Wuj Richin ri Q'axanri'il 24 - Kaqchiquel Bible

¹ Toq ri Balaam xunabej chi ri Jehová xqa' chuwech toq xuya' urtisanik pa ruwi' ri Israel, man xuben ta chik achi'el ri xuben pa nabey y ri pa ruka'n mul: Man xberuk'ulu' ta chik ri retal. Rija' xa xtzu'un-qa ri pa tz'iran ruwach'ulew,

² y toq xtzu'un-qa ri pa xulan, xutz'et k'a chi ri tinamit Israel e uxlawineq pa taq tzobaj y jari' toq ri Espíritu richin ri Jehová xqaqa pa ruwi' rija' richin xubij:

³ Yin Balaam ri ruk'ajol ri Beor ri ninq'alajirisaj ruch'abel ri Dios. Yin ninbij ri qitzij.

⁴ Yin kan noqaqa-wi ri ruch'abel ri Dios pa nuxikin: Kan nintzu-wi jebel toq kan ninch'ob rij ri Dios. Kan nintzu-wi jebel toq nik'utumej chinuwech ri k'o ronojel uchuq'a' pa ruq'a'.

⁵ Janila e jebel ok ri iwachoch rix rijatzul kan ri Jacob; janila jebel ok niq'alajin ri akuchi ixk'o-wi-qa rijatzul kan ri Israel.

⁶ Kan achi'el jun tinamit ri yuquyik y runuk'uk'en-ri', achi'el jun qejoj ri k'o chuchi' jun raqen-ya'. Rix ix achi'el ri sávila ri kan ja ri Jehová tikiyon-qa, achi'el ri nima'q taq tiox-che' ri yek'oje' chuchi' jun raqen-ya'.

⁷ Rix israelita y ri iwijatzul xkixk'iyer janila, achi'el jun qejoj ri banon-qa chuchi' jun raqen-ya'. Ri i-rey xtok más nim chuwech ri rey Agag, y ri rajawaren kan xtik'oje' ruk'ojlen.

⁸ Ri i-Dios kan rik'in uchuq'a' xixrelesaj-pe pan Egipto. Kan xixrelesaj-pe rik'in uchuq'a' achi'el uchuq'a' ri k'o rik'in ri bóyix. Kan xke'ik'is ri winaqi' richin ri ruwach'ulew ri ye'etzelan iwichin: Kan xtipaq'aq'ej ri kibaqil, y kan xke'ik'is chi ch'ab.

⁹ Rix kan yixuxlan achi'el jun koj; y man jun nik'ason richin. ¡Kan xtiqaqa k'a urtisanik pa kiwi' ri ye'urtisan iwichin: Kan xtiqaqa k'a etzelanik pa kiwi' ri yerayin itzel pan iwi'!

Ri xuq'alajirisaj ri Balaam

¹⁰ K'ari' ri Balac xyakatej janila royowal chirij ri Balaam y roma ri' xupaq'aq'ej ri ruq'a' chirij y xubij chire: Yin xatinwoyoj k'a richin chi nawoyoj itzel pa kiwi' ri e etzelanel wichin, jak'a rat xa jare' oxi' yan mul taya' urtisanik pa kiwi'.

¹¹ Más utz kan jare' katzolej chi'awachoch. Yin kan nuch'obon k'a chi ninya' rajel ruk'exel chawe, jak'a ri Jehová man xuya' ta q'ij chi rat k'o ta ri nak'ul-el, xcha'.

¹² Y ri Balaam xubij chire ri Balac: Yin kere' nubin-pe chike ri achi'a' ri xe'ateq wik'in:

¹³ Stape' ta ri Balac xtuya' ri rachoch chuwe y nojineq rik'in q'anapueq y saqipueq, yin man yitikir ta ninxolq'otij ri nubij ri Jehová chuwe. Pa nuyonil yin man jun yitikir ninben, man jun utzil, ni man jun itzel ri yitikir ta ninben. Kan nubin-wi k'a chi xaxe ri nubij ri Jehová, xaxe ri' ri yitikir ninbij.

¹⁴ Wakami, yin kan jare' k'a xkitzolej-el, richin yibe kik'in ri nuwinaq. Jak'a pa nabey ninbij k'a kan chawe ri achike xtuben re jun tinamit re' chire ri atinamit rat re chiqawech-apo, xcha'.

¹⁵ Y jari' toq ri Balaam xuchop k'a ruq'alajirisaxik ri ruch'abel chike y xubij: Yin Balaam ri ruk'ajol ri Beor, ri ninq'alajirisaj ri ruch'abel ri Dios, yin ninbij ri qitzij.

¹⁶ Yin kan noqaqa-wi ri ruch'abel ri Dios pa nuxikin: Yin kan nuk'ulun etamabel rik'in ri Jehová. Kan nintzu-wi jebel toq kan ninch'ob rij ri Dios: Kan nintzu-wi jebel toq nik'utumej chinuwech ri k'o ronojel uchuq'a' pa ruq'a'.

¹⁷ Yin xintz'et pa wachik', jak'a man jani tik'uluwachitej. Xtik'uluwachitej k'a, jak'a man jani. Chupan-apo ri q'ij ri' xtibek'oje' jun rey chikikojol ri israelita. Xkeruk'is k'a ri aj-Moab, y xkeruk'is ri e rijatzul kan ri Set ri ek'o pa tz'iran ruwach'ulew.

¹⁸ Xtuch'ek ri ruwach'ulew Edom, ja', xtuch'ek ri tinamit Seír, ri etzelanel kichin. Jak'a ri tinamit Israel kan xtik'oje-el kuchuq'a'.

¹⁹ Rik'in ri rijatzul kan ri Jacob xtibek'oje' jun ch'akonel, y xkeruk'is k'a konojel ri e kolotajineq kan chupan ri tinamit Seír.

²⁰ Y k'ari' ri Balaam xtzu'un ri akuchi ek'o-wi ri ruwach'ulew richin ri Amalec y xuq'alajirisaj k'a ri ruch'abel y xubij: Ri pa nabey ja ri winaqi' amalecita ri k'o kejqalen, jak'a ri pa ruk'isibel xa xtipe wululen chikij y xkek'is,

²¹ Y xeri' ri Balaam xtzu'un ri akuchi ek'o-wi ri ruwach'ulew richin ri quenita, y xuq'alajirisaj k'a ri ruch'abel y xubij: Janila kow ri akuchi ixk'o-wi, ri iwachoch e tikil pan abej.

²² Man rik'in ri', xa xtipe wululen chiwij y xkixk'is, toq ri winaqi' aj-Asiria xkixkichop-el,

^23-24 Y ri Balaam xuq'alajirisaj chik k'a y xubij: Ri chiri' pa ruwach'ulew Chipre xkepe winaqi' pa nimalej taq barco, y re winaqi' re' xkekich'ek ri aj-Asiria y ri aj-Éber. Jak'a pa ruk'isibel, ri aj-Chipre xtipe wululen chikij y xkek'is. Xa tijoyowex ruwech ri wineq ri xtik'ase' toq ri Dios xtuben ronojel re',

²⁵ K'ari' xyakatej-el y xtzolej pa ruruwach'ulew; y chuqa' ri Balac xuchop-el ri rubey y xtzolej-el.