Wuj Richin Bix Chire ri Dios 119 - Kaqchiquel Bible

Bix richin ri rupixa' ri Dios

¹ Jebel ruwa-kiq'ij ri kan e tz'aqet yebiyin chupan ri kik'aslen, ri kan ja ri rupixa' ri Jehová ri kitzeqeliben.

² Jebel ruwa-kiq'ij ri kan nikitaqej ri ruk'utun kan ri Dios, ri kan rik'in ronojel kánima nikikanoj.

³ Kan man jun etzelal nikiben, roma kan yebiyin chupan ri bey ri niqa' chuwech ri Dios.

⁴ Jehová, rat kan aya'on k'a ri apixa', kan xachilabej k'a chi kan titaqex rubanik achi'el ri nubij.

⁵ Yin ninrayij k'a chi kan ta choj yibiyin chawech rat, chi kan ta nintaqej ri pixa' ri aya'on chiqe.

⁶ Wi keri' kan man xkik'ixbitej ta k'a roma nintaqej ronojel ri apixa'.

⁷ Rokik xtiq'ax chinuwech jebel ri jalajoj ruwech apixa', kan xtinnimirisaj k'a aq'ij, roma kan man jun mak wejqalen.

⁸ Yin kan xtinyek k'a pa wánima ronojel re'. Roma ri' man jun bey kinamalij kan.

⁹ ¿Achi'el ta k'a toq nitikir jun ala' richin nuk'uaj jun k'aslen ch'ajch'oj? ¡Kan rik'in k'a chi nuyek pa ránima ri ach'abel rat!

¹⁰ Yin kan rik'in k'a ronojel wánima atinkanon-pe. Man taya' q'ij chi ninch'er kan wi' chire ri apixa'.

¹¹ Kan nuyakon k'a pa wánima ri ach'abel, richin chi man yimakun ta chawech.

¹² Kan nimalej aq'ij rat Jehová: Tabana' utzil tak'utu' chinuwech ri jalajoj ruwech apixa'.

¹³ Yin kan rik'in k'a ri nuchi' nutzijon ronojel ri pixa' ri abin kan rat.

¹⁴ Janila yikikot roma ninnimaj ri apixa', roma k'o más rejqalen chuwech jun beyomel.

¹⁵ Jantape' k'a xkiququt pa ruwi' ri apixa': Jantape' k'a xtinch'ob rij.

¹⁶ Kan xkikikot k'a rik'in ri apixa'; y man jun bey xtinmestaj.

¹⁷ Tabana' utzil tajoyowaj nuwech yin ri in asamajel, richin yik'ase' y xtinnimaj k'a atzij.

¹⁸ Tajaqa' k'a ri runaq'-nuwech jebel, richin chi nintz'et ri utzilej taq ch'abel ri ek'o chupan ri apixa'.

¹⁹ Yin xa in q'axel re wawe' chuwach'ulew. Man naben chuwe richin man niq'ax ta chinuwech ri apixa'.

²⁰ Ri wánima janila niq'axon roma jantape' nurayij nretamaj ri apixa'.

²¹ Rat Jehová kan ye'ach'olij k'a ri nikinimirisaj-ki'. K'o k'a etzelanik pa kiwi' ri winaqi' ri xa xtikich'er kan ki' chire ri apixa'.

²² Kinajech'ej k'a chuwech ri itzel taq kich'obonik ri winaqi' ri', roma yin kan nutaqen-pe ri apixa' rat.

²³ Stape' kan achi'a' ri k'o kiq'ij ri yeyakatej chuwij. Jak'a yin ri in asamajel kan ja ri apixa' ri jantape' ri ninquqa' rij.

²⁴ Yin kan jantape' yikikot rik'in ri ach'abel ri aya'on kan, roma nubanon chire chi kan jari' ri nupixabanel.

²⁵ Yin kan ink'o chik chuwi' kamik. Tabana' utzil taya' chik wuchuq'a', achi'el ri asujun.

²⁶ Kan ronojel k'a nuq'alajirisan chawech, y kan in awak'axan. Tak'utu' k'a chinuwech ri apixa'.

