Os 11 - Kaqchiquel Bible

Ri rajowabal ri Dios pa ruwi' ri itzel laj rutinamit

¹ Ri Dios nubij: Toq ri winaqi' israelita k'a juba' kek'iy-q'anej, yin kan janila xenwajo'. Keri', kan k'a pan Egipto xenwoyoj-wi ri e achi'el nuk'ajol.

² Toq yin más yenwoyoj, jari' toq rije' más xkijech'ej kan ki' wik'in yin. Xa chikiwech k'a ri Baal ri xekamela'an-wi, xa chikiwech k'a ri wachibel ri xkisujula-wi ri poron chikop.

³ Man rik'in ri' yin kan xentijoj k'a rije' richin yebiyin chupan ri ruchojmilal. Kan xenyuqej k'a chikiq'a'. Jak'a rije' xa man xkiya' ta rejqalen chi kan ja yin ri in chajiyon kichin.

⁴ Kan xenbochi'ij k'a rik'in ajowabel, kan achi'el k'a jun te'ej ri nrejqaj ri ti ral, keri' xinben chike, kan xiqaqa k'a pe kik'in richin chi xentzuq.

⁵ Rije' man xketzolin ta chik k'a pan Egipto, pa ruk'exel ri' xa jak'a ri rey richin Asiria ri xtik'oje' pa kiwi'. Kere' xtikik'uluwachij roma kan man xkajo' ta xtzolej kik'u'x wik'in.

⁶ Ri kamik ri xtiban rik'in espada kan xtoqaqa k'a pa kiwi' ri kitinamit. Kan xkek'is k'a konojel ri winaqi' richin ri kokoj taq kitinamit. Kan xtik'is k'a ronojel roma keri' ri kich'obonik rije'.

⁷ Rokik k'a ri' rije' kan jantape' yemakun chinuwech yin. Stape' kan yenwoyoj, jak'a xa man jun ri najowan ta ninimirisan nuq'ij.

⁸ Rix winaqi' aj-Israel, ¿achi'el ta k'a toq xkixinmalij kan? ¿Kan xkixinjech kami pa kiq'a' ri e etzelanel iwichin? ¿Kan xkitikir kami xtinben chiwe achi'el xinben chike ri tinamit Admá y ri Seboim? Ri wánima kan achike na k'a nuben, kan janila k'a ninjoyowaj iwech.

⁹ Wakami xa man xtinben ta k'a ri nuch'obon ninben roma woyowal. Kan man xtinya' ta chik k'a ruk'ayewal pan iwi'. Roma yin kan in Dios y man in wineq ta. Ja yin ri in loq'olej ri ink'o chi'ikojol rix, roma ri' kan man xtinya' ta chik ri ruk'ayewal pan iwi', nicha' ri Dios.

¹⁰ Rix aj-Israel kan xtitzeqelibej k'a ri Jehová. Rija' kan xtiwajin k'a achi'el nuben jun koj, xtiwajin y ri alk'ualaxela' kan xkek'ark'ot k'a. Xkepe chuwech y xke'el-pe pa qajbel-q'ij.

¹¹ Kan achi'el k'a aj-xik' chikopi' xtikiben richin xke'el-pe pan Egipto. Achi'el k'a nuben ri paloma, keri' xtikiben richin xke'el-pe pan Asiria. Kan xtuben k'a chike chi xkek'oje' chik pa kachoch.

¹² Rije' xa kan xaxe k'a tz'ukuj-tzij nikiben chuwech. Kan ruyon k'a q'oloj nikiben. Ri aj-Judá kan kich'aron k'a kan ki' chire ri Dios. Wakami xa jak'a ri wachibel ri xkitzeqelibej.