Wuj Richin ri Q'axanri'il 32 - Kaqchiquel Bible

¹ Ri e rijatzul kan ri Rubén y ri Gad k'o janila k'iy kawej; y xkitz'et chi ri ruwach'ulew Jazer y ri Galaad k'o akuchi nikiya-wi ri kawej y roma ri' kan xqa' chikiwech richin yek'ase' chiri'.

² K'ari' rije' xech'on rik'in ri Moisés, rik'in ri sacerdote Eleazar y kik'in chuqa' ri e aj-raqen pa kiwi' ri kiwinaq, y xkibij:

³ Ri ruwach'ulew Atarot, Dibón, Jazer, Nimrá, Hesbón, Elalé, Sebam, Nebo y Beón

⁴ kan jebel q'os k'o chuwech, richin yek'oje' ri qawej chiri', roma roj kan e k'iy k'a ri awej ek'o qik'in.

⁵ Roma ri', wi kan oj qajineq chiwech, tiya' k'a ri ruwach'ulew ri' chiqe, y man yojq'ax ta chik apo juk'an chire ri raqen-ya' Jordán, xecha'.

⁶ K'ari' ri Moisés xubij k'a chike: Rix niwajo' yixk'oje' kan re wawe', jak'a ri ch'aqa' chik winaqi' k'o chi yebe pa labal.

⁷ ¿Achike roma nimalij kik'u'x ri qawinaq richin man yeq'ax ta apo chupan ri ruwach'ulew ri xuya' yan chiwe ri Jehová?

⁸ Keri' xkiben ri qate-qatata' toq ojk'o pa Cadés-barnea. Yin xenteq-el ri nachanela' richin xbekinik'oj ri ruwach'ulew.

⁹ Rije' xe'apon k'a ri kojol taq juyu' Escol y k'ari' xbekitz'eta' ri ruwach'ulew. Jak'a toq xetzolej-pe, xa xkiben chike ri qawinaq richin xkimalij kik'u'x richin man xe'ok ta chupan ri ruwach'ulew ri'.

¹⁰ Y ri Jehová xyakatej janila royowal chupan ri q'ij ri'; k'ari' xuya' rutzij y xubij chi

¹¹ man jun chike ri achi'a' ri k'o juwineq kijuna' pa jotol ri xe'el-pe pa ruwach'ulew Egipto, ri xtibekitz'eta' ta ri ruwach'ulew ri xusuj, stape' kan xuya' rutzij chike ri Abraham, ri Isaac y ri Jacob, roma kan man choj ta xkiben chuwech rija'.

¹² Xaxe k'a ri Caleb, ruk'ajol ri Jefuné ri quenizita, y ri Josué, ruk'ajol ri Nun, ri xke'ok, roma xaxe rije' ri choj xkiben chuwech.

¹³ Xyakatej k'a royowal ri Jehová chikij ri qate-qatata' y roma ri' xuben chike chi xek'oje' kawineq juna' pa tz'iran ruwach'ulew, k'a toq xek'is na ri jun sol winaqi' ri man xebiyin ta choj chuwech.

¹⁴ Y wakami ja chik rix ri xixk'oje' kan pa kik'exel ri qate-qatata'. Rix xa ix jun tzobaj winaqi' aj-maki'. Xaxe richin niyek chik jun bey royowal ri Jehová pa qawi'.

¹⁵ Y wi rix man niwajo' ta nitzeqelibej ri Jehová, rija' xtuben chiwe richin yixtzolej chik pa tz'iran ruwach'ulew iwoma k'a rix xkek'is ri qawinaq israelita, xcha'.

¹⁶ K'ari' rije' xebech'on chik jun bey rik'in ri Moisés y xkibij chire: Ri niqajo' roj, taya' q'ij chiqe richin niqaben-q'anej ki-coral ri taq qawej y niqachojmirisaj chik q'anej ri tinamit ri ek'o chik kan, richin yek'oje' kan ri qixjayilal y ri qalk'ual wawe'.

¹⁷ Jak'a roj kan rik'in mitijul xtiqachojmirisaj-qi' richin yojbe pan oyowal y xqojik'o-el chikiwech ri ch'aqa' chik aj-labal, keri' xtiqaben k'a toq xtiqach'ek ri ruwach'ulew ri xkek'oje-wi rije'. Rokik ri' ri aj pa qachoch xkek'oje' kan chupan re tinamit re ek'o wawe', ri ya'on tz'aq chirij richin nikito-ki' chikiwech ri winaqi' ri ek'o chiqanaqaj.

¹⁸ Man xqojtzolej ta chi taq qachoch, k'a toq ri ch'aqa' chik qach'alal xtikichinaj na kan ri ruwach'ulew ri xtikik'ulumaj kan chikijujunal rije'.