²⁷ Tabana' chuwe chi niq'ax chinuwech ri apixa', roma yin kan ninwajo' yich'obon pa ruwi' ri meyel taq abanobal.

²⁸ Yin kan maneq chik wuchuq'a' roma bis. Roma ri' taya' jun k'ak'a' wuchuq'a' richin ninkoch', achi'el ri asujun chuwe.

²⁹ Kinajech'ej k'a chuwech ri tz'ukun-tzij; taya' ri awutzil pa nuwi' richin jantape' ta xtintzeqelibej ri apixa'.

³⁰ Yin kan ja ri bey ri awichin rat ri xincha'. Kan ja ri apixa' ri ninwajo' nintzeqelibej.

³¹ Yin kan xuk'en k'a nuwech chirij ri apixa'. Tabana' utzil Jehová man naya' q'ij chi yin yik'ixbitej.

³² Kan rik'in ronojel wánima xkibiyin chupan ri bey ri nuk'ut ri apixa'. roma kan in anojisan rik'in kikoten,

³³ Jehová kan tak'utu' k'a chinuwech ri ruchojmilal ri apixa', y kan man xtinmestaj ta k'a chupan chijun ri nuk'aslen.

³⁴ Taya' nuna'oj richin kan xtinben ri nubij chupan ri apixa'. Rik'in k'a ronojel wánima xtinben ri nubij.

³⁵ Kinayuqej chupan ri bey richin ri ruchojmilal, roma kan rik'in ri' k'o-wi ri nukikoten.

³⁶ Tabana' chire ri wánima chi nrajo' ta nuben ri nubij ri apixa', y man ta ja ri itzel taq ch'akoj ri xtinrayij ruwech.

³⁷ Man taya' q'ij chi xkentzu' ri xa man jun kejqalen; taya' nuk'aslen richin kan xtintzeqelibej ri abey.

³⁸ Tabana' ri asujun chuwe yin ri in asamajel, achi'el asujun chike ri yatkitzeqelibej rik'in ronojel kánima.

³⁹ Kinajech'ej chuwech ri joyobenik kichin ri e etzelanel wichin, roma ri ruchojmilal ri naya' rat kan jebel-wi.

⁴⁰ Yin kan jantape' k'a nurayiben-pe nintaqej ri apixa'. Tabana' utzil taya' nuk'aslen, roma rat kan at choj-wi.

⁴¹ Jehová tabana' utzil taya' ri ajoyowanik pa nuwi'; kinakolo' achi'el ri asujun chuwe.

⁴² Keri' yin kan xkitikir xtink'uluba' ri ruch'abel ri wineq ri nrajo' nuya' nuk'ix, roma kan nukuquban nuk'u'x awik'in.

⁴³ Kinato' richin jantape' xtinbij ri qitzij, roma kan nukuquban nuk'u'x rik'in ri apixa'.

⁴⁴ Yin kan jantape' xtintaqej ri apixa' rat, tibe-q'ij tibe-seq.

⁴⁵ Wi keri' xtinben, yin kan xkibiyin k'a rik'in ch'uch'ujil, roma kan nintaqej ri ruchojmilal ri aya'on rat.

⁴⁶ Kan xkich'on k'a pa ruwi' ri ach'abel chikiwech ri e rey, y man xkik'ix ta k'a xtintzijoj.

⁴⁷ Keri' jantape' xkikikot rik'in ri apixa' roma kan wajowan-pe jantape'.

⁴⁸ Janila ninwajo' ri pixa', y kan ninya' rejqalen; jantape' k'a xkiququt pa ruwi' ri apixa'.

⁴⁹ Man namestaj ri asujun chuwe chupan ri ach'abel, ri kan rubanon chuwe chi nukuquban nuk'u'x rik'in.

⁵⁰ Ri nikuquban nuk'u'x chupan ri tijoj-poqonal, xaxe ri wetaman chi ri ach'abel nubij chi rat kan naya' nuk'aslen.

⁵¹ Stape' ri winaqi' ri kinimirisan-ki', janila yinkiyojobej, man rik'in ri' yin man nuch'aron ta kan wi' chire ri apixa'.

⁵² Xoqaqa k'a chinuk'u'x ri pixa' ri xe'aya' ojer, y yin kan rik'in k'a ri' nukuquban-wi nuk'u'x.

