Wuj Richin ri Q'axanri'il 29 - Kaqchiquel Bible

¹ Ri nabey q'ij richin ri ruwuq ik' k'o chi xtiya'ox rutzijol rik'in trompeta y nimol-iwi' richin niya' nuq'ij. Y ri q'ij ri' man jun kowilej samaj niben,

² Xtisuj k'a jun nima-alaj achij wákix, jun achij karne'l y wuqu' nima-alaji' karne'l ri k'o jujun kijuna', y ronojel re' k'o chi kan e tz'aqet. Y re' jun sipanik poron richin kan nijubulin chinuwech.

³ Y rik'in ri wákix, nisuj-apo waqi' libra k'ej chayun xolon rik'in aceite, y rik'in ri achij karne'l, nisuj-apo kaji' libra k'ej chayun xolon rik'in aceite.

⁴ Rik'in jujun nima-alaj karne'l nisuj-apo ka'i' libra k'ej chayun xolon rik'in aceite.

⁵ Chuqa' nisuj-apo jun achij tzuntzun richin nikuyutej imak chinuwech y nijunamatej iwech wik'in.

⁶ K'o chi nisuj ri sipanik ri' rachibilan ri sipanik ri nisuj ronojel ik' y ri sipanik ri nisuj q'ij-q'ij e rachibilan ri sipanik richin jalajoj ruwech ixin y ri vino. Ronojel re sipanik re' richin yeporox y kan nijubulin chinuwech.

Ri q'ij richin nijunamatej chik kiwech rik'in ri Dios

⁷ Ri q'ij lajuj chire ri ruwuq ik' chuqa' niben jun molojri'il richin niya' nuq'ij y kan man xkixwa' ta y man jun kowilej samaj ri xtiben.

⁸ Y k'o chi nisuj-apo sipanik ri niporox chijun. Niya-apo jun nima-alaj achij wákix, jun achij karne'l y wuqu' nima-alaji' achija' karne'l, y ronojel re' k'o chi kan e tz'aqet.

⁹ Rik'in ri wákix, k'o chi nisuj waqi' libra k'ej chayun xolon rik'in aceite y rik'in ri achij karne'l, k'o chi nisuj kaji' libra k'ej chayun xolon rik'in aceite.

¹⁰ Kik'in jujun nima-alaji' karne'l, k'o chi nisuj ka'i' libra k'ej chayun xolon rik'in aceite.

¹¹ Y chuqa' nisuj-apo jun achij tzuntzun richin kuyubel-mak, chinuwech, chuqa' jun kamelabel richin nijunamatej iwech wik'in y ri sipanik richin q'ij-q'ij, e rachibilan ri jalajoj ruwech ixin y ri vino.

Ri nimaq'ij richin ri taq jay banon rik'in ruq'a-che'

¹² Ri q'ij wolajuj chire ri ruwuq ik', niben jun molojri'il richin niya' nuq'ij. Ri q'ij ri' man jun kowilej samaj niben. Y wuqu' k'a q'ij yixnimaq'ijun chinuwech yin.

¹³ Ri nabey q'ij k'o chi nisuj jalajoj kiwech sipanik ri yeporox chijun, richin nijubulin chinuwech. Xtisuj k'a oxlajuj nima-alaji' achija' wákix, ka'i' achija' karne'l, kajlajuj nima-alaji' achija' taq karne'l ri jun kijuna' y ronojel re' k'o chi kan e tz'aqet.

¹⁴ Rik'in jujun wákix, k'o chi niya-apo waqi' libra k'ej chayun ri xolon aceite rik'in. Rik'in ri achij karne'l, k'o chi niya-apo kaji' libra k'ej chayun xolon aceite rik'in.

¹⁵ Kik'in jujun nima-alaji' karne'l, k'o chi niya-apo ka'i' libra k'ej chayun xolon aceite rik'in.

¹⁶ Chuqa' nisuj-apo jun achij tzuntzun richin nikuyutej imak, rachibilan ri sipanik ri niporox chijun q'ij-q'ij, ri jalajoj ruwech ixin y ri vino.

^17-34 Chupan ri waqi' chik q'ij, xke'isuj ri sipanik junan rubanik rik'in ri nabey q'ij, xaxe k'a kan q'ij-q'ij k'o chi niwelesaj kan jujun nima-alaji' achija' wákix. Keri' xtiben chi wuqu' q'ij.

³⁵ Chupan ri ruwaqxaq q'ij nimol chik iwi' y man jun kowilej samaj niben.

³⁶ K'o chi nisuj jun nima-alaj achij wákix, jun achij karne'l y wuqu' nima-alaji' achija' taq karne'l ri k'o jun kijuna', y ronojel re' k'o chi kan e tz'aqet. Ye'isuj k'a richin yeporox chijun y re' kan nijubulin chinuwech yin Jehová.

³⁷ Rik'in ri wákix, ri achij karne'l y ri nima-alaji' achija' karne'l k'o chi niya-apo ri ch'aqa' chik sipanik achi'el ri nubij ri ruchojmilal.

³⁸ Chuqa' nisuj-apo jun achij tzuntzun richin kuyubel-mak, rachibilan ri sipanik ri nisuj q'ij-q'ij, junan rik'in ri jalajoj ruwech ixin y ri vino.

³⁹ Jare' ri sipanik ri ruk'amon chi niya' chuwe. Chuqa' k'o ri sipanik toq k'o nisuj chuwe richin niben y ri sipanik ri nalex-pe pan iwánima, xcha' ri Jehová.

⁴⁰ K'ari' ri Moisés xubij ronojel re' chike ri ruwinaq.