Wuj Richin ri Q'axanri'il 26 - Kaqchiquel Bible

Ri kajlabal ri tinamit Israel

¹ Y toq q'axineq chik k'a ri kamik ri xk'uluwachitej chikikojol rije', jari' toq ri Jehová xch'on chik rik'in ri Moisés y chuqa' rik'in ri Eleazar, ri ruk'ajol kan ri sacerdote Aarón y xubij:

² Tawelesaj k'a pa rucholajen ri kibi' konojel ri achi'a' israelita, ri k'o juwineq kijuna' pa jotol. Kan pa taq tzobaj k'a tawelesaj ri kibi', richin chi q'alaj achike ri tata'aj ri xalk'ualan kan kichin. Tawelesaj k'a pe kibi' konojel ri yetikir yebe pa labal, xcha'.

³ Y ri Moisés y ri sacerdote Eleazar kan xech'on-wi kik'in ri kiwinaq ri chiri' pa taq'aj richin ri Moab, ri k'o chunaqaj ri raqen-ya' Jordán, chuwech-apo ri tinamit Jericó y xkibij k'a chike:

⁴ Ke'iwajlaj k'a ri achi'a' ri k'o juwineq kijuna' pa jotol, kan achi'el ri ch'owen ri xuben ri Jehová qik'in, xecha' rije'. Y konojel ri aj-labal ri e eleneq-pe pa ruwach'ulew Egipto y ri aj-raqen jare':

^5-7 Ek'o k'a e 43,730 aj-labal ri ek'o pa tzobaj richin kan ri Rubén ri nabey ruk'ajol ri Israel. Y ri e aj-raqen pa kiwi' ja ri Henoc, Falú, Hesrón y ri Carmí.

⁸ Y ri Falú k'o k'a jun ruk'ajol ri xubini'aj Eliab,

⁹ y ri Eliab xek'oje' k'a oxi' ruk'ajol ri xkibini'aj Nemuel, Datán y ri Abiram. Y ri Datán y ri Abiram jari' ri yalan yenatex chikikojol ri winaqi' richin ri tinamit, roma ja rije' ri xeyakatej chikij ri Moisés y ri Aarón y kan xekachibilaj chuqa' ri tzobaj winaqi' richin ri Coré toq itzel xech'on chirij ri Jehová,

¹⁰ y ri ruwach'ulew xjaqatej y xerubeq' kan, junan rik'in ri Coré. Y re' xbanatej toq xeken chuqa' ri tzobaj ri xeruk'is q'aq' toq xeken e 250 achi'a'. Re jun banobel re' xbanatej richin chi tiketamaj ri ch'aqa' chik chi man tikiben keri'.

¹¹ Jak'a ri e ruk'ajol ri Coré k'a xek'oje' na kan: Rije' man xeken ta.

^12-14 Ek'o k'a e 22,200 aj-labal chupan ri tzobaj richin ri Simeón, y ri e aj-raqen pa kiwi' rije' ja ri jun chik Nemuel, Jamín, Jaquín, ri Zérah y ri Saúl.

^15-18 Ek'o k'a e 40,500 aj-labal chupan ri tzobaj richin ri Gad, y ri e aj-raqen pa kiwi' rije' ja ri Sefón, ri Haguí, ri Suní, ri Ozní, ri Erí, ri Arod y ri Arelí.

^19-22 Ek'o k'a e 76,500 aj-labal chupan ri tzobaj richin ri Judá, y ri e aj-raqen pa kiwi' rije' ja ri Er y ri Onán, ri xa xeken ri chiri' pa ruwach'ulew Canaán, y ri ch'aqa' chik aj-raqen ja ri Selá, Fares, jun chik Zérah, jun chik Hesrón y ri Hamul.

^23-25 Ek'o k'a e 64,300 aj-labal chupan ri tzobaj richin ri Isacar y ri e aj-raqen pa kiwi' rije' ja ri Tolá, Puvá, Jasub y ri Simrón.

^26-27 Ek'o k'a e 60,500 aj-labal ri tzobaj richin ri Zabulón y ri e aj-raqen pa kiwi' ja ri Séred, Elón y Jahleel.

^28-34 Ek'o k'a e 52,700 aj-labal chupan ri tzobaj richin ri Manasés y ri e aj-raqen pa kiwi' rije' ja ri Maquir, ri Galaad, ri Iézer, ri Hélef, ri Asriel, ri Siquem, ri Semidá, ri Héfer, ri Selofhad ri man xek'oje' ta ruk'ajol y xaxe rumi'al ri xek'oje'. Ri xtani' ri' kibini'an: Mahlá, Noá, Hoglá, Milcá y ri Tirsá.

^35-37 Ek'o k'a e 32,500 aj-labal chupan ri tzobaj richin ri Efraín y ri e aj-raqen pa kiwi' rije' ja ri Sutélah, ri Erán, ri Béquer y ri Tahán.

