Wuj Richin Bix Chire ri Dios 107 - Kaqchiquel Bible

Ri rajowabal ri Dios kan richin jantape'

¹ Kixmatioxin rik'in ri Jehová, roma rija' kan janila utz; roma ri rajowabal kan richin q'asen.

² Tibij re', iwonojel rix ri ix kolotajineq chik; ri ix rukolon chik pa kiq'a' ri e etzelanel iwichin;

³ ri kan ix relesan chik pe pa taq ruwach'ulew, richin xixrumol; roma xixruk'en-pe pa taq ruwach'ulew ri ek'o pa relebel-q'ij, pa qajbel-q'ij, pa xaman y pa xokon.

⁴ Pa rutikeribel jujun chike rije' kan e sachineq k'a pa tz'iran ruwach'ulew. Kan man nikil ta k'a kibey y kiyon rije' xek'oje' chiri'. Kan man jun k'a tinamit nikil chiri' richin ta xek'ase' chupan.

⁵ Rik'in k'a wayjal y chaqi'j-chi'ij, ri kánima kan nimayamo' yan qa.

⁶ Jari' k'a toq rije' chupan ri kiq'axo'n xesik'in rik'in ri Jehová. Y rija' kan xerukol k'a chupan ri tijoj-poqonal ri'.

⁷ Xeruyuqej k'a chupan jun ch'ajch'oj bey, richin chi xe'apon pa jun tinamit akuchi utz yek'oje-wi.

⁸ Rije' k'o chi nikimatioxij chire ri Jehová, roma ri rajowabal man k'isel ta, y roma ri nima'q taq banobel ri nuben kik'in ri winaqi'.

⁹ Roma rija' nuya' kiya' ri nichaqi'j kichi', y kan nuya' kiway ri yewayjan.

¹⁰ Ek'o chik ch'aqa' winaqi' ri ek'o pa q'equ'm; e ximon rik'in cadena y nikitej janila poqon.

¹¹ Kere' xban chike roma kan xkipaba-ki' chuwech ri Jehová, roma xketzelaj ri pixa' ri ruya'on rija'.

¹² Roma ri' ri Jehová xeruya' pa kowilej taq samaj, xetzaqilan k'a, y kan man jun xto'on kichin.

¹³ Jak'a toq xesik'in rik'in ri Jehová chupan ri kiq'axo'n, ri Jehová kan xerukol k'a chupan ri tijoj-poqonal ri nikik'owisaj.

¹⁴ Xerelesaj k'a chupan ri q'equ'm y chuwech ri rumach'ach'il ri kamik ri koyoben. Y xuwulaj k'a ri ximonri'il ri akuchi e tz'apen-wi.

¹⁵ Rije' k'o chi nikimatioxij chire ri Jehová, roma ri rajowabal man k'isel ta, y roma ri nima'q taq banobel ri nuben kik'in ri winaqi'.

¹⁶ Rija' xuwulaj ri ruchi' taq jay ri e banon rik'in q'enq'oj-pueq; y xuk'ajij k'a ri ch'ich' ri niq'e'e' chirij.

¹⁷ Ri man jun ketaman xek'oje' pa tijoj-poqonal, roma ri kiyakatajinenri'il, y roma ri etzelal ri nikiben.

¹⁸ Rije' kan man xkirayij ta k'a xewa-xe'uk'ya', y xa kan xe'apon k'a chuwi' kamik.

¹⁹ Jak'a rije' kan xesik'in chire ri Jehová chupan ri kiq'axo'n. Ri Jehová kan xerukol k'a chupan ri tijoj-poqonal ri nikik'owisaj.

²⁰ Kan xaxe toq rija' xch'on, rije' kan xek'achoj. Kan xerujech'ej k'a chuwech ri kamik.

²¹ Rije' k'o chi nikimatioxij chire ri Jehová, roma ri rajowabal man k'isel ta, y roma ri nima'q taq banobel ri nuben kik'in ri winaqi'.

²² Chuqa' tisuju' sipanik richin matioxinik chire. y kan titzijoj k'a rik'in kikoten ronojel ri nuben rija'.

