Wuj Richin ri Q'axanri'il 3 - Kaqchiquel Bible

Ri sacerdote ri e ruk'ajol ri Aarón

¹ Jare' k'a ri rucholajen ri kijatzul ri Aarón y ri Moisés toq ri Jehová xch'on rik'in ri Moisés, pa ruwi' ri juyu' rubini'an Sinaí.

² Jare' ri kibi' ri e ruk'ajol ri Aarón: Ri nabey rubini'an Nadab; ri ruka'n rubini'an Abihú, ri rox ja ri Eleazar y ri rukaj ja ri Itamar.

³ Y rije' xewiq rik'in ri tzieq richin xe'ok kan sacerdote.

⁴ Jak'a ri Nadab y ri Abihú xeken roma xkikusaj jun chik racheq-q'aq' ri xa man rubin ta ri Jehová chike chi tikikusaj. Ri' xbanatej toq ek'o chiri' pa tz'iran ruwach'ulew Sinaí. Y roma rije' man xek'oje' ta kan kalk'ual, roma ri' ja ri Eleazar y ri Itamar ri xek'oje' kan richin xesamej rik'in ri kitata' jampe' ri xk'ase-el rija'.

Ri kisamaj ri tzobaj richin ri Leví

⁵ Ri Jehová xch'on rik'in ri Moisés y xubij chire:

⁶ Ke'awoyoj k'a ri achi'a' richin ri tzobaj Leví, y ke'aya-apo chuwech ri nimalej sacerdote Aarón, richin chi nikito' chubanik ri samaj.

⁷ Y rije' xke'ok samajela' rik'in ri Aarón y xtikiben chuqa' ronojel samaj ri k'o chupan ri wachoch pa kik'exel ri iwinaq.

⁸ Keri' rije' xkekisamajij ri ch'aqa' chik y xkek'oje' pa kiwi' ri samajibel ri k'o pa wachoch richin molojri'il.

⁹ Xke'ach'er k'a ri levita richin yekito' ri Aarón y ri e ruk'ajol, roma rije' e achi'el jun sipanik ri elesan-pe chi'ikojol rix.

¹⁰ Kan tabana' k'a chi ja ri Aarón y ri e ruk'ajol ri xke'ok sacerdote richin chi ja rije' ri xkepa'e' chuwech ri samaj. Jak'a xabachike wineq ri man levita ta y nijel-apo chubanik ri samaj ri', xtikamisex.

^11-13 Wakami k'a xencha-pe ri levita chikikojol ri awinaq richin ja rije' ye'ok wichin yin. Toq rix k'a ixk'o na k'a pan Egipto, xinben chi xeken konojel ri nabey taq al alaboni' chikikojol ri winaqi' aj chiri'. Jak'a ri nabey taq al alaboni' iwichin rix y ri nabey taq kal ri iwawej xe'ok wichin yin. Wakami k'a ja ri kitzobaj ri Leví ri xok wichin yin pa kik'exel ri alaboni' ri', xcha'.

Toq xe'ajlex ri levita

¹⁴ Ri Jehová xch'on chik jun bey rik'in ri Moisés ri pa tz'iran ruwach'ulew Sinaí y xubij chire:

¹⁵ Ke'awajlaj k'a konojel ri kach'alal-ki' ri ek'o chupan ri tzobaj richin ri Leví, chuqa' ri k'o jun kik' pa jotol, xcha' ri Jehová.

¹⁶ Y ri Moisés kan xuben k'a achi'el ri xbix chire roma ri Jehová. Kan xerajlaj k'a konojel ri tzobaj richin ri Leví.

^17-21 Y jare' k'a ri kibi' ri e ruk'ajol kan ri Leví: Ri Guersón, ri Quehat y ri Merarí. Ri kibi' ri e kik'ajol rije' ri kan k'o chik kixjayilal, kalk'ual y kiy-kimam: Ri e ralk'ual kan ri Guersón ja ri Libní y ri Simí. Ri e ralk'ual kan ri Quehat ja ri Amram, Ishar, Hebrón y ri Uziel. Ri e ralk'ual kan ri Merarí ja ri Mahli y ri Musí.

²² Ri kajlabal konojel ri achi'a' chikikojol ri e rijatzul kan ri Guersón, nitiker-pe kik'in ri taq alaboni' ri k'o jun kik' pa jotol, ek'o e 7,500.

²³ Kan konojel k'a rije' xek'oje-qa chiri' pa qajbel-q'ij chire ri rachoch ri Jehová ri banon rik'in tzieq.

²⁴ Ri aj-raqen pa kiwi' rije', ja ri Eliasaf ruk'ajol ri Lael.

²⁵ Ri kisamaj rije', ja ri ek'o pa ruwi' ronojel re samajibel re': Ri jalajoj ruwech tzieq richin ruwi' ri rachoch ri Dios, ri peraj tzieq ri k'o pan okibel chire ri jay ri',

²⁶ ri peraj tzieq ri rusutin rij ri ruwa-jay, ri peraj tzieq ri k'o pan okibel chire ri ruwa-jay ri akuchi k'o-wi ri porobel richin kamelabel y chuqa' ronojel ri kolo' ri ye'ukusex chire ri jay ri'.

²⁷ Ri e kaji' ruk'ajol kan ri Quehat, xkiben kaji' tzobaj y jare' ri kibi': Ri Amram, ri Ishar, ri Hebrón y ri Uziel.

²⁸ Y ri kajlabal konojel ri achi'a' chikikojol rije' nitiker-pe kik'in ri taq alaboni' ri k'o jun kik' pa jotol ek'o e 8,600.*f1*

²⁹ Kan konojel k'a ri e rijatzul kan ri Quehat xek'oje-qa pa xokon chire ri rachoch ri Dios.