⁵³ Yin kan niyakatej k'a woyowal chikij ri e banoy taq etzelal, chikij ri xa nikimalij kan ri apixa'.

⁵⁴ Jehová, ri apixa' rat kan jari' k'a nok nubix yin, xabakuchi yik'oje-wi.

⁵⁵ Ri pa taq tokoq'a' kan noqaqa k'a chinuk'u'x ri abi'. Ri pixa' ri aya'on kan, ninwajo' k'a nintaqej.

⁵⁶ Kan jare' ri ruk'amon chuwe yin richin ninben: roma kan jantape' xinnimaj atzij.

⁵⁷ Jehová kan ja rat ri' ri ronojel ri wichin yin; kan nubin chi kan jantape' xtinnimaj ri ach'abel.

⁵⁸ Yin jantape' at nutzeqeliben rik'in ronojel wánima. Roma ri' tabana' utzil tajoyowaj nuwech achi'el nubij ri ach'abel.

⁵⁹ Yin kan xinquqa' k'a rij ri bey ri in beneq-wi; kan xitzolin k'a richin ninnimaj atzij.

⁶⁰ Yin kan ninwajo' k'a ninnimaj atzij, y man ninwoyobej ta na richin ninben.

⁶¹ Kan pa taq tzobaj winaqi' ri e banoy taq etzelal ri kisutin-wij. Jak'a yin kan man numalin ta kan ri apixa'.

⁶² Pa taq nik'aj-aq'a' yiyakatej richin ninya' aq'ij, roma ri ruchojmilal ri naben.

⁶³ Yin kan in kachibil konojel ri yatkitzeqelibej rat Jehová, konojel ri nikitaqej ri apixa'.

⁶⁴ Ri ruwach'ulew kan nojineq k'a chire ri awutzil rat Jehová. Tabana' utzil kan tak'utu' k'a chinuwech ri apixa'.

⁶⁵ Jehová rat kan janila k'a utzil abanon chuwe yin ri in asamajel; kan abanon k'a wik'in achi'el ri asujun.

⁶⁶ Kan tak'utu' k'a chinuwech ri utzilej taq ch'obonik y ri na'oj, roma yin kan nukuquban nuk'u'x rik'in ri apixa'.

⁶⁷ Nabey chuwech richin xaya' tijoj-poqonal pa nuwi', yin xa man nutzeqeliben ta ri abey, jak'a re wakami kan nutaqen k'a ri apixa'.

⁶⁸ Rat kan janila at utz y at banoy utzil. Kan tak'utu' k'a chinuwech ri pixa'.

⁶⁹ Ri e nima'q nikina-ki' kan janila tz'ukun-tzij kibanon chuwij, jak'a yin kan rik'in ronojel wánima nubanon ri nubij ri pixa'.

⁷⁰ Rije' kan man nikina' ta toq yemakun, jak'a yin kan yikikot toq ninben ri nubij ri apixa'.

⁷¹ Janila utz xuben chuwe toq rat xinaya' pa tijoj-poqonal, richin yin ninwetamaj ri apixa'.

⁷² Kan más k'a jebel ri pixa', ri kan ja rat at biyon, ke chuwech pa ruk'iyal q'anapueq y saqipueq.

⁷³ Ja rat Jehová xanuk'u wichin richin xinaben. Tabana' k'a chuwe richin ta niq'ax chinuwech y xtinwetamaj ri apixa'.

⁷⁴ Ri nikiya' aq'ij xkekikot toq xkinkitz'et, roma yin kan nukuquban nuk'u'x rik'in ri ach'abel.

⁷⁵ Jehová, yin wetaman chi ri chojmilal ri naben rat kan pa rubeyal-wi, chi toq yinaya' pa tijoj-poqonal, xa kan roma ri awajowabal pa nuwi'.

⁷⁶ Ri ajoyowanik kan ta k'a xtukuquba' nuk'u'x, kan ta k'a achi'el ri asujun chuwe yin ri in asamajel.

⁷⁷ Tabana' utzil taya' ri ajoyowanik pa nuwi' richin chi kan xkik'ase'. Yin kan ja ri apixa' ri nukikoten.