¹⁹ Jak'a roj man xqojk'uluman ta kan kik'in rije' ri juk'an-apo chire ri raqen-ya' Jordán, roma xa xqak'ulumaj yan kan re juk'an-pe chire ri raqen-ya', xecha'.

²⁰ K'ari' ri Moisés xubij chike: Rix kan ijikiban-itzij chuwech ri Jehová richin yixbe pan oyowal.

²¹ Chuqa' ijikiban-itzij richin niq'axaj-apo ri raqen-ya' Jordán k'a toq ri Jehová xkerujech na pan iq'a' ri etzelanel qichin.

²² Y toq xech'akatej yan kan, k'ari' xkixtzolej y yixtotej kan chuwech ri ijikiban chuwech ri Jehová y keri' chuqa' chikiwech ri ch'aqa' chik qawinaq. Keri' re ruwach'ulew re' xtok kan iwichin rix, y man jun xkixelesan-el chupan.

²³ Jak'a wi man xtiben ta keri', tiwetamaj k'a richin xixmakun chuwech ri Jehová y k'o jun q'ij xtiqaqa ri ruk'ayewal pan iwi' roma ri imak.

²⁴ Wakami k'a tichojmirisaj-q'anej ri itinamit y chuqa' tibana-q'anej ki-coral ri iwawej, xaxe kan tibana' k'a ri achike ri xibij, xcha' chike.

²⁵ K'ari' ri e rijatzul kan ri Gad y ri Rubén, xkibij: Roj kan xtiqaben k'a achi'el ri xabij chiqe.

²⁶ Jak'a ri qalk'ual, ri qixjayilal y ri qawej xkek'oje' kan wawe' pa ruwach'ulew Galaad.

²⁷ Y roj ri achi'a' xtiqak'uaj-el qakamisabal richin yojbe pa labal; kan pa rubi' ri Jehová xqojbe. Achi'el ri xabij-el chiqe, keri' xtiqaben, xecha'.

²⁸ K'ari' ri Moisés xch'on rik'in ri sacerdote Eleazar y chuqa' kik'in ri Josué y ri e aj-raqen pa kiwi' ri winaqi' israelita, y xubij:

²⁹ Wi ri e rijatzul kan ri Gad y ri Rubén kan kik'uan ri kikamisabal y xkeq'ax junan iwik'in chupan ri raqen-ya' Jordán, richin yixbe pan oyowal achi'el nrajo' ri Jehová, k'a toq rix xtich'ek na ri ruwach'ulew ri', k'ari' xtijech ri ruwach'ulew Galaad chike richin nok kan kichin rije'.

³⁰ Jak'a wi xa man xkeq'ax ta apo rik'in ri kikamisabal junan iwik'in rix, jari' xtiya' kan kulew chi'ikojol rix pa ruwach'ulew Canaán, xcha'.

³¹ K'ari' ri e rijatzul kan ri Gad y ri Rubén xqa' k'a chikiwech chi nikiben achi'el xubij ri Jehová,

³² y chi xtikik'uaj-el ri kikamisabal richin yeq'ax-apo pa Canaán y chuqa' chi xtok kan kichin ri juk'an-pe chire ri raqen-ya' Jordán.

³³ Keri' ri Moisés xuya' chike ri tzobaj richin kan ri Gad, ri Rubén y ri nik'aj tzobaj richin ri Manasés, ri ruwach'ulew ri akuchi xq'aton-wi-tzij ri Sihón rey kichin ri amorreo y ri ruwach'ulew Basán ri akuchi xq'aton-wi-tzij ri rey Og.

³⁴ Ri tzobaj richin kan ri Gad xkichojmirisaj chik q'anej ri tinamit Dibón, ri Atarot, ri Aroer,

³⁵ ri Atarot-sofán, ri Jazer, ri Jogbehá,

³⁶ ri Bet-nimrá y ri Bet-arán y xkiben-q'anej ki-coral ri kawej.

³⁷ Ri tzobaj richin kan ri Rubén xkichojmirisaj chik q'anej ri tinamit Hesbón, ri Elalé, ri Quiriataim y

³⁸ ri Sibmá. Chuqa' xkichojmirisaj chik q'anej ri Nebo y ri Baal-meón y xkijel ri kibi' re tinamit re'.

³⁹ Ri e rijatzul ri Maquir ruk'ajol kan ri Manasés xebek'oje' pa ruwach'ulew Galaad. Y kan xok kan kichin y xekelesaj-el ri amorreo ri ek'o chiri'.

⁴⁰ K'ari' ri Moisés xujech ri ruwach'ulew Galaad chire ri Maquir, richin xkichinaj.

⁴¹ Chuqa' ri Jaír ruk'ajol kan ri Manasés xrichinaj kan jujun kokoj tinamit y xubij Havot-jaír chike.

⁴² Keri' chuqa' xkiben ri e rijatzul kan ri Nóbah. Xkichinaj kan ri tinamit Quenat y ri kokoj rutinamit y xubij Nóbah chike.