^38-41 Ek'o k'a e 45,600 aj-labal chupan ri tzobaj richin ri Benjamín y ri e aj-raqen pa kiwi' rije' ja ri Bela, ri Asbel, ri Ahiram, ri Sufam, ri Hufam, ri Ard y ri Naamán.

^42-43 Ek'o k'a e 64,400 aj-labal chupan ri tzobaj richin ri Dan y ri aj-raqen pa kiwi' rije' ja ri Suham.

^44-47 Ek'o k'a e 53,400 aj-labal chupan ri tzobaj richin ri Aser y ri e aj-raqen pa kiwi' rije' ja ri Imná, ri Isví, ri Beriá, ri Héber, ri Malquiel y ri Zérah.

^48-50 Ek'o k'a e 45,400 aj-labal chupan ri tzobaj richin ri Neftalí y ri e aj-raqen pa kiwi' rije' ja ri Jahseel, ri Guní, ri Jezer y ri Silem.

⁵¹ Keri' konojel k'a achi'a' ri e rijatzul kan ri Israel, ri kan utz chi yebe pa labal ek'o k'a e 601,730.

Ri ruchojmilal richin nitalux ri ulew

⁵² Y ri Jehová xch'on chik k'a rik'in ri Moisés y xubij chire:

⁵³ Chikiwech k'a konojel ri achi'a' ri xe'iwajlaj, xtitaluj ri ruwach'ulew richin nikichinaj; y pa rucholajen k'a ri kibi' ri xiwelesaj xtijech-wi chikiwech.

⁵⁴ Ri tzobaj k'a ri janila e k'iy, kan k'iy chuqa' ri ulew ri xtiya' chike y ri tzobaj ri xa e kokoj ok, xa kokoj chuqa' ok ri ulew ri xtiya' chike. Kan achi'el k'a kibanik ri tzobaj ri xe'ajlex.

⁵⁵ Ri ulew ri xtitaluj chikiwech, xtisakij k'a ri rutaluxik y ri winaqi' kan xtikichinaj k'a kan ri ulew richin ri rutzobaj kan ri kitata'.

⁵⁶ Kan achi'el k'a xtel chupan ri sakinik, kan ja wi ulew ri' ri xtikichinaj; keri' xtiben kik'in ri tzobaj e nima'q y ri e kokoj.

Ri kajlabal ri tzobaj richin ri Leví

⁵⁷ Jare' k'a ri kajlabal ri tzobaj ri e rijatzul kan ri Leví; rija' xek'oje' e oxi' ruk'ajol y rije' kibini'an Guersón, Quehat y ri Merarí. Y xkiben oxi' tzobaj.

⁵⁸ Y ri kajlabal ri ch'aqa' chik tzobaj ri kan e rijatzul chuqa' ri Leví ja ri tzobaj libnita, ri hebronita, ri mahlita, ri musita y ri coreíta. Y ri Quehat ruk'ajol ri Leví xralk'ualaj ri Amram.

⁵⁹ Y re Amram re' xk'ule' rik'in jun rijatzul kan ri Leví, ri rubini'an Jocabed, ri xalex toq kan k'a k'o na ri chiri' pan Egipto. Y re ixoq re' xek'oje' e oxi' ral, e ralk'ual ri Amram, ri xkibini'aj Aarón, Moisés y María.

⁶⁰ Y ri Aarón xek'oje' chuqa' ralk'ual y rije' xkibini'aj: Nadab, Abihú, Eleazar y ri Itamar.

⁶¹ Jak'a ri Nadab y ri Abihú jari' ri xeken toq xkisuj jun q'aq' ri man bin ta chike roma ri Jehová.

⁶² Y ri kajlabal ri e rijatzul kan ri Leví ek'o k'a e 23,000, ri k'o jun kik' pa jotol. Rije' man junan ta xe'ajlex kik'in ri ch'aqa' chik tzobaj kichin ri e rijatzul kan ri Israel, roma ri' man xya'ox ta kulew.

⁶³ Ri Moisés y ri sacerdote Eleazar, xekajlaj k'a konojel ri e rijatzul kan Israel ri chiri' pa taq'aj richin ri ruwach'ulew Moab, chunaqaj ri raqen-ya' Jordán, chuwech-apo ri Jericó.

⁶⁴ Y chike konojel ri winaqi' ri e rijatzul kan ri Israel, ri xe'ajlex ojer kan roma ri Moisés y ri nimalej sacerdote Aarón, ri chiri' pa tz'iran ruwach'ulew Sinaí, man jun chik chike ri winaqi' ri' ri k'es ta chupan re jun ajlanik re'.

⁶⁵ Roma ri Jehová rubin chik chike chi rije' xkeken kan ri pa tz'iran ruwach'ulew y xaxe xkek'ase' kan ri Caleb ruk'ajol ri Jefuné y ri Josué ri ruk'ajol ri Nun.