Os 2 - Kaqchiquel Bible

¹ Chupan k'a ri q'ij ri' xtibij k'a chike ri iwach'alal: Rutinamit ri Dios,*f3* y chike ri iwana' xtibij: Ri Kan Xjoyowex Kiwech,*f4* xcha' ri Jehová.

Ri Dios xuya' rutzij chi xtuya' rutojbalil-mak pa ruwi' ri ruwach'ulew Israel

² Ri Jehová xubij chik chuwe: ¡Kan tisujuj k'a ri Israel rik'in ri itzel rubanobal! Roma rija' xa man wixjayil ta chik y yin xa man in rachijil ta chik. Tik'utuj utzil chire chi titane' chire ri itzel taq rubanobal, chi kerumestaj jumul ri achi'a' ri ye'ajowan richin.

³ Roma man xa tinwelesaj ronojel chire, man xa tinben chire achi'el rubanikil toq xalex, y xtinben chire chi xtok kan achi'el tz'iran ruwach'ulew; kan achi'el ri ruwach'ulew ri chaqi'j-chaqi'j y xa xtinkamisaj roma chaqi'j-chi'ij.

⁴ Jajun ri e ral, kan man xtinjoyowaj ta kiwech roma xa e ral jun ixoq ri itzel ruk'aslen.

⁵ Ri te'ej xa xutz'ilobisaj ri ruk'aslen, xa ruyon rija' xuqasaj ruq'ij roma xubij-qa: Kentzeqelibej na ri ye'ajowan wichin. Rije' kan xtikiya' k'a ri nukaxlan-way y ri nuya'. Kan xtikiya' k'a nutziaq ri e banon rik'in lana y lino. Kan xtikiya' k'a ri nu-aceite y ronojel ri xtinqum, xcha-qa.

⁶ Roma ri' kan xtintz'apej ri rubey rik'in k'ix kan xtinya' k'a jun tz'aq chirij richin chi nisach ruk'u'x y man nril ta chik rubey.

⁷ Ri ixoq ri' kan xkerutzeqelibej k'a el ri xe'ajowan richin jak'a xa man xkeberuq'i' ta. Xkerukanoj, jak'a xa man xkeril ta. K'ari' xtubij-qa: Kitzolej na rik'in ri nabey wachijil roma xa kan utz nubanon toq ink'o rik'in rija' ke chuwech re nubanon wakami, xticha-qa.

⁸ Jak'a rija' xa man xuya' ta rejqalen chi ri trigo, ri vino y ri aceite xa ja yin ri in yoyon chire. Ri q'anapueq y ri saqipueq ri kan pa ruk'iyal nuya'on chire, xa chire ri Baal xusuj-wi.

⁹ Roma ri' xtapon k'a ri q'ij chi yin kan xtinwelesaj k'a ri trigo y ri vino chire. Xtinwelesaj k'a chire ri rutziaq ri banon rik'in lana y lino, ri tzieq ri achoq ik'in rukuchun-wi-ri'.

¹⁰ Kan xtinya' k'a ruk'ix chikiwech ri ye'ajowan richin, kan man jun k'a xtikolon pa nuq'a'.

¹¹ Ronojel ri kikoten ri k'o rik'in kan xtinwelesaj k'a chire. Xtinpaba' k'a ri nimaq'ij richin ri k'ak'a' taq ik' y ri q'ij richin uxlanibel, kan ronojel k'a nimaq'ij xtinpaba'.

¹² Xtinben k'a chi xkechoy ronojel ri juwi-uva y ri ruche'el wíkix, ri achoq pa ruwi' xubij-wi chi kan jari' ri ruch'akoj kik'in ri achi'a' ri xe'ajowan richin. Ronojel ri ulew richin tiko'n kan xtinben k'a chire chi xtok kan jun soq'olbel; chiri' k'a xkewa-wi ri chikopi' ri e richin pa juyu'.

¹³ Xtinya' k'a rutojbalil-mak pa ruwi' roma ri janipe' q'ij xkamela'an chuwech ri Baal. Kan nuwiq-el-ri' rik'in ri ruwi-ixkinaj y ri richinaj richin nitzeqe-el chikij ri ch'aqa' chik achi'a', richin chi xirumestaj kan yin, nicha' ri Jehová.

Ri Jehová nubochi'ij ri rutinamit Israel

¹⁴ Ri Jehová xubij chik chuwe: Jak'a yin kan xtinbochi'ij chik k'a el ri nutinamit Israel. Y xtink'uaj k'a el pa tz'iran ruwach'ulew, chiri' xkitzijon-wi rik'in chi utzil.

¹⁵ Xtintzolij chik k'a chire ri rutiko'n richin uva. Ri taq'aj k'o kojol juyu' richin Acor kan xtok k'a ruchi' ri oyobenri'il chire rija'. Chiri' pa tz'iran ruwach'ulew xtibixan chik k'a rik'in kikoten achi'el ri q'ij toq xk'oje' chupan ri ruq'opojil, achi'el ri q'ij toq xel-pe pan Egipto.

¹⁶ Toq xtapon k'a ri q'ij ri' ri tinamit Israel kan xtubij k'a chuwe: Wachijil yin. Kan man jun bey chik k'a xtubij chuwe: Nu-Baal yin.

¹⁷ Xtinwelesaj k'a pa ruchi' ri kibi' ri ch'aqa' chik dios. Kan man jun bey chik k'a xtunataj ri kibi'.

¹⁸ Roma ri nutinamit Israel, toq xtapon k'a ri q'ij ri', xtinben jun jikibel-tzij kik'in ri chikopi'; kik'in ri k'uxunela' taq chikopi', kik'in ri aj-xik' taq chikopi' y kik'in ri kumatzi'. Xtinpaba' k'a ronojel oyowalen chirij, xtinben k'a chi kan kuqul kik'u'x xkek'ase'.

¹⁹ Israel: Yin kan xtinben k'a chawe chi kan xkatok wixjayil richin q'asen. Wixjayil ri kan yik'ule' awik'in rik'in ruchojmilal achi'el nubij ri q'atbel-tzij, roma kan yatinwajo' rik'in ronojel wánima.

²⁰ Xkatok chik k'a wixjayil y kan utz xtinben awik'in. Keri' rat kan xtawetamaj chik nuwech yin Jehová.

²¹ Chupan ri q'ij ri' yin kan xkich'on k'a rik'in ri kaj; ri kaj kan xtuya' k'a pe ri urtisanik pa ruwi' ri ruwach'ulew.

²² Ri ruwach'ulew kan xtiberuwachij k'a pe ri trigo, ri vino y ri aceite. Ri taq'aj Jezreel kan xtibewachin k'a jebel.

²³ Xkenbenya' chik k'a ri nutinamit chupan ri ruwach'ulew. Xtinjoyowaj chik k'a ruwech ri Man Jun Xtijoyowan Ruwech; xtinbij chik k'a chire ri Ri Man Nutinamit Ta; Rat Kan at Nutinamit, xkicha' chire. Rija' kan xtubij chik k'a chuwe: ¡Ja rat ri at nu-Dios!, xticha' chuwe, xcha' ri Dios.