Wuj Richin ri Q'axanri'il 34 - Kaqchiquel Bible

Ri ruk'ulba't ri ruwach'ulew

^1-2 Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Toq xkixok chupan ri ruwach'ulew Canaán, jare' k'a ri ruk'ulba't ri ruwach'ulew ri xtiwichinaj kan.

³ Ri pa xokon k'o ri tz'iran ruwach'ulew Sin y ri ruchi' ri ruwach'ulew Edom. Ri pa relebel-q'ij nitiker-pe pa Tzayi-Choy,

⁴ y choj nibe pa qajbel-q'ij, nusutij-rij ri pa xokon chire ri juyu' Acrabim y nuk'owisaj ri tz'iran ruwach'ulew Sin. Napon k'a pa xokon chire ri tinamit Cadés-barnea, ri tinamit Hasar-adar y niq'ax k'a pa tinamit Asmón.

⁵ Y chiri' nusutij-el-ri' y napon k'a chuchi' ri ch'uti'n raqen-ya' richin Egipto. Napon k'a pa xaman y nibek'is kan ri ruchi' k'a chupan ri palou.

⁶ Y ri k'ulba't ri k'o pa qajbel-q'ij chire ri ruwach'ulew ja ri palou.

⁷ Y ri k'ulba't ri k'o pa xaman nitiker-el chuchi' ri palou y napon k'a pa juyu' richin Hor ri k'o pa xaman,

⁸ napon k'a chunaqaj ri tinamit Hamat y niq'ax-el pa jun ulew rubini'an Sedad,

⁹ napon k'a rik'in ri Zifrón y nibek'is k'a pa relebel-q'ij chire ri tinamit Hasar-enán.

¹⁰ Ri k'ulba't ri k'o pa relebel-q'ij nitiker-el pa Hasar-enán y napon k'a pa xokon chire ri tinamit Sefam,

¹¹ y niq'ax-pe pa tinamit Riblá, ri k'o pa relebel-q'ij chire ri ralaxbel-ya' Ain. Choj napon k'a pa taq'aj chuchi' ri choy richin Quinéret,

¹² y niq'ax-qa chupan ri raqen-ya' Jordán. Y nibek'is k'a pa Tzayi-Choy. Jare' ri iwulew y ri ruk'ulba't ri ek'o chi'inaqaj, xcha' ri Jehová.

¹³ Y ri Moisés xuteq rubixik chike ri ruwinaq y xubij chike: Ja ruwach'ulew re' ri xtitalux chiwech y jari' ri xtiwichinaj kan rix ri beleje' tzobaj y chuqa' ri nik'aj tzobaj richin ri Manasés, achi'el ri xtujech ri Jehová chiwe.

¹⁴ Roma ri tzobaj richin kan ri Rubén, ri Gad y ri nik'aj tzobaj richin kan ri Manasés xkik'ulumaj yan ri ulew ri k'o chi xkichinaj.

¹⁵ Ri ulew ri xkichinaj rije' k'o pe kere' chuchi' ri raqen-ya' Jordán, chuwech-pe ri tinamit Jericó ri k'o pa qajbel-q'ij, xcha'.

¹⁶ Ri Jehová xch'on chik rik'in ri Moisés y xubij chire:

¹⁷ Jare' ri kibi' ri achi'a' ri xketalun ri ruwach'ulew: Ri sacerdote Eleazar y ri Josué ruk'ajol ri Nun.

^18-28 Y chuqa' xke'awoyoj jujun aj-raqen pa jujun tzobaj richin nikijech ri ulew, xcha' ri Dios. Jare' k'a ri bi'aj kichin ri aj-raqen: Ri aj-raqen pa ruwi' ri tzobaj ri richin kan ri Judá, ja ri Caleb ri ruk'ajol kan ri Jefuné. Ri aj-raqen richin ri tzobaj ri richin kan ri Simeón, ja ri Samuel ri ruk'ajol ri Amihud. Ri aj-raqen pa ruwi' ri tzobaj ri richin kan ri Benjamín, ja ri Elidad ri ruk'ajol ri Quislón. Ri aj-raqen pa ruwi' ri tzobaj ri richin kan ri Dan, ja ri Buquí ri ruk'ajol ri Joglí. Ri aj-raqen pa ruwi' ri tzobaj ri richin kan ri Manasés, ja ri Haniel ri ruk'ajol ri Efod. Ri aj-raqen pa kiwi' ri tzobaj ri richin kan ri Efraín, ja ri Quemuel ri ruk'ajol ri Siftán. Ri aj-raqen pa ruwi' ri tzobaj ri richin kan ri Zabulón, ja ri Elisafán ri ruk'ajol ri Parnac. Ri aj-raqen pa ruwi' ri tzobaj ri richin kan ri Isacar, ja ri Paltiel ruk'ajol ri Azán. Ri aj-raqen pa ruwi' ri tzobaj ri richin ri kan Aser, ja ri Ahihud ri ruk'ajol ri Selomí. Ri aj-raqen pa ruwi' ri tzobaj ri richin kan ri Neftalí, ja ri Pedahel ri ruk'ajol ri Amihud.

²⁹ Jare' k'a ruchojmilal ri xuya-pe ri Jehová richin nich'ar ri ruwach'ulew toq xtikichinaj kan ri israelita pa ruwach'ulew Canaán.