⁷⁸ Ri winaqi' ri kinimirisan-ki' kan ta k'a xkek'ixbitej, roma rije' xa kan man jun achike ta roma kitz'ukun-tzij chuwij. Jak'a yin kan xaxe ri apixa' ri xtinquqa' rij.

⁷⁹ Tikimolo' k'a pe ki' wik'in yin, ri winaqi' ri nikiya' aq'ij, ri winaqi' ri kan ketaman ri apixa' y nikitaqej.

⁸⁰ Yin kan in tz'aqet ta k'a chupan ri apixa' ri aya'on rat, richin keri' kan man jun bey ta k'a xkik'ixbitej.

⁸¹ Ri wánima kan nilawalo' yan qa chi royobexik ri kolotajik ri naya' rat Jehová. Kan jantape' k'a xtinkuquba' nuk'u'x rik'in ri ach'abel.

⁸² Ri runaq' taq nuwech xa kan xk'is-qa kuchuq'a' richin koyoben ri asujun. Yin kan nink'utuj k'a qa chi janipe' yape richin nakuquba' nuk'u'x.

⁸³ Stape' yin xa man jun chik yik'atzin-wi, xa in achi'el chik jun tz'um ri xaq-xaq chik rubanon roma yakel kan; jak'a xa kan man numestan ta ri apixa'.

⁸⁴ ¿K'a janipe' k'a richin ninwoyobej? ¿K'a janipe' k'a xtaq'et-tzij pa kiwi' ri e tzeqelibeyon wichin?

⁸⁵ Ri winaqi' ri xa kimalin kan ri apixa', kan kiyolon k'a pikbel pa nubey richin ta yitzaq.

⁸⁶ Ri apixa' rat kan ja wi ri' ri qitzij. Tabana' utzil Jehová kinato', roma xa man jun achike ta roma in kitzeqeliben,

⁸⁷ Rije' xa kan chaq juba' man yinkikamisaj, jak'a yin kan man numalin ta kan ri apixa'.

⁸⁸ Rik'in ri awutzil taya' ruchuq'a' ri nuk'aslen. Keri' kan xtintaqej k'a ronojel ri abin rat.

⁸⁹ Nimalej Jehová, ri ach'abel kan richin q'asen. Kan richin jantape' ajikiban chila' chikaj.

⁹⁰ Rat kan naben-wi ri asujun pa kiwi' ri chi sol chi sol winaqi'. Ja rat xajikiban richin ri ruwach'ulew y kan jari' k'o wakami.

⁹¹ Xaxe rik'in ri ach'abel xebanatej ronojel ri ek'o wakami, ronojel re' yatkisamajij.

⁹² Xa ta man ta ri apixa' rat ri xok nukikoten, yin xa kan xiken yan ta chupan ri nutijoj-poqonal.

⁹³ Kan man jun bey k'a xtinmestaj kan ri apixa', roma kan rik'in ri' aya'on nuk'aslen.

⁹⁴ Tabana' utzil kinakolo', roma yin kan in awichin rat. Yin kan jantape' k'a nutaqen-pe ri apixa'.

⁹⁵ Ri itzel taq winaqi' kan koyoben k'a richin yinkik'is, jak'a yin kan jantape' xkich'obon pa ruwi' ri abin rat.

⁹⁶ Ronojel k'a ri kan jebel kibanik xa kan e k'isel. Jak'a ri apixa' rat, ri' kan man jun bey xtik'is.

⁹⁷ Yin kan janila ninwajo' ri apixa', kan jari' ri ninquqa' rij chijun q'ij.

⁹⁸ Rik'in ri apixa', abanon chuwe chi kan más in aj-na'oj, chikiwech ri e etzelanel wichin, roma re pixa' re' kan jantape' k'o wik'in.

⁹⁹ Yin kan más k'a q'axineq chinuwech, ke chikiwech ri yetijon wichin. Re' kan roma k'a jantape' ninch'ob rij.

¹⁰⁰ Kan más k'a q'axineq chinuwech, ke chikiwech ri rijita'q taq achi'a'. Re' roma kan nutaqen-pe ri apixa'.

