Wuj Richin Bix Chire ri Dios 130 - Kaqchiquel Bible

Kuqubabel-k'u'x rik'in ri Jehová*f114*

¹ Jehová, kan janila yibison, y roma ri' yich'on awik'in.

² Ajaw tabana' utzil tawak'axaj ri nuch'abel. Kan taya' k'a axikin chire ri nuch'owen, richin najoyowaj nuwech.

³ Jehová, wi ta rat atz'iban ta ronojel ri qamak, ¿achike ta k'a xtitikir xtipa'e' chawech?

⁴ Jak'a awik'in rat kan k'o k'a ri kuyubel-mak, y roma ri' kan ninimirisex k'a aq'ij.

⁵ Yin kan ninkuquba' k'a nuk'u'x rik'in ri Jehová. Ri wánima kan royoben k'a ri ruch'abel.

⁶ Yin kan woyoben k'a ri Jehová, kan más k'a chikiwech ri chajinela' ri koyoben richin niseqer-pe.

⁷ Keri' rix nuwinaq israelita, tiwoyobej ri Jehová, roma ri rajowabal man k'isel ta, y rija' kan jantape' nikuyun mak.

⁸ Ja rija' xtikolon ri tinamit Israel chire ronojel ri rumak.