Wuj Richin ri Q'axanri'il 23 - Kaqchiquel Bible

¹ Y ri Balaam xubij k'a chire ri Balac: Tipaba-q'anej wawe' wuqu' porobel richin kamelabel y tibana' chuqa' kichojmil wuqu' nima-alaji' achija' wákix y wuqu' achija' karne'l richin kamelabel, xcha'.

² Y ri Balac kan xuben k'a achi'el ri xbix chire roma ri Balaam; y xkisuj k'a jun wákix y jun karne'l pa kiwi' chikijujunal ri porobel.

³ K'ari' ri Balaam xubij chire ri Balac: Kak'oje' kan rik'in re akamelabal re kan chijun k'o chi nik'is, rokik chi yin yibe richin ninbentz'eta', wi rik'in juba' xtinbenk'ulu-wi' rik'in ri Jehová. Y wi rija' k'o ri xtuq'alajirisaj-pe chuwe, yin kan xtinq'alajirisaj chuqa' ronojel chawe rat, xcha'. Y k'ari' ri Balaam ruyon xbe k'a pa ruwi' jun juyu' ri kan man jun k'o chuwech.

⁴ Y ri Dios y ri Balaam kan xkik'ul-wi-ki' y ri Balaam xubij chire ri Dios: Yin kan nubanon k'a kan kichojmil re wakami wuqu' porobel y pa kiwi' chikijujunal k'o kan jujun nima-alaj achij wákix y jujun achij karne'l, xcha'.

⁵ Y ri Jehová kan xubij k'a el chire ri Balaam ri achike chi ch'abel ri ruk'amon chi niberubij y xubij chi titzolin ri akuchi k'o-wi ri Balac, y tubij chire ri xubij-el chire.

⁶ K'ari' ri Balaam xtzolej k'a akuchi k'o-wi kan ri Balac y xberila' chi k'a pa'el na chunaqaj ri porobel, e rachibilan ri aj-raqen pa kiwi' ri aj-Moab.

⁷ K'ari' ri Balaam xch'on k'a y xuq'alajirisaj ri ruch'abel ri Jehová chike y xubij k'a: Rat Balac k'a kela' pa nuruwach'ulew Aram xinabek'ama-wi-pe, Rat rey richin Moab ri atk'o pa taq juyu', ri pa relebel-q'ij xinak'en-pe wawe'. Xabij: Katanpe k'a y ja rat ri kach'on woma yin. Katanpe k'a y tawoyoj itzel chirij ri rutinamit kan ri Jacob, xacha' chuwe.

⁸ Jak'a ¿Achike ta k'a roma yin ninwoyoj itzel pa kiwi'? Roma ri Dios kan man jun achike ta itzel ruya'on pa kiwi'. ¿Achike ta k'a roma yin ninya' sujunik chikij? Roma ri Dios xa man jun achike ta sujunik ri nuya' chikij rije'.

⁹ K'a re wawe' pa ruwi' re jun nimalej abej yentzu-wi-qa. K'a re wawe' pa jotol-el chire re juyu' re' yentz'et-wi-qa. Yin yentz'et chi rije' e jun tinamit ri kan kiyon nikajo' yek'oje'. Rije' kan man e junan ta kik'in ri ch'aqa' chik tzobaj winaqi'.

¹⁰ Rije' e rijatzul kan ri Jacob y man e ajlatel ta, achi'el ri poqolaj. Man jun etamayon ri e janipe' rije'. Tiya' q'ij chuwe chi toq xtapon ri nukamik, kan in richin ta ri Dios, tiya' q'ij chuwe chi yinuxlan ta el, kan achi'el jun ri choj ruk'aslen.

¹¹ Kan jari' toq ri Balac xuch'ojij chire ri Balaam y xubij: ¿Achike k'a ri naben wik'in rat? Yin xatink'en-pe re wawe' richin nawoyoj itzel pa kiwi' ri etzelanel wichin y rat xa xaya' urtisanik pa kiwi', xcha'.

¹² Y ri Balaam xubij k'a chire ri Balac chi ri xtubij ri Jehová chire xaxe ri' ri xtitikir xtubij.

¹³ Y kan jari' toq ri Balac xubij chik chire: Jo' chuwij ri akuchi xa kan xaxe-ok juba' chire ri tinamit Israel ri xtatz'et y jari' ri tak'utuj itzel oyonik pa kiwi', xcha'.