¹⁰¹ Kan xinchajij k'a wi' chuwech ronojel itzelej taq bey, richin chi xintaqej ri ach'abel.

¹⁰² Man xinch'er ta wi' chire ri ruchojmilal, roma kan ja rat xatijon wichin.

¹⁰³ Ri ach'abel rat Jehová, kan janila kikoten nuya' chuwe. Kan más k'a ruki'il chuwech ri kab ri nikiya' taq chikopi'.

¹⁰⁴ Rik'in ri apixa' wilon nojibel, roma ri' kan ninwetzelaj ronojel ri man e qitzij ta.

¹⁰⁵ Ri ach'abel rat Jehová kan achi'el jun q'aq' ri nusaqirisaj ri nubey; kan jun saqil akuchi yibiyin-wi.

¹⁰⁶ Xinya' nutzij y xinjikiba', chi kan jantape' xtintaqej ri apixa' ri kan choj-wi.

¹⁰⁷ Yin kan janila in k'ayewatajineq. Tabana' utzil Jehová taya' wuchuq'a', achi'el ri abin chuwe.

¹⁰⁸ Tabana' utzil, xtak'awomaj ta k'a toq ninya' aq'ij rik'in bix, y tak'utu' chinuwech ri apixa'.

¹⁰⁹ Ri nuk'aslen kan jantape' k'a k'o chuwi' ruk'ayewal, jak'a yin kan man xkimestan ta chire ri tijonik ri aya'on chuwe.

¹¹⁰ Ri itzel taq winaqi' nikiyala' k'a pikbel pa nubey, jak'a yin kan man numalin ta kan ri apixa'.

¹¹¹ Yin kan nubanon chire ri apixa' chi jari' ri wichinan kan richin q'asen, roma kan nuya' kikoten pa wánima.

¹¹² Kan rik'in k'a ronojel wánima xinbij chi kan nintaqej ri apixa'. Keri' xtinben chijun ri nuk'aslen.

¹¹³ Ri winaqi' ri ka'i' kipalej, yin kan yenwetzelaj, jak'a ri apixa', ri' kan jantape' ninwajo'.

¹¹⁴ Awik'in k'a rat ninwewaj-wi-wi' y rat kan yinato'. Kan nukuquban k'a nuk'u'x rik'in ri ach'abel.

¹¹⁵ Rix winaqi' ri ix banoy taq etzelal, kan tich'ara-el-iwi', roma yin kan nintaqej na ri rupixa' ri nu-Dios.

¹¹⁶ Tabana' utzil Jehová taya' wuchuq'a' achi'el ri asujun chuwe, richin xkik'ase'. Man taya' q'ij chi ri oyobenri'il xa choj keri' nik'o-el.

¹¹⁷ Tachapa' ri nuk'aslen richin yikolotej. Keri' jantape' xtinnimaj atzij.

¹¹⁸ Rat kan ye'awixowaj konojel ri nikich'er kan ki' chire ri apixa', roma ri kich'obonik xa man jun rejqalen.

¹¹⁹ Konojel ri e banoy etzelal, rat kan xke'ak'eq-el achi'el nik'aq-el ri q'ayis, roma ri', yin ja ri apixa' ri nutaqen-pe.

¹²⁰ Yin kan ninxibij k'a wi' chawech rat Jehová. Ri apixa' kan k'o rejqalen chinuwech yin.

¹²¹ Ronojel nubanon pa ruchojmilal. Roma ri' man kinamalij kan pa kiq'a' ri yetz'ilo wichin.

¹²² Tabana' utzil Jehová chi kan ta xkak'oje' pa nuwi' richin utz yik'ase'. Man taya' q'ij chi ri kinimirisan-ki' yinkitz'ila' yin.

¹²³ Ri runaq' taq nuwech xa kan xk'is-qa kuchuq'a' richin koyoben ri asujun. Kan woyoben k'a chi yitotej achi'el ri asujun chuwe.

¹²⁴ Taya' k'a ri ajoyowanik pa nuwi' yin ri in asamajel. Kan tak'utu' chinuwech ri apixa'.

¹²⁵ Yin kan in asamajel rat, tabana' utzil kan taya' k'a nuna'oj, richin ninwetamaj jebel ri apixa'.

