Wuj Richin Bix Chire ri Dios 12 - Kaqchiquel Bible

Ri Dios kan yeruto' ri kikuquban kik'u'x rik'in*f9*

¹ Jehová, qojato' roma ri choj kik'aslen xa xek'is, kan man jun chik k'a k'o chikikojol ri winaqi' ri choj ta niyibin chawech.

² Xa kan chaq nikitz'ukula' k'a tzij chikij ri kachpochel. Rik'in ka'i' kipalej yech'on chikiwech; xa ruyon k'a q'oloj yekiben.

³ Rat Jehová xke'ak'is konojel ri e tz'ukuy taq tzij, xke'awelesaj-el ri winaqi' ri janila kinimirisan-ki' rik'in ri kich'abel,

⁴ ri winaqi' ri nikibij: Rik'in ri qach'abel yojch'akon; ri qaq' kan yojruto', roma ri' kan man jun xtitikir qik'in, yecha'.

⁵ Jak'a ri Jehová kere' nubij: Xkiyakatej k'a richin xkento' ri man jun ok k'o kik'in y yetz'ilox, chuqa' roma ri kijiloj ri k'o nik'atzin chike kan xkento' pa kiq'a' ri yetz'ilo kichin, ncha'.

⁶ Ri ruch'abel ri Jehová kan qitzij y ch'ajch'oj, kan achi'el ri saqipueq toq niq'axex wuqu' mul pa q'aq' richin nich'ajch'ojir.

⁷ Jehová, rat k'a xkachajin kichin ri choj kik'aslen. Kan jantape' ta xke'ato' chikiwech ri e banoy etzelal,

⁸ xke'achajij k'a, rokik ri e banoy etzelal xabakuchi ek'o-wi, rokik ri winaqi' kiya'on q'ij chire ri etzelal.