¹⁴ K'ari' ri Balac xuk'uaj-el ri Balaam pa jun ulew rubini'an Sofim, pa ruwi' ri juyu' Pisgá. Y kan xaxe xe'apon chiri', ri Balac kan jari' xerupaba' chik q'anej wuqu' porobel richin kamelabel y xusuj jun nima-alaj achij wákix y jun achij karne'l pa kiwi' chikijujunal ri porobel richin niporox chijun.

¹⁵ K'ari' ri Balaam xubij chire ri Balac: Kak'oje' na kan rik'in re akamelabal y yin yibech'on na chik rik'in ri Dios, xcha'.

¹⁶ Y ri Jehová kan xuk'ut na wi ri' chuwech ri Balaam y xubij chire chi titzolej rik'in ri Balac y tubij chire ri ch'abel ri xubij-el chire.

¹⁷ Y keri' rija' xtzolej k'a akuchi k'o-wi kan ri Balac y xberila' k'a pa'el na rik'in ri kamelabel, e rachibilan ri achi'a' aj-raqen ri ek'o pa ruwi' ri Moab. Y ri Balac xuk'utuj k'a chire ri achike ri xubij-pe ri Jehová chire.

¹⁸ Y ri Balaam xuq'alajirisaj k'a ri ruch'abel chike y xubij k'a: Kan tawak'axaj k'a rat Balac, Rat, ruk'ajol ri Sipor, tawak'axaj k'a jebel ri achike xtinbij chawe.

¹⁹ Ri Dios man junan ta rubanik rik'in jun achin y nutz'uk ta tzij, rija' man wineq ta richin chi nujel ruch'obonik. Ronojel ri nusuj rija', kan nuben-wi. Toq nich'on k'a rija', kan nibanatej-wi.

²⁰ Yin kan nuk'ulun-wi-pe ch'abel richin chi ninya' urtisanik pa kiwi'. Ri Dios kan ruya'on-wi-pe urtisanik y yin man yitikir ta ninq'et.

²¹ Man jun itzel banobel ri tz'eton ta chikij ri e rijatzul kan ri Jacob; man jun ruk'ayewal ri niqaqa ta chikij ri israelita. Roma ri Jehová ri ki-Dios kan k'o-wi kik'in; rije' kan nikibij k'a chi ri Dios kan ja wi ri' ri ki-rey.

²² Ja Dios ri' ri xe'elesan-pe pan Egipto rik'in uchuq'a'. Kan xerelesaj-pe rik'in uchuq'a' achi'el uchuq'a' ri k'o rik'in ri bóyix.

²³ Chirij ri Jacob man jun ri nitikir, man jun itzinik ri nik'atzin. Wakami xa ruk'amon chi nibix chikij: Titzu' k'a rix winaqi' ri rubanon ri Dios kik'in rije'.

²⁴ Rije' kan xkebeyakatej-pe achi'el jun koj ri janila ruchuq'a'. Rije' man ye'uxlan ta, k'a toq k'o na jun ri kichapon. Man nikiq'et ta ki' k'a toq kik'uxun ri etzelanel kichin, y kiqumun chik kikik'el konojel ri xekikamisaj,

²⁵ K'ari' ri Balac xubij chire ri Balaam: Wi xa man nawajo' nawoyoj itzel pa ruwi' re tinamit re', utz k'ari', xaxe man tawurtisaj chuqa', xcha' chire.

²⁶ Y ri Balaam xubij chik chire: Yin xinbij yan chawe chi ronojel ri nubij ri Jehová chuwe, jari' ri ninbij, xcha'.

²⁷ Y ri Balac xubij chik chire ri Balaam: Rik'in juba' man xqa' ta chuwech ri Dios chi nawoyoj itzel pa ruwi' ri Israel re wawe'. Nink'utuj k'a utzil chawe richin yabe chuwij y yojbe juk'an chik. Rik'in juba' chiri' ri Dios kan nuya' q'ij chawe, xcha' chire.

²⁸ Y ri Balac xuk'uaj k'a ri Balaam pa ruwi' jun chik rutza'n juyu' rubini'an Peor, ri akuchi kan q'alaj-wi ri tz'iran ruwach'ulew.

²⁹ Y ri chiri', ri Balaam xubij chire ri Balac chi tupaba' chik wuqu' porobel y chi tubana' kichojmil wuqu' nima-alaji' achija' taq wákix y chuqa' e wuqu' achija' karne'l.

³⁰ Ri Balac kan xuben k'a achi'el xbix chire.