¹²⁶ Jehová, kan ruq'ijul chik richin naya' rutojbalil-mak, roma ri winaqi' xa kan xkiq'ej ruwi' ri apixa'.

¹²⁷ Yin kan jantape' wajowan-pe ri apixa'; kan más k'a wajowan chuwech ri q'anapueq ri kan jebel ch'ajch'ojirisan.

¹²⁸ Roma ri' kan ja ri apixa' ri nutzeqeliben pa ruwi' ronojel; kan ninwetzelaj k'a ronojel ri man qitzij ta.

¹²⁹ Ri ach'abel ri aya'on kan rat Jehová kan e jebel-wi, roma ri' kan ninben ri nubij.

¹³⁰ Ri rusolik rij ri ach'abel kan nisaqirisan. Kan nusaqirisaj k'a kiwech ri maneq kinojibal.

¹³¹ Kan ninrayij k'a chi ninwak'axaj ri ach'abel. Ri apixa' kan jantape' niqa' chinuwech.

¹³² Kinatzu' k'a pe y tajoyowaj nuwech. Achi'el naben kik'in ri ye'ajowan awichin.

¹³³ Tabana' chuwe chi xkibiyin ta achi'el nubij ri ach'abel, y man taya' q'ij chi ri etzelal nich'akon chuwij.

¹³⁴ Kinakolo' chikiwech ri e etzelanel wichin, richin nintaqej ri apixa'.

¹³⁵ Tabana' utzil tajoyowaj nuwech yin ri in asamajel. Kan tak'utu' chinuwech ri apixa'.

¹³⁶ Yin kan yinoq' k'a roma q'axo'n, roma yentz'et ri winaqi' chi man nikitaqej ta ri apixa'.

¹³⁷ Jehová, rat kan at choj-wi. Ri aq'atoj-tzij kan ja wi ri' ri ruchojmilal.

¹³⁸ Ri ach'abel ri achilaben kan, kan e choj-wi y kan yebanatej ri nubij.

¹³⁹ Ri woyowal kan yiruk'is yan qa, roma ri e etzelanel wichin, xa man nikiben ta achi'el nubij ri apixa'.

¹⁴⁰ Ri ach'abel kan janila chi tejtobenik ruq'axan, roma ri' yin ri in asamajel kan janila ninwajo'.

¹⁴¹ Yin xa in ko'ol ok y banon chuwe chi maneq wejqalen, man rik'in ri', man numestan ta kan ri apixa'.

¹⁴² Ri ruchojmilal ri naben rat kan ja wi ri' richin q'asen; ri apixa' kan ja wi ri' ri qitzij.

¹⁴³ Yin kan k'o k'a tijoj-poqonal y q'axo'n pa nuk'aslen, jak'a ri apixa' kan nukuquba' nuk'u'x y yikikot.

¹⁴⁴ Ri ach'abel rat kan jantape' choj. Tabana' utzil taya' nuna'oj richin yik'ase' rik'in.

¹⁴⁵ Jehová, yin kan yich'on awik'in rik'in ronojel wánima. Tak'uluba' k'a pe ri nuch'abel richin kan xkitikir xtintaqej ri apixa'.

¹⁴⁶ Awik'in k'a rat nink'utuj to'onik richin kinakolo'. Y kan xtinben k'a ri nubij ri apixa'.

¹⁴⁷ Kan k'a man jani niseqer toq nink'utuj to'onik chawe. Kan nukuquban k'a nuk'u'x rik'in ronojel ri asujun chuwe.

¹⁴⁸ Chijun k'a aq'a' yik'ase' ninch'ob rij ri apixa'.

¹⁴⁹ Jehová tawak'axaj k'a ri nuch'abel roma ri ajoyowanik pa nuwi'; taya' nuk'aslen achi'el ri ruchojmilal ri naben rat.

¹⁵⁰ Ri yetz'ilo wichin, naqaj chik ek'o-wi, jak'a xa kan nej ek'o-wi chire ri apixa'.

¹⁵¹ Jak'a rat Jehová kan naqaj atk'o-wi chuwe yin; ronojel ri apixa' kan ja wi ri' ri qitzij.

