Wuj Richin Bix Chire ri Dios 132 - Kaqchiquel Bible

Ri rusujun ri Dios chire ri David*f116*

¹ Jehová, toqaqa k'a chi'ak'u'x ri David; toqaqa chi'ak'u'x ronojel ri tijoj-poqonal ri xuk'owisaj.

² Rija' kan xuya' ri rutzij chawech rat Jehová. Kan k'o k'a ri xusuj chawe rat ri qa-Dios ri kan k'o uchuq'a' pan aq'a', ri chuqa' ri at ru-Dios ri Jacob.

³ Roma ri' ri David xubij: Yin kan man xkinok ta k'a chupan ri wachoch, ni man xkijote' ta k'a q'anej pa nuwarabel,

⁴ man xtintz'apej ta k'a qa ri runaq' taq nuwech richin yiwer-qa ni man xkixku'r ta k'a qa,

⁵ k'a toq xtinwil na ri akuchi xtik'oje-wi ri rachoch ri Jehová; jun jay richin chi chiri' nik'oje-wi ri nimalej Dios richin ri Jacob.

⁶ Ri chiri' pa tinamit Efrata, yin y ri wachibil xqak'axaj k'a jun rutzijol pa ruwi' ri káxa, y xojbe chutz'etik chiri' pa juyu' richin Jáar.

⁷ Keri' xqabij chi xqojok-apo akuchi k'o-wi rija', richin niqaya' ruq'ij akuchi tz'uyul-wi.

⁸ Katok k'a apo chupan ri awachoch, Jehová, richin junan yak'oje' rik'in ri káxa ri retal ri awuchuq'a'. Y chiri' xkak'oje-wi tibe-q'ij tibe-seq.

⁹ Ri e a-sacerdote kan xtikiben ta pa ruchojmilal ronojel richin jantape', y chuqa' kan ta xkekikot k'a konojel ri kan e awichin rat.

¹⁰ Jehová, roma ri awajowabal pa ruwi' ri ánima David, ri asamajel. tabana' utzil, man tawewaj-awi' chuwech ri acha'on re wakami.

¹¹ Rat xajikiba' k'a atzij chire ri David y kan man xtatzolij ta k'a awi' chire re jikibel-tzij re' rat xabij k'a chire chi ja ri e rijatzul rija' ri xketz'uye' chupan ri tz'uyubel richin ri q'atbel-tzij.

¹² Chuqa' xabij chi wi ri ralk'ual nikitaqej ri jikibel-tzij ri', rije' chuqa' kan xketz'uye' jantape' chupan ri tz'uyubel richin ri q'atbel-tzij ri'.

¹³ Roma rat Jehová kan jak'a ri tinamit Sión ri acha'on. Jari' k'a ri xawajo' richin chi chiri' yak'oje-wi.

¹⁴ Xabij k'a chi wawe' k'a xkak'oje-wi jantape', richin naq'et-tzij tibe-q'ij tibe-seq.

¹⁵ Xajikiba' chi xtawurtisaj k'a ronojel ri k'o chupan re tinamit re', xabij chi konojel xtaya' kiway.

¹⁶ Chuqa' xajikiba' chi ri e sacerdote kan xke'awiq k'a rik'in jebelej taq tzieq, y ri winaqi' kan xkebixan k'a roma kikoten.

¹⁷ Xabij chi wawe' xtaben chi xtibejotayin-pe ri ruchuq'a' ri David; y xtaben chike chi rije' man jun bey xkek'is, achi'el jun saqil ri man jun bey xtik'is.

¹⁸ Jak'a kik'in ri e etzelanel kichin xtaben chike chi xtisach kik'u'x. Jak'a ri e rijatzul kan ri David jantape' k'a xkebe pa jotol.