Wuj Richin Bix Chire ri Dios 105 - Kaqchiquel Bible

Ri rubanobal ri Jehová pa kiwi' ri israelita

¹ Tiya' ruq'ij ri Jehová y tiya' rutzijol ri utzilej rubi'. Titaluj rutzijol ri rubanobal ri Jehová chupan ronojel ruwach'ulew.

² Kan tiya' k'a ri bix chire; tibixaj ri rubi'. Kixtzijon pa ruwi' ri meyel taq rubanobal.

³ Kan kixkikot k'a rik'in ri loq'olej rubi'. Ri yekanon richin ri Jehová, kan kekikot k'a.

⁴ Kan ja ri Jehová tikanoj y tikanoj ri ruchuq'a'. Kan jantape' k'a titzu' ruwech rija'.

⁵ Toqaqa chiqak'u'x ri meyel taq banobel ri rubanon rija'. Toqaqa chiqak'u'x ri pixa' ri eleneq pa ruchi'.

⁶ Tibana' keri' rix ri ix rijatzul kan ri Abraham ri rusamajel, rix ri ix ralk'ual kan ri Jacob, y kan ix rucha'on.

⁷ Ja ri Jehová ri qa-Dios roj. Ja rija' niq'aton-tzij pa ruwi' chijun ri ruwach'ulew.

⁸ Rija' kan jantape' noqaqa chuk'u'x ri jikibel-tzij ri rubanon. Noqaqa chuk'u'x ri ruch'abel ri rubin pa kiwi' ri chi sol chi sol winaqi'.

⁹ Re', jare' ri jikibel-tzij ri xuben rik'in ri Abraham, ri ya'on tzij ri xuben rik'in ri Isaac.

¹⁰ Kan xujikiba' chik k'a chire ri Jacob, y kan xuben chire chi achi'el pixa'. Jare' ri jikibel-tzij richin q'asen ri xuben,

¹¹ xubij k'a chire chi xtuya' ri ruwach'ulew Canaán richin xtrichinaj kan.

¹² Pa rutikeribel, ri qati't-qamama' xa k'a e juba' ok, y xa chaq q'axel xek'oje' chupan ri ruwach'ulew ri'.

¹³ Yebe-kela' yebe-kela' xkiben pa taq ruwach'ulew. Yeq'axlan pa taq tinamit richin jalajoj ajawaren.

¹⁴ Man rik'in ri' ri Jehová kan man xuya' ta q'ij richin xban ta poqon chike. Koma k'a rije' xuya' rutojbalil-mak pa kiwi' ri rey kichin ch'aqa' chik ruwach'ulew.

¹⁵ Y xubij chike chi man jun tikiben chike ri qati't-qamama' ri e rucha'on rija', chi man jun tikiben chike ri e q'alajirisey ruch'abel.

¹⁶ Ri Dios xuben k'a chi xpe wayjal pa ruwi' ri ruwach'ulew Canaán, Xrelesaj k'a ri wey y ronojel ri achoq ik'in nikilij-ki'.

¹⁷ Jak'a richin xerukol xuteq k'a jun achin nabey chikiwech rije' pa ruwach'ulew Egipto. Ri achin ri' ja ri José ri xk'ayix-el richin xbe'ok samajel yuqul pa samaj.

¹⁸ Xkiya' k'a pa cárcel y xkijitz' ri raqen rik'in ch'ich'. Chuqa' xkixim ruqul rik'in cadena.

¹⁹ Xtejtobex k'a roma ri Dios, k'a toq xapon na richin nibanatej ri ch'abel ri rubin ri José.

²⁰ K'ari' ri rey xuteq k'a rubixik chi telesex-pe pa cárcel richin xrisq'opej-el. Ri ajaw richin ri ruwach'ulew ri' xuya' k'a q'ij chire richin xkolotej-el.

²¹ Xuben k'a chire richin xok aj-raqen pa ruwi' ri rachoch. Kan xok k'a q'atoy-tzij pa ruwi' ronojel ri ajawaren.

²² Ja ri José xk'utu chikiwech ri tata'al ri k'atzinel richin xkiben. Xerutijoj k'a ri achi'a' ri k'o kiq'ij richin xe'ok aj-na'oj.

²³ Keri' toq ri qawinaq israelita xe'ok-apo pa ruwach'ulew Egipto. Keri' ri aj pa rachoch ri Jacob xek'oje' chupan ri ruwach'ulew ri'.

