Os 13 - Kaqchiquel Bible

Ri wululen ri xpe pa ruwi' ri tinamit Israel

¹ Pa nabey kan, toq ri winaqi' richin ri tinamit Efraín yech'on, kan konojel k'a ri ch'aqa' chik tzobaj ye'ak'axan kichin, roma kan k'o kikiy. Kan xnimirisex k'a kiq'ij koma ri kach'alal. Jak'a toq xemakun roma xkiya' kiq'ij ri Baal, xa xek'is.

² Wakami xa kan k'a yemakun na k'a, roma kan k'a nikiya'erisaj na saqipueq y yekibanala' wachibel chire richin nikiya' kiq'ij. Achi'el k'a xqa' chikiwech rije' keri' xkiben chire, k'ari' xkibij chike ri winaqi' chi kekamela'an chikiwech. Ri winaqi' kan yekitz'ubaj k'a ri wachibel richin bóyix ri xeban.

³ Roma ri' ri winaqi' aj-Israel xa xkek'is-el, achi'el nik'is-el ri sutz' ri niqaqa nimaq'a' yan. Achi'el ri raxq'ab ri niqaqa toq k'a man jani niseqer-q'anej ri xa nik'is-el. Achi'el chuqa' ri páxa ri k'o akuchi nich'ay ri trigo ri nuxupupej-el kaq'iq'. Achi'el ri sib ri nibuqulin nel-el chikaj, kan keri' k'a xtikiben-el ri aj-Israel.

⁴ Ri Jehová nubij chire ri tinamit Israel: Ja yin Jehová ri a-Dios kan k'a toq k'a atk'o na pan Egipto. Roma ri' kan man ninwajo' ta chi nik'oje' jun chik a-dios chinuwech yin. Xa kan xaxe k'a yin ri in akolonel y man jun chik k'o chuwij yin.

⁵ Ja yin xichajin awichin chupan ri tz'iran ruwach'ulew, chupan ri chaqi'j ruwach'ulew.

⁶ Jak'a toq xinya' ri away pa ruk'iyal xa jari' k'a toq xpe nimirisanen awik'in, xa jari' toq xinamestaj kan.

⁷ Roma ri' kan xkinok k'a chawe rat achi'el xa ta jun koj. Achi'el jun leopardo ri kan niq'eleben.

⁸ Kan xkiqaqa k'a pan awi' achi'el jun ixoq oso ri ek'o taq ral y yakatajineq royowal roma e majon kan chuwech. Xtinwech' k'a ri awánima, kan xkatink'is k'a jumul achi'el nuben ri koj.

⁹ Kan xkatink'is k'a, rat tinamit Israel, kan man jun k'a xtitikir xkakolon pa nuq'a'.

¹⁰ ¿Akuchi k'a k'o-wi ri a-rey richin ta chi yaruchajij rat y ri atinamit? ¿Akuchi k'a ek'o-wi ri to'onela' ri xe'ak'utuj chuwe, toq xabij: Taya' jun qa-rey y ke'aya' aj-raqen richin yek'oje' pa qawi'?, xacha'.

¹¹ Yin kan rik'in k'a woyowal xinya' ri a-rey, chuqa' rik'in woyowal xinwelesaj chik chawe.

¹² Ri rumak ri tinamit Israel kan tz'ibatel k'a kan, kan yakel k'a kan ri rumak.

¹³ Ri ruwach'ulew Israel xapon yan k'a ri ramaj richin nalex, jak'a xa kan achi'el jun nakanik ak'ual ri kan man retaman ta nuchojmirisaj-ri' richin nalex.

¹⁴ Yin kan man xkenkol ta k'a chuwech ri jul muqbel kamineq, xa kan xkenjech k'a pa kamik. Rat kamik, ¿akuchi k'a k'o-wi ri awuchuq'a' ri kan nuk'is ronojel? Rat jul muqbel kamineq, ¿akuchi k'o-wi ri ruk'ayewal ri naya'? Roma yin xa kan man xtinjoyowaj ta chik kiwech re winaqi' re'.

¹⁵ Stape' ri Israel xtiwinaqir-q'anej chikikojol ri rach'alal, xa kan xtipe k'a jun kaq'iq' pa relebel-q'ij, xa kan xtipe k'a jun kaq'iq' wichin yin Jehová ri xtijote-pe pa tz'iran ruwach'ulew. Re kaq'iq' re' kan xtuchaqirisaj k'a kan ronojel ri ralaxbal taq ya' y kan xkek'is k'a ronojel. Ri e etzelanel kichin xa kan xtikik'uaj k'a el ronojel ri beyomel y ronojel ri k'o rejqalen ri k'o kik'in.

¹⁶ Ri tinamit Samaria kan xtiqaqa k'a ri rutojbalil-mak pa ruwi' roma kan xupaba-ri' chuwech ri Dios, kan xkekamisex chi espada. Ri taq ak'uala' kan xkek'aq k'a pan ulew, ri ixoqi' ri nibe'alex yan taq kal xa kan xtijaq k'a ri kipan, ncha' ri Dios.