²³ Ri yebe pa ruwi' ri palou chupan ri ki-barco. Ri e loq'onela' y ri e k'ayinela' ri xaxe pa ruwi' ya' yebiyaj-wi,

²⁴ rije' kan xkitz'et ri nimalej rusamaj ri Jehová; xkitz'et k'a ri meyel taq banobel chupan ri palou.

²⁵ Ri Jehová xuben chi xyakatej jun nimalej kaq'iq', kan xuben chi nibolqo't ri ya' pa ruwi' ri palou,

²⁶ ri ya' ri' kan xeruk'eq k'a ri winaqi' chikaj, k'ari' yeruqasaj k'a chuxe' ri ya'; jari' toq ri kánima rije' kan xmayamo-qa.

²⁷ Kan xek'ark'ot y xebe-kela' xebe-kela' xkiben, achi'el nikiben ri q'abarela'. Ronojel k'a ri ketamabal xa kan man jun nik'atzin-wi.

²⁸ Jari' toq xech'on rik'in ri Jehová chupan ri kiq'axo'n. Y rija' kan xerukol k'a chupan ri tijoj-poqonal.

²⁹ Ri nimalej kaq'iq'-job y koqolajay kan xujel k'a rik'in ch'uch'ujil. Ri ya' ri nibolqo't pa ruwi' kan xsile-qa.

³⁰ Chirij ri' ri winaqi' kan yekikot roma kan xsiliso-qa ri ya'. Keri' ri Jehová xeruk'uaj chuchi' ri ya' akuchi kich'obon richin ye'apon-wi.

³¹ Tiya' matioxinik chire ri Jehová, roma ri rajowabal, y roma ri meyel taq banobel ri nuben kik'in ri winaqi'.

³² Tinimirisaj ruq'ij chupan ri molojri'il kichin ri winaqi'. Y chupan ri molojri'il kichin ri rijita'q taq achi'a' ri k'o kiq'ij, tinimirisaj ruq'ij ri Jehová.

³³ Ri Jehová nuben chi ri raqen taq ya' ye'ok achi'el tz'iran ruwach'ulew, y ri alaxibel taq ya' nuben chi yechaqi'j.

³⁴ Ri qasanbel taq ulew kan nuben chire chi man yewachin ta chik. Kere' nuben chire roma ri kimak ri winaqi' ri ek'o chuwech.

³⁵ Chirij re' ri Jehová xuben chire ri tz'iran ruwach'ulew chi xok choy. Ri chaqi'j ruwach'ulew xuben chire chi xok tz'ukubel taq ya'.

³⁶ Chiri' k'a xeruya-wi ri winaqi' ri yewayjan. Y rije' kan nikipaba' k'a q'anej tinamit richin yek'ase' chupan.

³⁷ Chiri' nikitikila-qa ruwech ri ulew, nikitik-qa uva. Y ri kitiko'n kan janila niwachin.

³⁸ Ri Jehová kan xerurtisaj y kan janila xewinaqir; ri kawej kan janila chuqa' xek'iyer.

³⁹ Chirij ri', re winaqi' re' xa yek'is-qa roma ri tijoj-poqonal, roma ri wululen y ri janila chi q'axo'n ri nipe chikij,

⁴⁰ jari' toq ri Dios kan xkeretzelaj k'a ri winaqi' ri yebanon ri itzel chike, y kan xtuben k'a chike chi nisach kik'u'x.

⁴¹ Roma rija' kan nuyek k'a pa jotol ri wineq ri man jun k'o rik'in. Nuben k'a chi yek'iyer ri rijatzul, kan achi'el k'a tzobaj taq karne'l nuben chike.

⁴² Ronojel k'a re' xtikitz'et ri choj kik'aslen, y kan xkekikot. Jak'a konojel ri e banoy etzelal kan xtikitz'apej ri kichi'.

⁴³ Ri kan aj-na'oj k'o chi nik'oje' k'a chuk'u'x ronojel re', niq'ax k'a chuwech ri nimalej rajowabal ri Jehová.