¹⁵² Kan ojer yan k'a ri' wetaman-pe ri apixa', ri pixa' ri aya'on kan rat, kan richin jantape'.

¹⁵³ Jehová tatzu' ri nutijoj-poqonal y kinajech'ej chuwech, roma yin kan man in mestawineq ta chire ri apixa'.

¹⁵⁴ Taq'alajirisaj ri nubanobal y kinakolo'. Taya' ruchuq'a' ri nuk'aslen rik'in ri ach'abel.

¹⁵⁵ Ri akolotajik rat kan nej k'a k'o chike ri e banoy etzelal, roma kan man nikitaqej ta ri apixa'.

¹⁵⁶ Jehová, ri ajoyowanik rat pa nuwi' kan janila nim. Tabana' k'a chuwe chi yik'ase' achi'el nubij ri ruchojmilal.

¹⁵⁷ Kan janila k'a e k'iy ri e etzelanel wichin ri in kitzeqeliben. Jak'a yin kan man nuch'aron ta kan wi' chire ri apixa'.

¹⁵⁸ Yentz'et k'a ri winaqi' ri xa at kimalin kan rat, y kan man yeqa' ta chinuwech, roma rije' xa man nikitaqej ta ri ach'abel.

¹⁵⁹ Jehová, tatz'eta' chi yin kan ninwajo' ri apixa'. Roma ri awajowabal pa nuwi', tabana' utzil taya' ri nuk'aslen.

¹⁶⁰ Ronojel ri ach'abel kan e qitzij; ri ruchojmilal ri q'atoj-tzij kan richin k'a q'asen.

¹⁶¹ Ek'o achi'a' ri k'o kiq'ij ri in kiq'eleben y man jun achike ta roma. Jak'a yin kan ninya' rejqalen ri ach'abel.

¹⁶² Kan jantape' yikikot rik'in ri ach'abel; kan más k'a yikikot chuwech ri wineq ri k'o k'iy beyomel nril-pe pa jun oyowal.

¹⁶³ Yin kan man niqa' ta k'a chinuwech y kan ninwetzelaj ri tz'ukuj-tzij. Jak'a ri apixa', ri' kan jari' ri ninwajo'.

¹⁶⁴ Kan jantape' ninya' aq'ij chupan ri jun q'ij; keri' ninben roma ri aq'atoj-tzij rat kan pa ruchojmilal.

¹⁶⁵ Ri nikitaqej ri apixa' kan janila uxlanibel-k'u'x k'o kik'in. Y kan man jun xtitzaqon kichin.

¹⁶⁶ Jehová, yin kan woyoben k'a richin yinakol. Kan jantape' nubanon-pe ri nubij ri apixa'.

¹⁶⁷ Yin jantape' ninnimaj ri apixa', roma janila ninwajo'.

¹⁶⁸ Yin kan ninnimaj ri apixa' y ronojel ri abin kan rat, roma ronojel ri nubey kan atzuliben.

¹⁶⁹ Jehová, ri nujiloj kan ta k'a xtapon chawech rat. Taya' k'a nuna'oj achi'el ri asujun chuwe.

¹⁷⁰ Ri nuch'owen kan ta xtapon chawech; kinato' k'a achi'el ri abin chuwe.

¹⁷¹ Ri nuchi' kan jantape' k'a xtuya' aq'ij toq rat xtak'ut chinuwech ri apixa'.

¹⁷² Yin kan ta xaxe bix awichin rat ri xtinbixaj, roma ri apixa' kan ja wi ri' ri ruchojmilal.

¹⁷³ Rat kan jantape' ta k'a xkinato', roma yin kan ja ri apixa' ri nutaqen.

¹⁷⁴ Jehová, kan jantape' k'a ninrayij richin yinato'; ri apixa' kan jari' ri ruki'il ri nuk'aslen.

¹⁷⁵ Kan xkik'ase' ta k'a richin ninya' aq'ij. Ri ruchojmilal ri naben rat ja ta ri' ri xtito'on wichin.

¹⁷⁶ Yin kan xibiyin k'a achi'el jun karne'l ri sachineq. Jak'a rat Jehová kan kinakanoj yin ri in samajel, roma kan man numestan ta ri apixa'.