Wuj Richin ri Q'axanri'il 36 - Kaqchiquel Bible

Ri xtikichinaj kan ri ixoqi'

¹ Xe'apon k'a rik'in ri Moisés ri e aj-raqen ri ek'o pa kiwi' ri aj-Galaad ri e ruk'ajol ri Maquir, e rijatzul kan ri Manasés. Y ek'o chuqa' chiri' ri e aj-raqen richin ri ch'aqa' chik winaqi' israelita.

² Y ri e rijatzul kan ri Manasés xkibij chire ri Moisés: Ri Jehová xubij chawe chi rik'in sakinik naya' chiqe ri ruwach'ulew. Chuqa' xubij ri xtiberichinaj kan ri Selofhad, ri qach'alal ri xa xtiya'ox kan chike ri e rumi'al.

³ Jak'a wi rije' yek'ule-el kik'in jun chik tzobaj winaqi' israelita, ri ruwach'ulew ri kik'ulman kan nelesex kan chuwi-kiq'a' rije' y niya'ox kan chire ri tzobaj kichin ri kachijil. Keri' xtelesex kan juba' chire ri ronojel ri qichinan kan roj.

⁴ Y pa ruwi' ri', toq napon ri juna' richin nitzolix ronojel, ri ulew ri kichinan kan ri xtani' xtelesex chuwi-kiq'a' ri kachijil; y keri' ri kulew rije' xtelesex kan chire ri tzobaj richin ri kitata', xecha'.

⁵ K'ari' ri Jehová xch'on rik'in ri Moisés y rija' xuteq rubixik chike ri ruwinaq israelita chi ri tzobaj richin ri Manasés kan pa ruchojmilal-wi ri yech'on. Y rija' xubij:

⁶ Jare' ri rubin ri Jehová chike ri rumi'al ri Selofhad: Kan xkek'ule-wi, jak'a kik'in ri aj pa kachoch kan ri e tzobaj richin kan Manasés.

⁷ Ri ruwach'ulew ri xtikichinaj ri jun tzobaj man xtok ta richin jun chik tzobaj. Jak'a ronojel ulew k'o chi nik'oje' kan kik'in ri tzobaj ri xtikichinaj kan.

⁸ Wi ta k'o jun xten richin xabachike tzobaj nuk'ulumaj kan ulew, k'o chi nik'ule' rik'in jun achin ri junan tzobaj; richin keri' kan jebel k'a xtuchajij ri richinan kan ri rutata'.

⁹ Y man jun chire ri ik'uluman kan ri niq'ax ta apo pa jun chik tzobaj. Chikijujunal ri tzobaj richin ri Israel k'o chi nuchajij ri ulew ri xuk'ulumaj kan, xcha'.

¹⁰ Achi'el ri xubij ri Jehová Dios chire ri Moisés, kan keri' xkiben ri e rumi'al kan ri Selofhad.

¹¹ Y keri' ri Mahlá, ri Tirsá, ri Hoglá, ri Milcá y ri Noá xek'ule-qa kik'in ri kik'ajol ri kich'utitata' rach'alal kan ri kitata'.

¹² Y xek'ule' k'a kik'in ri aj pa rachoch ri e rijatzul kan ri Manasés, ri ruk'ajol kan ri José. Y ri ulew ri xkichinaj rije' xok kan kichin ri tzobaj Manasés.

¹³ Jare' ri ruchojmilal ri xuya' ri Jehová chire ri Moisés, richin tubij chike ri ruwinaq pa taq'aj richin ri Moab chuchi' ri raqen-ya' Jordán chuwech-pe ri tinamit Jericó.