Wuj Richin Bix Chire ri Dios 113 - Kaqchiquel Bible

Ri nimalej ruq'ij ri Jehová

¹ Tiya' ruq'ij ri Jehová. Tibixaj rubi' ri Jehová, rix ri ix rusamajela',

² Ri rubi' ri Jehová kan jantape' k'a tinimirisex; kan keri' k'a tiban tibe-q'ij tibe-seq.

³ Kan k'a akuchi k'a nel-wi-pe ri q'ij, y k'a akuchi nibeqaqa-wi, kan tinimirisex k'a ri rubi' ri Jehová.

⁴ Kan xaxe k'a ri Jehová ri niq'aton-tzij pa ruwi' ri ruwach'ulew. Ri ruk'ojlemal rija' kan nik'o k'a chuwech ri kaj.

⁵ ¿Achike chik ta k'a jun k'o achi'el ri Jehová ri qa-Dios, ri kan k'a más nej chire ri kaj tz'uyul-wi?

⁶ Stape' kan keri', rija' nuqasaj-ri' richin nutzu-pe ri kaj y ri ruwach'ulew.

⁷ Ri Jehová nuyek-q'anej ri meba' chupan ri meba'il. y ri kan k'o nik'atzin chire nrelesaj chupan ri ruk'ayewal ri'.

⁸ K'ari' nuben chike chi yetz'uye' chikikojol ri achi'a' ri k'o kiq'ij, y chikikojol ri e tata'al richin ri tinamit.

⁹ Ri Jehová nuben chike ri ixoqi' ri man ye'alan ta chi nik'oje' kiq'ij pa taq kachoch. Chuqa' nuben chi yek'oje' kal, y yekikot. Kan tinimirisex k'a ruq'ij ri Jehová.