Wuj Richin ri Q'axanri'il 7 - Kaqchiquel Bible

Ri sipanik kichin ri tata'al

¹ Toq ri Moisés xtane' chubanik ri rachoch ri Dios ri xban rik'in tzieq, xuchikaj juba' aceite chirij richin xujech pa ruq'a' ri Dios. Keri' chuqa' xuya' aceite pa ruwi' ri porobel y chuqa' pa ruwi' ronojel ri samajibel richin ri jay ri'.

² K'ari' xe'apon ri e kablajuj aj-raqen richin ri tzobaj israelita ri xe'ajlan ri winaqi'. Y rije' xkisipaj

³ k'a chire ri Jehová waqi' carreta ri kikuchun-pe rij, y xkiya' kablajuj bóyix: Jun carreta kichin e ka'i' aj-raqen y jujun bóyix chikijujunal. Ronojel xkiya' chuwech ri rachoch ri Dios.

⁴ K'ari' ri Jehová xch'on rik'in ri Moisés y xubij chire:

⁵ Tak'ulu' kan chikiwech rije' ri carreta y ri bóyix, richin ye'ukusex chupan ri samaj ri richin pa wachoch richin molojri'il. Ke'ajacha' k'a pa kiq'a' ri levita, ri kan nik'atzin chike chupan ri kisamaj richin nikik'uaj ri wachoch, xcha'.

⁶ Keri' toq ri Moisés xeruk'ul kan ri carreta y ri bóyix, y xeruya' chike ri levita.

⁷ Xuya' k'a ka'i' carreta rachibilan kaji' bóyix chike ri rijatzul kan ri Guersón, roma jari' ri nik'atzin chike pa kisamaj richin nikik'uaj ri tzieq.

⁸ Chike ri rijatzul kan ri Merarí xuya' kaji' carreta rachibilan waqxaqi' bóyix, roma jari' ri nik'atzin chike pa kisamaj richin nikik'uaj ri ch'aqa' chik ri nik'atzin richin ri jay ri'. Y ri k'o pa kiwi' rije' ja ri Itamar, ri ruk'ajol ri nimalej sacerdote Aarón.

⁹ Jak'a ri rijatzul kan ri Quehat man xuya' ta ki-carreta ni kibóyix, roma rije' toq nikik'uaj ri samajibel richin ri rachoch ri Dios, chuwi-kitele'n nikik'uaj-wi.

Ri sipanik kichin chikijujunal ri tzobaj

¹⁰ Toq xya'ox aceite chirij ri porobel richin xjach pa rusamaj ri Dios, jari' toq ri aj-raqen pa kiwi' ri kablajuj tzobaj xkik'amala-pe ch'aqa' chik sipanik y xkiya' k'a apo chuwech ri porobel ri'.

¹¹ Y ri Jehová xubij chire ri Moisés chi chupan jujun q'ij nikik'en-pe jun sipanik y jujun chike ri aj-raqen pa jujun tzobaj xtikisuj ri sipanik.

