Wuj Richin Bix Chire ri Dios 114 - Kaqchiquel Bible

Natabel kichin ri israelita toq xe'el-pe pan Egipto

¹ Toq ri winaqi' israelita xe'el-pe pan Egipto, toq ri e rijatzul kan ri Jacob xe'el-pe chupan ri ruwach'ulew ri xa man kichin ta rije',

² jari' toq ri rijatzul ri Judá xecha'ox richin xe'ok richin ri Jehová. Jari' toq ri Israel xok rajawaren.

³ Ri Kaqa-Palou kan xaxe toq xerutz'et, xanimej chikiwech rije'. Ri raqen-ya' Jordán kan xutzolij k'a ri' chirij.

⁴ Ri nima'q taq juyu' kan xesilon, achi'el yetzopiyaj ri achija' taq tzuntzun. Ri ruwa taq juyu' kan xesilon k'a achi'el nikiben ri alaji' taq karne'l.

⁵ ¿Achike roma ri Kaqa-Palou xa xanimej? ¿Achike roma ri raqen-ya' Jordán xa xtzolin chirij?

⁶ ¿Achike roma ri nima'q taq juyu' xesilon achi'el yetzopiyaj ri tzuntzun? ¿Achike roma ri ruwa taq juyu' xesilon achi'el nikiben ri alaji' taq karne'l?

⁷ Kan xaxe k'a chuwech ri Jehová nisilon chijun ruwach'ulew; kan xaxe k'a chuwech ri ru-Dios ri Jacob.

⁸ Ja rija' xbanon chi ri nima-abej xel-pe k'iy ya' chupan. Xuben chi ri abej xe'ok alaxibel taq ya'.