Wuj Richin Bix Chire ri Dios 137 - Kaqchiquel Bible

Ri kiq'axo'n ri israelita ri ek'o pa Babilonia

¹ Chuchi' ri raqen taq ya' richin ri Babilonia, chiri' k'a yojtz'uye-wi y kan janila yojoq', roma noqaqa chiqak'u'x ri tinamit Sión.

² Chirij k'a ri ruq'a' taq che' ri ek'o chiri' niqatzeqeba-wi ri qaq'ojom.

³ Ri winaqi' ri e uk'uayon-el qichin chupan ri ximonri'il ri' nikibij k'a chiqe chi qojbixan. Ri oj yoyon chupan ri tijoj-poqonal ri', nikik'utuj k'a kikoten chiqe y nikibij: Tibixaj jujun bix richin ri tinamit Sión.

⁴ Jak'a roj kan man xtiqabixaj ta k'a ri bix richin ri Jehová, toq xa chupan jun chik ruwach'ulew ri xa man qichin ta roj ojk'o-wi.

⁵ Wi ta yin ninmestaj kan ri tinamit Jerusalem, xa kan tik'is k'a ri wuchuq'a'.

⁶ Chuqa' ri waq' xa kan tutz'ama' k'a ri' pa nuchi', wi man xtoqaqa ta chinuk'u'x ri Jerusalem, wi man xtinnimirisaj ta ri Jerusalem, roma ja rija' ri nukikoten.

⁷ Nimalej Jehová, ke'oqaqa chi'ak'u'x ri winaqi' aj-Edom, ri janila xekikot toq xch'akatej ri Jerusalem, toq xkibij: ¡Tiwulaj kan jumul, tiwulaj kan jumul ri ruxe' ri chapayon richin!, xecha'.

⁸ Rix aj-Babilonia, rix chuqa' kan xkixbek'is. Jebel ruwa-kiq'ij ri xtiya'on ruk'exel chiwe ri xiben chiqe roj.

⁹ Jebel ruwa-kiq'ij ri xkekichop ri iwalk'ual, y xkekik'eq chuwech abej.