Wuj Richin Bix Chire ri Dios 110 - Kaqchiquel Bible

Ri Jehová nuya' uchuq'a' pa ruq'a' ri rey*f102*

¹ Ri Jehová xubij chire ri wajaw: Katz'uye-pe re pa wijkiq'a' y xkenya' pan aq'a' ri ye'etzelan awichin, xcha'.

² Ri Jehová xtunimirisaj ri awajawaren ri chiri' pa Sión. Kan kak'oje' k'a pa kiwi' ri e etzelanel awichin.

³ Y ri chiri' toq rat xkabe pan oyowal, ri aj-labal xtikisuj-ki' richin xkebe chawij. Y rije' kan xtikitz'apej ruwech ri ruwach'ulew roma janila e k'iy, achi'el ri raxq'ab ri niqaqa toq k'a man ja ni niseqer-q'anej,

⁴ Ri Jehová xuya' ri rutzij y man xtutzolij ta ri' chirij. Kere' xubij: Ja rat ri at sacerdote richin q'asen achi'el rubanik xinben rik'in ri Melquisedec, xcha' chawe.

⁵ Ri ajaw kan k'o k'a pan awijkiq'a'. Toq xtapon ri q'ij richin nrelesaj ri royowal, kan xkeruk'is k'a konojel ri ch'aqa' chik rey.

⁶ Xtuq'et k'a tzij pa kiwi' ri tzobaj winaqi' richin ri ruwach'ulew. Chijun ri ruwach'ulew kan xkenoj k'a rik'in kaminaqi'. Xkeruk'is k'a konojel ri ch'aqa' chik rey.

⁷ Y rat xtaqum k'a el aya' chiri' chuchi' ri bey, richin xtik'oje-el más awuchuq'a'. Roma ronojel re', rat xkatikir xkach'akon.