Wuj Richin Bix Chire ri Dios 139 - Kaqchiquel Bible

Ri Dios k'o xabakuchi y retaman ronojel*f121*

¹ Nimalej Jehová, rat kan in atz'eton jebel y awetaman nuwech.

² Rat kan natz'et k'a toq yitz'uye' y toq yiyakatej-q'anej. Kan k'a nej k'a k'o-wi ri nuch'obonik, rat kan awetaman chik.

³ Rat kan awetaman k'a ri nubinibal y toq yinuxlan. Kan chijun k'a ri nubey chawech rat k'o-wi.

⁴ Kan k'a man jani tel-pe ri ch'abel pa nuchi', rat Jehová kan awetaman chik k'a ronojel ri ninbij.

⁵ Rat kan asurin k'a wij richin yinachajij, kan naya' k'a ri aq'a' pa nuwi'.

⁶ Ronojel re etamabel re' kan meyel taq banobel chuwe yin. Kan janila nim, kan man niq'ax ta k'a chinuwech.

⁷ Jehová, ¿akuchi ta k'a xkibe-wi nej chire ri a-espíritu? ¿Akuchi ta k'a xtinwewaj-el-wi' chawech?

⁸ Wi ta yijote-q'anej chikaj, chiri' atk'o-wi rat; wi ta yibe-qa k'a chuxe' ri ruwach'ulew, chuqa' chiri' atk'o-wi.

⁹ Stape' k'o ta nuxik' y yitikir ta yixik'an-el pa kaq'iq' richin yibe pa relebel-q'ij, wi yibek'oje' ta juk'an chik chire ri palou chiri' pa qajbel-q'ij,

¹⁰ stape' ta k'a chiri' ink'o-wi, rat kan yinayuqej, ri awijkiq'a' kan man xkirisq'opej ta.

¹¹ Wi yin ninch'ob ta ninwewaj-wi' pa q'equ'm richin yirewaj; o wi ri saqil nok ta q'equ'm,

¹² stape' keri', ri q'equ'm man yirewaj ta chawech rat, chawech rat ri aq'a' xa kan achi'el ri paq'ij. Ri q'equ'm y ri saqil xa kan e junan chawech rat.

¹³ Ja rat xabanon chijun ri nuch'akul. Rat xatz'ukun-q'anej wichin pa rupan ri nte'.

¹⁴ Kan xtinnimirisaj k'a aq'ij, roma kan jun meyel banobel ri xaben wik'in. Yin kan ninmey k'a y kuqul nuk'u'x chi ja rat xabanon wichin.

¹⁵ Ri nuch'akul kan man ewatel ta chawech rat, stape' kan pa q'equ'm xitz'ukutej-q'anej. Kan jebel k'a xinanuk' pa rupan ri nte'.

¹⁶ Nimalej Jehová, rat kan xinatz'et toq k'a man jani kinalex. Ronojel k'a ri xtibebanatej chupan ri nuk'aslen, kan xtz'ibatej yan chupan ri awuj, Y ronojel re' rat awetaman chik.

¹⁷ ¡Nimalej Dios, ri ach'obonik kan janila k'a e k'ayew chinuwech yin, Y kan man e ajlatel ta chuqa'!

¹⁸ Roma kan janila k'iy, kan achi'el k'a ri rajlabal ri sanayi'. Y wi ta yin ninchop rajlaxik xa nipe-qa nuwaran y toq nuna' nuwech, rat kan k'a atk'o na wik'in.

¹⁹ Nimalej Dios, tawelesaj k'a kik'aslen ri e banoy taq etzelal. Kinajech'ej k'a yin chikiwech re winaqi' re',

²⁰ roma rije' xa kan yech'on itzel chawij, y kan yeyakatej k'a richin nikiben itzel chawe.

²¹ Yin kan yenwetzelaj k'a ri ye'etzelan awichin rat Jehová. Chuqa' yenwixowaj ri nikiben itzel chawe rat.

²² Kan yenwetzelaj k'a jumul; kan nubanon k'a chike chi e etzelanel wichin.

²³ Nimalej Dios, tanik'oj k'a ri nuk'aslen y tatz'eta' ri wánima; kinatejtobej y tatz'eta' ri nuch'obonik;

²⁴ tatz'eta' wi xa k'o k'a etzelal chupan ri nuk'aslen yin. Kinak'uaj k'a chupan ri bey richin k'aslen ri nibe awik'in rat.