^12-83 Jare' ri sipanik ri nik'atzin nuya-apo jun aj-raqen: Jun leq ri banon rik'in saqipueq ri nipajon más juba' oxi' libra; jun k'ojelibel richin kik' ri banon rik'in saqipueq ri nipajon jubama ka'i' libra; y re ka'i' leq re' e nojineq rik'in k'ej chayun xolon aceite rik'in; chuqa' jun k'ojelibel richin pom banon rik'in q'anapueq ri nipajon jubama kaji' onza y re' nojineq rik'in pom. Ronojel re' xetex rik'in ri etabel ri nukusex chupan ri rachoch ri Dios. Chuqa' nuk'en-pe jun nima-alaj achij wákix, jun achij karne'l, jun ti alaj achij karne'l ri jun ti rujuna'; y ronojel re taq chikopi' re' richin kamelabel ri yeporox chijun. Chuqa' nuk'en-pe jun achij tzuntzun richin kuyubel-mak; e ka'i' bóyix, e wo'o' achija' karne'l, e wo'o' achija' tzuntzun, e wo'o' achija' taq karne'l ri jujun kijuna'; y ronojel re' richin ye'ok sipanik richin nuq'alajirisaj chi junan kiwech rik'in ri Dios. Ja kajlabal re winaqi' re' ri yek'amon-pe sipanik y ri q'ij toq nikiya-apo: Chupan ri nabey q'ij, ri xuk'uan-apo ri sipanik, ja ri Nahasón, ri ruk'ajol ri Aminadab, richin ri tzobaj ri richin kan ri Judá. Ri ruka'n q'ij ri xuk'uan-apo ri sipanik, ja ri Natanael ri ruk'ajol ri Suar, richin ri tzobaj ri richin kan ri Isacar. Ri rox q'ij ri xuk'uan-apo ri sipanik, ja ri Eliab ri ruk'ajol ri Helón, richin ri tzobaj ri richin kan ri Zabulón. Ri rukaj q'ij ri xuk'uan-apo ri sipanik, ja ri Elisur ri ruk'ajol ri Sedeúr, richin ri tzobaj ri richin kan ri Rubén. Ri ro' q'ij ri xuk'uan-apo ri sipanik, ja ri Selumiel ri ruk'ajol ri Surisadai, richin ri tzobaj ri richin kan ri Simeón. Ri ruwaq q'ij ri xuk'uan-apo ri sipanik, ja ri Eliasaf ri ruk'ajol ri Reuel, richin ri tzobaj richin kan ri Gad. Ri ruwuq q'ij ri xuk'uan-apo ri sipanik, ja ri Elisamá ri ruk'ajol ri Amihud, richin ri tzobaj ri richin kan ri Efraín. Ri ruwaqxaq q'ij ri xuk'uan-apo ri sipanik, ja ri Gamaliel ri ruk'ajol ri Pedasur, richin ri tzobaj ri richin kan ri Manasés. Ri pa beleje' q'ij ri xuk'uan-apo ri sipanik, ja ri Abidán ruk'ajol ri Guidoní, richin ri tzobaj ri richin kan Benjamín. Ri pa lajuj q'ij ri xuk'uan-apo ri sipanik, ja ri Ahiézer ri ruk'ajol ri Amisadai, richin ri tzobaj ri richin kan ri Dan. Ri pa julajuj q'ij ri xuk'uan-apo ri sipanik, ja ri Paguiel ri ruk'ajol ri Ocrán, richin ri tzobaj ri richin kan ri Aser. Ri pa kablajuj q'ij ri xuk'uan-apo ri sipanik, ja ri Ahirá ri ruk'ajol ri Enán, richin ri tzobaj ri richin kan ri Neftalí.

^84-86 Ja sipanik re' ri xkiya' ri e aj-raqen richin ri tinamit Israel, sipanik ri xkiya-apo ri q'ij toq xya'ox aceite pa ruwi' ri porobel richin xjach chire ri Dios: Kablajuj leq e banon rik'in saqipueq y kablajuj k'ojelibel richin kik' ri e banon rik'in saqipueq. Y yepajon oxk'al libra; y kablajuj k'ojelibel richin pom ri e banon rik'in q'anapueq ri yepajon oxi' libra. Y re' xe'etex rik'in ri etabel ri k'o chupan ri rachoch ri Dios.

⁸⁷ Ri kajlabal ri chikopi' richin sipanik ri yeporox chijun, e kablajuj nima-alaj achija' taq wákix, e kablajuj achija' taq karne'l, e kablajuj nima-achija' taq karne'l ri jun kijuna', kachibilan ri k'ej chayun xolon aceite rik'in. Chuqa' xkiya-apo e kablajuj achija' taq tzuntzun richin ri kamelabel richin ri kuyubel-mak.

⁸⁸ Ri kajlabal ri chikopi' richin ri sipanik richin nuq'alajirisaj chi junan kiwech rik'in ri Dios, e juwineq kaji' bóyix, e oxk'al achija' taq karne'l, e oxk'al achija' taq tzuntzun y e oxk'al nima-alaj achija' taq karne'l ri k'o jujun kijuna'. Jare' ri kisipanik ri xkisuj pa ruwi' ri porobel. Ronojel re' xbanatej toq xya'ox yan aceite pa ruwi' re porobel re' richin xjach pa ruq'a' ri Dios.

⁸⁹ Ronojel mul toq ri Moisés xok-apo chupan ri rachoch ri Dios richin molojri'il richin nibech'on rik'in, xrak'axaj ri ruch'abel ri Dios chiri' pa ruwi' ri tz'apebel-ruwi' ri káxa, chiri' chikikojol ri ka'i' kiwachibel querubín.