³⁰ Ri aj-raqen ri k'o pa kiwi' rije', ja ri Elisafán ruk'ajol ri Uziel.

³¹ Pa kiq'a' k'a rije' xtik'oje-wi ri káxa richin ri jikibel-tzij, ri mesa, ri taq candil, ri porobel richin kamelabel, ri porobel pom y ronojel ri samajibel ri yek'atzin, y chuqa' ri tzieq ri achoq ik'in ch'aron-wi rupan ri rachoch y ronojel ri samajibel ri nik'atzin chire ri tzieq ri'.

³² Ja ri Eleazar ruk'ajol ri nimalej sacerdote Aarón, ja rija' ri k'o más ruq'ij pa kiwi' konojel ri levita. Y ja rija' ri aj-raqen ri k'o pa kiwi' ri yechojmirisan ri rachoch ri Dios.

³³ Ri e rijatzul ri Merarí, ja ri Mahli y ri Musí.

³⁴ Y ri kajlabal konojel ri achi'a' chikikojol rije', nitiker-pe kik'in ri taq alaboni' ri k'o jun kik' pa jotol, konojel rije' ek'o e 6,200.

³⁵ Ri aj-raqen ri k'o pa kiwi' rije', ja ri Suriel ruk'ajol ri Abihail. Y rije' xek'oje-qa pa xaman chire ri rachoch ri Dios.

³⁶ Pa kiq'a' k'a rije' xk'oje-wi ri tz'alem richin ri rachoch, ri baloj, ri xata't y ri kitz'uyubal ri xata't y ronojel ri ch'aqa' chik ri k'atzinel,

³⁷ chuqa' ri xata't ri ye'ukusex richin nikisutij-rij ri ruwa-jay y ri kitz'uyubal ri xata't ri', ri che' simej kitza'n y ri kolo'.

³⁸ Ri xebek'oje' chuwech-apo ri rachoch ri Dios ri chiri' pa relebel-q'ij, ja ri Moisés y ri Aarón, kachibilan ri e ruk'ajol ri Aarón. Ja rije' k'a xkek'oje' pa ruwi' ri samajibel richin ri rachoch ri Dios pa kibi' ri ch'aqa' chik israelita. Y wi ta k'o jun ri xa man sacerdote ta y nijel-apo chubanik ri kisamaj rije', kan xtikamisex.

³⁹ Ri Moisés y ri Aarón, xekajlaj k'a ri levita achi'el rubin ri Jehová, achi'el ri te'ej-tata'aj, alk'ualaxela' y kiy-kimam. Y ri kajlabal konojel k'a ri achi'a' ri nitiker-el rik'in ri taq alaboni' ri k'o jun kik' pa jotol ek'o k'a e 22,000.

Ri kikolik ri nabey taq al alaboni'

⁴⁰ Ri Jehová xubij chire ri Moisés: Ke'awajlaj ri nabey taq al alaboni' ri ek'o chikikojol ri winaqi' israelita, ri k'o jun kik' pa jotol y tatz'ibaj kan ri kibi' konojel rije'.

⁴¹ Ri levita xke'ok k'a wichin yin pa kik'exel ri nabey taq al alaboni' chikikojol ri rijatzul kan ri Israel. Kan keri' chuqa' kik'in ri kokoj y ri nima'q taq awej kichin ri levita, xke'ok wichin yin pa kik'exel ri nabey taq kal ri kawej ri israelita. Ja yin Jehová ri yibin.

⁴² Ri Moisés kan xuben k'a chi xe'ajlex konojel ri nabey taq al alaboni' ri ek'o chikikojol ri e rijatzul kan ri Israel, achi'el xubij ri Jehová chire,

⁴³ y konojel ri nabey taq al alaboni' ri xtz'ibex kan ri kibi' ri k'o jun kik' pa jotol, ek'o e 22,273.

⁴⁴ Chirij re' xch'on chik pe ri Jehová rik'in ri Moisés, y xubij chire:

⁴⁵ Wakami k'a, tataqa' kik'amik ri levita y ke'ajacha' chuwe yin richin chi ye'ok pa kik'exel ri nabey taq ik'ajol y chuqa' ri kawej ri levita ri kan xke'ok wichin pa kik'exel ri nabey taq kawej ri awinaq. Y keri' ri levita kan xke'ok wichin yin. Yin Jehová ri yibin.

⁴⁶ Jak'a ri kajlabal ri israelita xa xik'o chuwech ri kajlabal ri levita y richin chi yekolotej ri 273 nabey taq al alaboni' israelita,

⁴⁷ kan k'o k'a chi nitoj ka'i' onza saqipueq richin chi yekikol chikijujunal. Y ri saqipueq kan k'o chi nipajon achi'el ri etabel ri nukusex chupan ri wachoch yin.

⁴⁸ Y ri saqipueq ri xtamol richin kolbel kichin ri nabey taq al alaboni', xtajech k'a chike ri Aarón y ri e ruk'ajol, roma ri kajlabal xik'o ruwi' chuwech ri kajlabal ri levita, xcha' ri Jehová.

⁴⁹ Y ri Moisés xumol k'a ri saqipueq richin kolbel kichin ri alaboni' ri xik'o ruwi' ri kajlabal pa ruwi' ri kajlabal ri levita,

⁵⁰ y ri saqipueq ri xumol kan ri Moisés xuben juwineq wolajuj libra achi'el ri etabel ri nukusex chupan ri rachoch ri Jehová.

⁵¹ Ri Moisés xujech k'a ri saqipueq ri' chire ri Aarón y chike ri e ruk'ajol, achi'el xubij ri Jehová chire.