Os 7 - Kaqchiquel Bible

¹ Ri Jehová nubij: Rokik yin ninwajo' ninwaq'omaj ri tinamit Israel, xa xbek'ulun k'a pe ri rumak. xbek'ulun-pe ri itzel taq rubanobal ri tinamit Samaria. Rije' xa kan xaxe k'a q'oloj nikiben, e achi'el k'a eleq'oma' ri ye'ok pa taq jay, kan yekichop k'a ri winaqi' pa taq bey.

² Kan man nikich'ob ta k'a qa chi yin kan nutzuliben ronojel ri nikiben. Wakami kan e nojineq chik k'a chire ri itzel taq kibanobal; ronojel re' kan nutzuliben yin.

³ Rik'in k'a ri itzel taq kibanobal nikiya' kikoten chire ri ki-rey. Ri e tata'al kan yekikot k'a rik'in ri tz'ukuj-tzij ri nikiben ri winaqi'.

⁴ Konojel rije' xa e q'olonela' y man qitzij ta ri nikibij, ri ketzelal kan nik'a'on achi'el ri q'aq' chupan ri horno ri man nik'atzin ta chi nixupux. Keri' nik'oje' ri q'aq', k'a ja toq ri banoy kaxlan-wey nuchop ruchojmirisaxik ri q'or ri k'o chi nukusaj k'a toq nisipoj na pe.

⁵ Chupan ri nimaq'ij richin ri rey, kan xkiq'abarisaj ri rey, y ri e tata'al, kan xik'o ruwi' ri vino ri xkiya' chire.

⁶ Ri kánima rije' kan nik'a'on k'a richin nikiben etzelal chire ri rey, kan junan rik'in jun horno ri niya'ox ruq'aq'al. Ri koyowal rije' kan chijun aq'a' nik'a'on y toq niseqer-pe, ri koyowal xa kan achi'el xa ta ruxaq q'aq' nuben-el.

⁷ Y rik'in ri kiq'aq'arinen ri' xekikamisaj k'a ri to'onela'. Konojel ri ki-rey xa chi jujun xekamisex. Jak'a kan man jun chike rije' ri xuk'utuj ta to'onik chuwe yin, ncha' ri Jehová.

Ri israelita xkijech'ej kan ki' rik'in ri ki-Dios

⁸ Ri tinamit Israel xa xkitun chik ki' kik'in ch'aqa' chik tinamit. Rije' xa xe'ok achi'el jun ponon kaxlan-wey ri man xpiskolix ta.

⁹ Ri kuchuq'a' xa xkik'is-el ri e aj juk'an chik ruwach'ulew. Rije' kan man xkinabej ta k'a chi keri' xban chike, chuqa' xsaqir yan ri rusumal-kiwi', jak'a xa man xkinabej ta.

¹⁰ Ri kinimirisanen ri aj-Israel, kan jari' k'a ri niq'alajirisan chikipalej ri kibanik. Jak'a rije' kan man xtzolej ta kik'u'x rik'in ri Jehová ri ki-Dios. Kan man xkikanoj ta chik rija'.

¹¹ Ri tinamit Israel achi'el xa ta jun paloma nakanik, ri maneq runa'oj. Roma xa chire ri Egipto y ri Asiria xkik'utuj-wi to'onik.

¹² Toq xkebe chuk'utuxik, yin kan xtinya' k'a achi'el jun ya'l richin pikbel, richin chi yetzaq chupan, achi'el toq yeqaqa ri aj-xik' taq chikopi' chupan ri pikbel. Xtinya' k'a rutojbalil ri kimak pa kiwi', roma ri itzel xekibanala'.

¹³ Kan toq'ex k'a kiwech ri aj-Israel roma xa xkich'er kan ki' chuwe yin. Kan xtipe k'a ri wululen pa kiwi'. Kere' xtikik'uluwachij roma xa xkipaba-ki' chinuwech. Xenkol y rije' xa xkitz'uk-tzij chuwij.

¹⁴ Man xinkoyoj ta k'a rik'in ronojel kánima, stape' kan kiqasan-ki' k'a pan ulew kan xkisokola' k'a qa ki'. Richin chi xkik'utuj ri ki-trigo y ri ki-vino, xa xkipaba' k'a ki' chinuwech yin.

¹⁵ Ja yin ri xitijon kichin, ja yin ri xiya'on kuchuq'a'. Jak'a rije' xa xkich'ob richin nikiben itzel chuwe.

¹⁶ Xa jak'a ri wachibel ri xekitzeqelibej kan, rije' xa kan e achi'el k'a jun rute-ch'ab ri xa kotokik rubanon. Ri e aj-raqen chikikojol rije' xa xekamisex chi espada roma ri kinimirisanen. Chupan ri ruwach'ulew Egipto xtiban k'a yojobenik chikij, nicha' ri Dios.