Os 12 - Kaqchiquel Bible

Ri Dios nuya' ri rutojbalil mak pa kiwi' ri aj-Israel

¹ Ri winaqi' aj-Israel achi'el xa ta ja ri kaq'iq' ri nikitej, kan jak'a ri kaq'iq' ri nipe pa relebel-q'ij ri rutzeqeliben. Xa kan xkinimirisaj k'a q'anej chikij ri tz'ukuj-tzij y ri wululen. Xa xkiben jikibel-tzij rik'in ri Asiria, y ronojel ri aceite ri k'o kik'in xa nikik'uaj pan Egipto.

² Ri Jehová kan nuben k'a oyowal kik'in ri aj-Judá, richin nuya' rutojbalil-mak pa kiwi' ri rijatzul kan ri Jacob, roma ri bey ri kitzeqeliben. Kan xtuya' k'a rutojbalil chike achi'el ri rubanik ri kibanobal.

³ Ri Jacob kan k'a k'o na chupan ri rute' toq xuchop chuqul raqen ri runimal. Keri' chuqa' rik'in ri ruchuq'a' kan xch'akon chirij ri ángel ri xchapo richin.

⁴ Xuchuq-ri' rik'in ri ángel y xch'akon chirij, xoq' y xuk'utuj utzil chi tijoyowex ruwech. Chiri' k'a pa Betel xilitej-wi roma ri Dios, y kan xtzijon k'a rik'in ri chiri'.

⁵ Jak'a ri Jehová kan ja wi rija' ri Dios k'iytisanel richin ronojel, Jehová jari' ri rubi'.

⁶ Rix nuwinaq israelita kan titzolej k'a pe ik'u'x rik'in ri qa-Dios Kan tibana' k'a ri qitzij y ri choj. Kan jantape' k'a tikuquba' ik'u'x rik'in ri qa-Dios.

⁷ Ri Dios nubij: Ri aj-Israel kan e achi'el k'a jun k'ayinel ri nukusaj etabel ri man tz'aqet ta. Kan ja ri eleq' ri niqa' chikiwech.

⁸ Rije' kan xkibij k'a qa: Kan janila xibeyomer-q'anej kan nim k'a ri beyomel ri wilon yin. Kan man jun k'a xtitikir xtich'ojin chuwe ri akuchi nuk'amon-wi ronojel re beyomel re', ni kan man jun k'a mak xtilitej chupan, yecha'.

⁹ Jak'a yin Jehová ri i-Dios ri kan ink'o pe iwik'in ri pa ruwach'ulew Egipto. Wakami xa kan xtinben k'a chiwe chi xa xkik'oje' chik chupan jay banon rik'in tzieq, achi'el ri q'ij toq xich'on iwik'in pa tz'iran ruwach'ulew.

¹⁰ Yin kan xich'on k'a pe iwik'in koma ri e q'alajirisey nuch'abel. Kan k'iy k'a ri xinq'alajirisaj chikiwech, rije' kan k'iy k'a ri k'ambel taq tzij ri xkikusaj ri xinbij chike.

¹¹ Ri winaqi' richin Galaad xa ja ri dios ri man e qitzij ta ri xekitzeqelibej. Ri winaqi' ri ek'o pa Guilgal xekisuj k'a richin kamelabel ri achija' taq wákix. Ri kiporobal rije' xa ruyon k'a mulumeq taq abej ri ek'o chukojol boloj ulew richin pa juyu'.

¹² Ri Jacob xa xanimej k'a el y xbe pa ruwach'ulew Aram. Rija' k'o chi xsamej na richin xk'oje' rixjayil. Richin xk'oje' rixjayil k'o chi xok na yuq'unel.

¹³ Rik'in k'a jun q'alajirisey nuch'abel xenwelesaj-pe ri israelita pan Egipto, kan xeyuqex k'a roma ri q'alajirisanel ri', nubij ri Dios.

¹⁴ Jak'a ri winaqi' richin Israel xa xkiyek royowal ri Dios. Roma ri' ri Dios kan xtuben k'a chi xtiqaqa pa kiwi' ronojel ri kamik e kibanalon, kan xtiqaqa k'a pa kiwi' ri rutojbalil ri kimak y kan xtuya' chik jun bey kik'ix.