Wuj Richin ri Q'axanri'il 33 - Kaqchiquel Bible

Ri binen ri xkiben ri israelita

¹ Jare' ri ruchojmilal ri binen ri xkiben ri winaqi' israelita, toq xe'el-pe pa ruwach'ulew Egipto. Kan pa rucholajen k'a xe'el-pe ri aj-labal achi'el ri xkibij ri Moisés y ri Aarón.

² Ri Moisés xutz'ibaj ri bi'aj toq xe'el-pe y ri akuchi ye'uxlan-wi achi'el ri ruchojmilal ri xubij-pe ri Jehová chire. Jare' ri kibinen y ri ruchojmirisaxik xban toq xe'el-pe.

³ Toq xe'el-pe pa tinamit Ramsés, ja ri q'ij wolajuj chire ri nabey ik' chire ri juna', chirij ri q'ij toq ri Jehová xuya' ri Solbelri'il. Kan xe'el k'a pe rik'in ri ruchuq'a' ri Jehová. Y re' kan xq'alajin chikiwech ri aj chiri',

⁴ rokik rije' yekimuq ri nabey taq kik'ajol, roma ja ri Jehová ri xbanon richin xeken toq xuq'et-tzij pa kiwi' ri ki-dios.

⁵ Ri israelita xe'el-pe pa tinamit Ramsés y xe'apon k'a pa tinamit Sucot.

⁶ Y xeri' xe'apon k'a pa ruwach'ulew Etam ri k'o chuchi' ri tz'iran ruwach'ulew.

⁷ Toq xe'el-el pan Etam, xkisutij-rij ri ruwach'ulew Pi-hahirot, ri k'o pa relebel-q'ij chire ri Baal-sefón y xek'oje-qa chuwech-apo ri tinamit Migdol.

⁸ Toq xe'el-el chiri', xkiq'axaj-el ri Kaqa-Palou richin xe'apon k'a pa tz'iran ruwach'ulew y oxi' q'ij xebiyin pa tz'iran ruwach'ulew richin Etam y xebek'oje' kan pa ralaxbel-ya' Mará.

⁹ Y toq xe'el-el chiri', xe'apon pa ruwach'ulew Elim, ri akuchi ek'o-wi kablajuj tz'ukubel taq ya' y e tikil oxk'al lajuj palma.

¹⁰ Chirij ri', xe'el chik el y xebek'oje' chunaqaj ri Kaqa-Palou.

¹¹ Toq xe'el-pe chiri', xebek'oje' kan pa tz'iran ruwach'ulew richin Sin.

¹² Xe'el-pe chiri' y xebek'oje' kan pa ruwach'ulew Dofcá.

¹³ Y chirij ri', xebek'oje' kan k'a pa ruwach'ulew Alús.

¹⁴ Toq xe'el-el pan Alús, xebek'oje' pa ruwach'ulew Refidim, ri akuchi ri winaqi' man xkil ta kiya' richin xkiqum.

^15-35 Chirij ri' rije' xebiyin pa taq jalajoj kiwech ruwach'ulew: ri Sinaí, ri Quibrot-hataavá, ri Haserot, ri Ritmá, ri Rimón-peres, ri Libná, ri Risá, ri Quehelata, ri Séfer, ri Haradá, ri Maquelot, ri Táhat, ri Terah, ri Mitcá, ri Hasmoná, ri Moserot, ri Bené-jaacán, ri Guidgad, ri Jotbata, ri Abroná y ri Esión-guéber.

³⁶ Xe'el-pe chiri' y xebek'oje' k'a pa tz'iran ruwach'ulew richin Sin, chiri' pa tinamit Cadés.

³⁷ Y toq xe'el-el chiri', xebek'oje' k'a pa juyu' richin Hor k'a pa ruk'ulba't ri ruwach'ulew Edom.

³⁸ Toq xtz'aqet yan kawineq juna' ri ke'el-pe ri israelita chupan ri ruwach'ulew Egipto, chupan ri nabey q'ij chire ri ro' ik' chire ri juna' ri', ri sacerdote Aarón xbe-el pa juyu' richin Hor, achi'el bin chire roma ri Jehová y chiri' xken-wi.

³⁹ Y rija' k'o chik 123 rujuna' toq xken.

⁴⁰ Jari' toq ri Arad, rey richin Canaán ri k'o pa xokon xrak'axaj chi xe'apon ri e rijatzul kan ri Israel.

^41-47 Ri israelita xe'el k'a pe chiri' y xebek'oje' pa ruwach'ulew Salmoná, ri Punón, ri Obot, ri Iié-abarim ri k'o pa ruk'ulba't ri Moab, ri Dibón-gad, ri Almón-diblataim, ri Abarim ri k'o pe chuwech ri Nebo.

⁴⁸ Chirij ri' xe'el k'a pe chiri' y xebek'oje' k'a pa juyu' richin Moab chuchi' ri raqen-ya' Jordán, chuwech-apo ri tinamit Jericó.

⁴⁹ Pa ruk'isibel xebek'oje' chuchi' ri raqen-ya' Jordán nitiker-el rik'in ri ruwach'ulew Bet-jesimot, napon k'a pa taq'aj Abel-sitim chiri' pa Moab.

Ri ruk'ulba't ri ulew ri nich'ar pa Canaán

⁵⁰ Ri Jehová xch'on chik rik'in ri Moisés pa taq taq'aj richin Moab, chuchi' ri raqen-ya' Jordán chuwech-apo ri tinamit Jericó y xubij chire:

⁵¹ Kach'on kik'in ri awinaq y tabij chike: Toq xiq'axaj yan ri raqen-ya' Jordán y toq yixok yan apo chupan ri ruwach'ulew Canaán,

⁵² k'o chi xke'ikamisaj k'a konojel ri winaqi' aj chiri'. Chuqa' xke'iwulaj kan ronojel wachibel ri nikiya' kiq'ij, ri ki-dios ri xa e banon rik'in abej o e ya'erisan pa q'aq'. Chuqa' xke'iwulaj kan akuchi nikiya-wi kiq'ij wachibel pa ruwi' taq juyu'.

⁵³ Kan xke'ik'is k'a konojel winaqi' ri ek'o chuwech re ruwach'ulew richin yixk'oje' kan rix chiri', roma ja yin xiya'on chiwe richin niwichinaj kan.

⁵⁴ Ja yin xkich'aron chiwech ri ulew ri xtiwichinaj kan. Xtiwichinaj kan achi'el ri kajlabal ri aj pan iwachoch. Achi'el ri rubanik ri tzobaj kichin ri ite-itata', keri' xtiya'ox kan chiwe.

⁵⁵ Jak'a wi rix man xke'ikamisaj ta ri winaqi' aj chiri', ri winaqi' ri' xkek'oje' kan iwik'in y xa xtuben chiwe achi'el toq nok jun ruk'aj che' pa runaq'-iwech y achi'el jun k'ix toq nok pan ich'akul.

⁵⁶ K'ari' toq xtinben chiwe achi'el ri xinch'ob pa kiwi' rije', xcha' ri Jehová.