Wuj Richin Bix Chire ri Dios 122 - Kaqchiquel Bible

Bix pa ruwi' ri tinamit Jerusalem*f106*

¹ Yin kan janila k'a xikikot kik'in ri yebin chuwe, Jo', pa rachoch ri Jehová.

² Roj kan ojk'o chik chupan ri okibel richin ri Jerusalem.

³ Jerusalem, jun tinamit ri banon-q'anej, jun tinamit ri akuchi nikimol-ki' konojel ri qawinaq.

⁴ Chiri' xejote-q'anej ri tzobaj winaqi' richin ri Jehová, richin nikiya' ruq'ij rija', achi'el nubij ri pixa'.

⁵ Roma chiri' ek'o-wi ri tz'uyubel richin q'atoj-tzij richin ri ruchojmilal, ri tz'uyubel kichin ri e aj pa rachoch kan ri David.

⁶ Tik'utuj ri uxlanibel-k'u'x richin ri tinamit Jerusalem, Konojel ri ye'ajowan richin ri Jerusalem, kan ta k'a utz xtel ronojel chikiwech.

⁷ Ri uxlanibel-k'u'x kan ta k'a xtik'oje' akuchi sutin-rij chi tz'aq. Chupan ri jay richin q'atbel-tzij kan ta k'a xtik'oje' uxlanen.

⁸ Roma ri wajowabal pa kiwi' ri wach'alal y ri wachibil, kan xtinbij k'a yin: Ri uxlanibel-k'u'x xtik'oje' rik'in ri tinamit Jerusalem.

⁹ Roma ri wajowabal pa ruwi' ri rachoch ri Jehová ri qa-Dios, kan xtintej k'a nuq'ij richin utz yojk'oje'.