliben richin ye'atzuq, roma rat kan naya' k'a ri kiway pa ruq'ijul.

¹⁶ Najeq ri aq'a', y ye'anojisaj rik'in urtisanik konojel.

¹⁷ Rat Jehová kan choj k'a naben rik'in ronojel. Kan janila k'a awutzil pa ruwi' ronojel ri abanon.

¹⁸ Kan naqaj atk'o chike konojel ri ye'ajowan awichin, roma rik'in ronojel kánima at koyoben.

¹⁹ Kan naya' k'a ri rurayibel ri kánima ri k'o akiy chikiwech. Nawak'axaj k'a ri kijiloj, y kan ye'akol.

²⁰ Rat Jehová kan ye'achajij konojel ri ye'ajowan awichin. Jak'a ri e banoy taq etzelal kan ye'ak'is-el chuwech re ruwach'ulew.

²¹ Yin kan xaxe k'a bix awichin rat ri xtinbixaj. Kan konojel k'a tikinimirisaj ri loq'olej abi' rat Jehová, richin tibe-q'ij tibe-seq.