²⁴ Ri Dios kan xuben k'a chi ri qawinaq kan janila xek'iyer. Xuben k'a chike chi más kuchuq'a' chikiwech ri e etzelanel kichin.

²⁵ Xuben k'a chike ri aj-Egipto richin itzel xekitz'et. Y xuben chi xpe itzel taq ch'obonik chikij.

²⁶ K'ari' kik'in rije' xuteq k'a ri Moisés, ri rusamajel. Xuteq chuqa' ri Aarón ri kan xucha'.

²⁷ Rije' xkiben meyel taq banobel chikiwech ri aj chiri'. Kan xkik'ut k'a ri banobel ri man jun bey e tz'eton, chiri' pan Egipto.

²⁸ Xuteq k'a pe jun nimalej q'equ'm pa ruwi' chijun ri ruwach'ulew, jak'a ri aj chiri' xa kan man xkinimaj ta rutzij ri Jehová.

²⁹ Ronojel ri ya' ri ek'o chiri', xuben chire chi xok kik'. Roma ri' k'a xeken ronojel ri taq ker ri ek'o chupan ri ya' ri'.

³⁰ Ri Jehová xuben chuqa' chi xebek'iyer-pe xkalet. Re xkalet re' kan xe'okiyaj k'a pa taq kich'at ri q'atoy taq tzij.

³¹ Xaxe rik'in ri ruch'abel ri Dios, xepe k'a ri pa taq tzobaj amolo'. Kan xepe k'a chuqa' xenen chupan chijun ruwach'ulew Egipto.

³² Pa ruk'exel job, xuya' k'a pe saqboch pa kiwi'. Ruxaq q'aq' xuteq-pe pa ruwi' ri ruwach'ulew ri'.

³³ Re' kan xuk'is k'a ri kitiko'n richin uva y ri che' richin wíkix. Kan xeruq'ajala' k'a ronojel ri che' richin ri ajawaren ri'.

³⁴ Xaxe xch'on ri Jehová, kan jari' xepe sak' pa ruk'iyal. Kan janila k'a chi chikopi' ri xek'oje' chirij ri tiko'n, kan man e ajlatel ta chik.

³⁵ Kan xkik'is k'a ronojel ri q'ayis ri k'o chuwech ri ruwach'ulew ri'. Kan xkitej k'a ronojel ri nuwachij ri ulew ri'.

³⁶ K'ari' xerukamisaj-el konojel ri e nabey taq al alaboni'. Xeruk'uaj k'a konojel ri e nabey richin ri kuchuq'a'.

³⁷ Chirij ri' ri Jehová xerelesaj k'a el chiri', y xyalox-el saqipueq y q'anapueq chike. Kan man jun k'a chikikojol rije', ri maneq ta ruchuq'a' richin xebe.

³⁸ Ri aj-Egipto xekikot k'a toq xe'el-pe chikikojol. Y ri kikiy ri qati't-qamama' xa kan qajineq chik k'a pa kiwi' rije'.

³⁹ Ri Jehová xurik' k'a jun sutz' pa kiwi' ri qati't-qamama' richin xok kimujal. Rik'in k'a jun nimalej ruxaq q'aq' xerusaqirisaj ri chi'aq'a'.

⁴⁰ Xkik'utuj ti'ij chire ri Jehová y rija' xuben chi xepe saqkorowach richin xekitej. Kan xerutzuq k'a rik'in ri aj-chikajil-wey.

⁴¹ Xujeq k'a ri nimalej abej, y kan xuben chi xbebulbu'x-pe ri ya' chupan. Kan xbiyin k'a el chupan ri chaqi'j ruwach'ulew achi'el jun raqen-ya'.

⁴² Keri' xuben ri Jehová roma ri ya'on tzij ri rubanon; ri ruch'abel ri rubin kan chire ri Abraham, ri rusamajel.

⁴³ Xrelesaj k'a pe ri rutinamit rik'in kikoten. Y rik'in k'a raqoj-chi'ij richin kikoten xe'el-pe chiri' ri e rucha'on rija'.

⁴⁴ K'ari' xuya' k'a chike ri kiruwach'ulew ri ch'aqa' chik winaqi'. Ri kisamajin-qa ri winaqi' richin ch'aqa' chik tinamit jari' ri xkichinaj kan.

⁴⁵ Ronojel re', xuya' chike richin chi tikitaqej ri rupixa', y richin chi tikibana' ronojel ri rubin rija' chike. Kan tiqanimirisaj k'a ruq'ij ri Dios.