Wuj Richin Bix Chire ri Dios 118 - Kaqchiquel Bible

Bix richin matioxinik chire ri Dios

¹ Tinimirisaj ruq'ij ri Jehová, roma rija' kan janila utz, roma ri rujoyowanik rija' kan richin jantape'.

² Konojel k'a qawinaq israelita tikibij k'a ri rujoyowanik ri Jehová kan richin jantape'.

³ Chuqa' rix sacerdote tibij k'a, ri rujoyowanik ri Jehová kan richin jantape'.

⁴ Konojel ri k'o rukiy ri Jehová chikiwech, tiqabij k'a ri rujoyowanik ri Jehová kan richin jantape'.

⁵ Kan chupan k'a ri nuq'axo'n xinnataj rubi' ri Jehová, y rija' kan xirak'axaj k'a, y xirukol.

⁶ Rija' kan k'o wik'in yin, roma ri' man xtinxibij ta wi', chire ri itzel ri xtuben ri wineq chuwe.

⁷ Ri Jehová kan k'o wik'in yin, ja rija' ri nito'on wichin. Yin kan xkentz'et k'a ri e etzelanel wichin toq xketzaq.

⁸ Más utz niqakuquba' qak'u'x rik'in ri Jehová, ke chuwech niqakuquba' qak'u'x rik'in jun wineq.

⁹ Más utz niqakuquba' qak'u'x rik'in ri Jehová, ke chuwech niqakuquba' qak'u'x kik'in ri e tata'al.

¹⁰ Konojel k'a ri winaqi' ri man nikitzeqelibej ta ri Dios xkisutij-wij, jak'a yin kan rik'in ri ruchuq'a' ri Jehová xkich'akon chikij.

¹¹ Xkisutij k'a wij, jak'a yin kan rik'in ri ruchuq'a' ri Jehová xkich'akon chikij.

¹² Kan achi'el k'a nikiben ri xuruy xkiben chuwij, jak'a chi'anin xek'is achi'el nuben ri k'ix pa q'aq', roma kan rik'in ri ruchuq'a' ri Jehová xkich'akon chikij.

¹³ Xkitej k'a kiq'ij chuwij richin ta yin xitzaq pa kiq'a', jak'a ri Jehová kan xiruto'.

¹⁴ Yin ninbixaj rubi' ri Jehová, roma nuya' wuchuq'a'. Ja rija' ri xkolon wichin.

¹⁵ Ri pa taq kachoch ri choj kik'aslen nak'axatej ch'abel richin kikoten y kolotajik. Y rije' nikibij: Ri Jehová kan nuben k'a meyel taq banobel.

¹⁶ Kan nimalej k'a ruchuq'a' ri Jehová. rija' kan nuya' k'a uchuq'a' richin ch'akonik, yecha'.

¹⁷ Roma ri' yin man xiken ta chupan ri oyowal ri'. Jak'a xa xkik'ase' na, richin chi nintzijoj ri rubanon ri Jehová wik'in.

¹⁸ Rija' kan xuben k'a chuwe richin xintej janila poqon, jak'a kan man xuya' ta q'ij richin xinapon pa kamik.

¹⁹ ¡Tijaqa' k'a chinuwech ri ruchi' ri rachoch ri Jehová, richin xkinok k'a apo y xtinbenya' ruq'ij!

²⁰ Kan jare' ri ruchi' ri rachoch ri Jehová, chupan re' xke'ok ri choj kik'aslen.

²¹ Jehová, yin kan xtinya' aq'ij roma kan xawak'axaj ri nuch'abel. Kan ja rat ri at nukolonel.

²² K'o k'a jun abej ri man xqa' ta chikiwech ri banoy taq jay. Jak'a re wakami ri abej ri' kan más k'atzinel chire ri jay richin chi kow xpa'e' kan.

²³ Ronojel re' kan ja ri Jehová xbanon, y chiqawech roj kan jun k'a meyel banobel.

²⁴ Ja q'ij re' ri xuben ri Jehová. Y roma ri' kan xqojnimaq'ijun k'a rik'in kikoten rik'in rija'.

²⁵ Nimalej Jehová, nink'utuj utzil chawe chi qojakolo' re wakami, xtaben ta chiqe chi ronojel utz ta xtel chiqawech.

²⁶ Nimalej k'a ruq'ij ri rey ri peteneq pa rubi' ri Jehová. Y chuqa' kan k'a pa rachoch ri Jehová niqoyoj ri urtisanik pan iwi' rix qawinaq.

²⁷ Ri Jehová kan jari' ri Dios, kan ruya'on k'a ri saqil pa qawi'. Roma ri' rix tik'ama-pe ruq'a' taq che' richin nitikeriba-q'anej ri nimaq'ij, y kixanpe k'a rik'in ri porobel.

²⁸ Jehová, kan ja rat ri at nu-Dios, y kan xtinya' k'a aq'ij. Nu-Dios yin, kan xtinnimirisaj k'a ri aq'ij.

²⁹ Kan tiqaya' k'a ruq'ij ri Jehová, roma rija' kan janila utz. Roma ri rujoyowanik rija' kan richin jantape'.