Wuj Richin ri Q'axanri'il 35 - Kaqchiquel Bible

Ri ulew richin soq'olbel ri xtikichinaj kan ri e levita

^1-2 Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq ri chiri' pa Moab, chunaqaj ri raqen-ya' Jordán chuwech-pe ri Jericó y xubij: Rix kan k'o chi niya' kan juba' kulew ri e levita richin nikiben-q'anej kokoj taq kitinamit, y chuqa' juba' kulew richin nikiyuq'uj ri kawej ri ek'o chuchi' ri kitinamit. Y ri ulew ri' chikikojol ri kiruwach'ulew ri e kablajuj tzobaj winaqi'.

³ Keri' xtok kan kichin rije' richin nik'oje' kitinamit y chuqa' ri juba' kulew richin akuchi nikiyuq'uj-wi ri kawej.

^4-5 K'o chi niwetaj chi kaji' ruchi' ri ulew y 535 jaj ri pa taq ruxikin ri k'o chi niya' kan. Y ri tinamit k'o chi nik'oje' kan pa nik'aj chire ri ulew y ri soq'olbel k'o chi nik'oje' kan chuchi' ri tinamit.

Ri ruchojmilal pa ruwi' ri kamisanel

⁶ Xtiya' k'a kawineq waqxaqi' tinamit chike ri e levita, y chikikojol ri', waqi' k'a tinamit ri xtok kan richin tobel, richin keri' ri yekamisan, chiri' nibekito-wi-ki'.

⁷ Ronojel ri tinamit ri xtiya' kan chike, e kawineq waqxaqi' tinamit rik'in ri ulew ri ek'o chuchi' ri richin soq'olbel.

⁸ Y kere' ri rujachik ri xtiban chire: Ri tzobaj ri e k'iy winaqi' ek'o chupan k'o chi nikelesaj kan k'iy tinamit richin nikiya' chike ri levita y ri tzobaj ri xa e juba' ok, k'o chi nikelesaj kan juba'. Chikijujunal chike ri tzobaj nikiya' kan juba' kulew richin kitinamit ri e levita, xcha'.

^9-10 Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Toq ik'owisan chik apo ri juk'an ruchi' ri raqen-ya' Jordán, pa ruwach'ulew Canaán,

¹¹ kan ye'icha' kan tinamit richin tobel y chiri' napon-wi jun ri xkamisaj jun chik wineq, ri xa man runojin ta chi nuben.

¹² Y ja tinamit ri' richin tobel, ri akuchi xtuto-wi-ri' ri wineq, chuwech ri nrajo' nuben ruk'exel chire, chiri' k'a nik'oje-wi, k'a toq ri e aj-raqen richin ri tinamit xtikichojmirisaj ri kamik ri xuben.

¹³ Y waqi' tinamit richin tobel ri nicha' kan.

¹⁴ Oxi' k'a tinamit nicha' re kere-pe juk'an chire ri raqen-ya' Jordán y oxi' chik tinamit ri juk'an-apo chire ri raqen-ya' pa ruwach'ulew Canaán.

¹⁵ Re waqi' tinamit re' richin tobel, chiri' nibekito-wi-ki' ri awinaq y chuqa' ri man e awinaq ta ri xa chaq k'ate' xkiben jun kamik.

^16-18 Xabachike ta wineq ri nisokon rik'in jun ch'ich', o rik'in jun abej o rik'in jun che' y ri wineq xsokotej y xtiken, ri xbanon keri' kan jun k'a kamisanel ri' y xtikamisex.

¹⁹ Ri rach'alal ri k'o más naqaj chire ri xkamisex, jari' ri xtiya'on ruk'exel chire ri kamisanel. Toq xtril kan xtukamisaj k'a.

²⁰ Chuqa' wi k'o ta jun wineq nunim jun chik wineq, roma xa itzel nuna' chire, o wi k'o ta jun xuk'eq chirij y xa pa rubanik xuben chire y kan xken,

²¹ o wi xa k'o etzelanik chikikojol y xuya' q'a' chire, y wi re wineq re' kan xken, ri kamisanel ri' chuqa' xtikamisex, roma jun ach'alalri'il.

^22-23 Jak'a wi xa chaq k'ate' xukamisaj ri wineq, y xa maneq etzelanik chikikojol,

²⁴ ri aj-raqen richin ri tinamit richin tobel, xtikiq'et-tzij pa ruwi' ri xbanon ri kamik. Y wi k'o ta jun rach'alal nrajo' nuya' ruk'exel, k'o chi nuben achi'el nuq'alajirisaj ri pixa'.

²⁵ Y ri e aj-raqen richin ri tinamit xtikikol-el ri kamisanel chuwech ri najowan niya'on ruk'exel chire y xtibek'oje' chupan ri tinamit richin tobel. Chiri' k'a xtik'oje-wi k'a toq xtiken na ri nimalej sacerdote.

²⁶ Wi ta ri kamisanel, nel ta el pa ruk'ulba't ri tinamit richin tobel ri akuchi ruto'on-wi-pe-ri',

²⁷ y ri niya'on ruk'exel chire ri kamisanel niberuk'ulu' ta pe ri kamisanel chirij-el ruk'ulba't ri tinamit ri', y ri banoy ruk'exel xtukamisaj k'a ri kamisanel, re' kan man jun xtiban chire.

²⁸ Roma kan chiri' ta pa tinamit richin tobel k'o-wi ri kamisanel, k'a ja toq xtiken ri nimalej sacerdote. K'ari' ri kamisanel xtitzolej chik pa ruwach'ulew ri akuchi eleneq-wi-pe.

²⁹ Ja pixa' re' richin chojmirisabel iwichin rix y pa kiwi' ri iwalk'ual, xabakuchi ta k'o-wi ri iwachoch.

³⁰ Wi k'o ta jun xtukamisaj jun chik wineq y wi xa ta jun ok ri xtz'eton, richin nuya' rutzij, man xtiq'at ta tzij pa ruwi' ri kamisanel ri'. Jak'a wi ka'i-oxi' ri xketz'eton ri xuben ri kamisanel, kan xtiq'at k'a tzij pa ruwi'.

³¹ Chuqa' man jun bey tik'ul méro chuwi-ruq'a' ri kamisanel richin nukol ruk'aslen, roma rija' k'o chi xtelesex-el ri ruk'aslen.

³² Chuqa' man tik'ul méro chuwi-ruq'a' ri animajineq-el chupan ri tinamit richin tobel richin nikolotej, roma rija' xtitzolej chirachoch k'a ja toq xtiken na ri nimalej sacerdote.

³³ Y man tiben chire ri itinamit ri akuchi yixbek'oje-wi richin nok man ch'ajch'oj ta roma ri kamik ri xiben, roma ri kik' nuben chi ri ruwach'ulew nok man ch'ajch'oj ta. Y ri ruwach'ulew xtok ch'ajch'oj k'a toq xtiken na ri kamisanel.

³⁴ Man tiben k'a chire ri ruwach'ulew richin nok man ch'ajch'oj ta, roma akuchi yixbek'oje-wi rix, yin kan pan inik'ajal yik'oje-wi; roma yin Jehová kan ink'o chi'ikojol rix.