Os 10 - Kaqchiquel Bible

Kan xkebewulex ri wachibel ri xeruben ri tinamit Israel

¹ Ri aj-Israel kan achi'el k'a jun tiko'n richin uva ri janila ruxaq k'o. Jak'a ri ruwech ri nuya' xa kan xaxe richin qa rija', achi'el k'a ri ruwech ri nuya', keri' ri porobel ri xeruben-q'anej. Achi'el ri rubanik ri jebelej ruwach'ulew, keri' chuqa' ri paban-abej ri xerupabala-q'anej richin nikiya' kiq'ij.

² Rije' xa kan ruch'aron-ri' ri kánima, wakami kan xtibekitojo' k'a ri kimak. Ri Jehová kan xtuben k'a chi xkewulex-el ronojel porobel ri e kibanon. Kan xkewulex k'a chuqa' ronojel ri wachibel ri e kibanalon richin nikiya' ruq'ij.

³ Rije' xtikibij k'a: Wakami xa maneq qa-rey, kere' xqak'uluwachij roma man xqanimaj ta rutzij ri Dios. Stape' k'o ta qa-rey, ¿achike ta k'a xtitikir xtuben ta pa qawi' rija'?, xkecha'.

⁴ Rije' kan xaxe k'a ri wololinik nikiben, nikibanala' jikibel-tzij ri xa man qitzij ta. Roma ri' ri xkitik-qa rije' xa kan xtibek'ulun k'a pe achi'el jun k'ayilej q'os chukojol ri boloj.

⁵ Ri winaqi' aj-Samaria xa kan xtikixibij-ki', roma ri ruwachibel ri alaj achij wákix ri xk'oje' pa Bet-aven. Kan xkebison k'a roma xa xtuk'uex-el chikiwech. Ri winaqi' y ri sacerdote kan xke'oq' k'a, roma xa xtik'is-el ronojel ri ruwaq'ijaj ri xk'oje' kik'in.

⁶ Jajun ri ruwachibel ri alaj achij wákix xtuk'uex-el pan Asiria. Kan xtok k'a jun sipanik chire ri nimalej rey, keri' ri winaqi' aj-Israel xa xkek'ixbitej k'a. Rije' xa xkek'ixbitej roma ri wachibel ri kibanon.

⁷ Ri rey richin Samaria xa kan xtik'is k'a jumul. Xa kan xtuben k'a el achi'el ri woqoq pa ruwi' ri ya'.

⁸ Ri porobel ri ek'o pa ruwi' taq juyu' richin Aven ri akuchi xemakun-wi ri israelita, xa kan xkewulex k'a el. Ri akuchi xek'oje-wi ri porobel, xa xkebek'iy-pe jalajoj ruwech k'ix. Roma ronojel ri' ri winaqi' xtikibij k'a chire ri juyu' ¡qojawewaj! Y chike ri tanateq juyu' xtikibij: ¡Kixtzaq-pe chiqij!, xkecha'.

⁹ Ri Jehová nubij: Ri aj-Israel kan man e tanel ta richin yemakun, kan kichapon-pe toq xbanatej ri mak pa Guibeá. Kan jantape' k'a ek'o chupan ri mak. Roma ri' ri oyowal kan xkeberuq'i' k'a ri itzel taq winaqi' ri ek'o pa Guibeá.

¹⁰ Kan xtinbenya' k'a rutojbalil-mak pa kiwi' toq yin xtinwajo'. Kan xtikimol k'a pe ki' tinamit chikij richin ninya' rutojbalil chike roma ri kamik ri xekibanala'.

¹¹ Ri Israel achi'el xa ta jun alaj ixoq wákix ri qasan ruq'ij, ri kan niqa' chuwech richin nuch'ey trigo. Jak'a yin kan xtinqasaj chik k'a más ruq'ij y kan xtinya' chirij ruwi' ri che' richin niban arado. Ri Judá jari' ri xtuk'uan ri arado, ri Jacob jari' ri xtipaxin kan ruwi' ri ulew.

¹² Yin xinbij k'a chike ri aj-Israel chi tikitika-qa ri ruchojmilal, richin nikiwachij ajowabel. Tinaba' ri iwulew richin niqaqa jun k'ak'a' tiko'n. Roma xa kan xapon k'a ri q'ij richin yinikanoj chik yin Jehová. Kan keri' k'a tibana' k'a toq xkipe yin richin nonk'utu' chiwech ri ruchojmilal.

¹³ Jak'a rix xa kan ja ri etzelal ri itikon-qa. Kan man jun ruchojmilal ri niwachij, kere' nik'uluwachij roma xa xikuquba' ik'u'x kik'in carruaje richin labal y kik'in ri janila chi aj-labal.

¹⁴ Roma ri' ri winaqi' ri ek'o pa taq itinamit xa kan xtisach k'a kik'u'x. Ronojel ri jay richin tobel ri tz'apen-kij chi tz'aq xa xkewulex, achi'el xuben ri rey Salman chire ri tinamit Bet-arbel chupan ri labal, toq ri teja' xekamisex junan kik'in ri taq kal.

¹⁵ Keri' k'a xtuben chiwe rix winaqi' ri ixk'o pa Betel, keri' xtuben chiwe roma ri nimalej imak. Ri rey richin Israel xa kan kamineq chik k'a toq xtiseqer-pe, ncha' ri Dios.