Wuj Richin Bix Chire ri Dios 135 - Kaqchiquel Bible

Ri nima'q taq rubanobal ri Jehová

¹ Kan tibixaj k'a ri rubi' ri Jehová. Rix ri ix rusamajel, kan tinimirisaj k'a ri ruq'ij;

² chi'iwonojel ri ixk'o pa rachoch rija', ri ixk'o chuwa-jay chire ri rachoch ri qa-Dios.

³ Tinimirisaj ruq'ij ri Jehová, roma rija' kan janila utz. Tiyala' k'a bix chire ri rubi', roma rija' kan janila jebel,

⁴ roma rija' kan ja ri e rijatzul kan ri Jacob ri xerucha'. Xucha' k'a ri tinamit Israel richin xok richin.

⁵ Kan wetaman k'a chi ri Jehová kan janila nim. Ri qajaw roj kan más nim chikiwech ri ch'aqa' chik dios.

⁶ Ronojel ri nrajo' nuben ri Jehová, kan nuben. Keri' nuben chikaj y chuwach'ulew, chupan ri nimalej taq palou, y k'a chupan-qa ri ruxe'.

⁷ Nuben chi nibeyakatej-pe ri sutz' k'a janila nej chire ri ruwach'ulew. Nuya-pe ri koqolajay richin nipe ri job, y ri kaq'iq' yerelesaj-pe ri akuchi e yakel-wi.

⁸ Ja rija' xbanon chi xeken konojel ri nabey taq al alaboni' pan Egipto. Xtiker-el kik'in ri winaqi' k'a kik'in ri nabey taq achija' taq awej.

⁹ Rija' kan xuben meyel taq banobel chupan ri ruwach'ulew Egipto. Pa kiwi' k'a ri ki-rey y ri e rusamajela' xuben-wi ronojel re'.

¹⁰ Xeruk'is k'a e k'iy winaqi' ri man nikitzeqelibej ta rija'. Xerukamisaj k'a rey ri kan k'o kuchuq'a'.

¹¹ Xukamisaj k'a ri Sehón rey kichin ri winaqi' amorreo, ri Og rey richin ri ruwach'ulew Basán, y konojel k'a ri rey ri xek'oje' chupan ri ruwach'ulew Canaán.

¹² Ri kiruwach'ulew konojel re winaqi' re', xusipaj k'a. Xuya' k'a chire ri tinamit Israel richin xrichinaj kan.

¹³ Nimalej Jehová, ri abi' rat kan richin q'asen. Ri natabel awichin rat, kan xtikinataj k'a ri chi wiq chi tanaj winaqi' ri xkepe.

¹⁴ Roma rat kan naq'et k'a tzij pa ruwi' ri atinamit. Kan najoyowaj k'a qawech roj ri oj asamajela'.

¹⁵ Ri kiwachibel ri ki-dios ri ch'aqa' chik winaqi' xa rik'in saqipueq y q'anapueq e banon-wi. Y xa ja ri winaqi' e banayon kichin.

¹⁶ K'o kichi', jak'a man yech'on ta; K'o kitzubal, jak'a man yetzu'un ta;

¹⁷ K'o kak'axabal, jak'a man ye'ak'ex ta. Y xa maneq uxla' kik'in.

¹⁸ Kan e achi'el k'a rije', e keri' ri winaqi' ri yebanon kichin, e keri' chuqa' ri nikikuquba' kik'u'x kik'in.

¹⁹ Nuwinaq israelita, kan tinimirisaj k'a ruq'ij ri Jehová; chuqa' rix sacerdote, kan tinimirisaj k'a ruq'ij.

²⁰ Rix ri ch'aqa' chik ix rijatzul kan ri Leví, kan tinimirisaj ruq'ij ri Jehová. chi'iwonojel ri k'o rukiy ri Jehová chiwech, kan tinimirisaj k'a ruq'ij.

²¹ Kan k'a chupan k'a ri juyu' Sión tinimirisex ruq'ij ri Jehová. Tinimirisex ruq'ij k'a chupan ri Jerusalem. Kan tinimirisex k'a ruq'ij.