Wuj Richin ri Q'axanri'il 18 - Kaqchiquel Bible

Ri samaj ri nikiben ri sacerdote y ri levita

^1-2 Y ri Jehová xch'on chik rik'in ri Aarón y xubij chire: Tataqa' kik'amik ri ch'aqa' chik levita y ja rije' ri xketo'on awichin, rokik rat y ri e ak'ajol yixsamej-apo chupan ri wachoch. Kan ja rat, ri e ak'ajol y ri ch'aqa' chik levita ri xkixejqalen ronojel ri man utz ta nibanatej chupan ri wachoch. Jak'a ronojel ri man utz ta ri xtikiben ri sacerdote, kan xaxe k'a rat y ri e ak'ajol ri xkixejqalen.

³ Roma ri' rije' kan k'o k'a chi nikiben ronojel ri nabij rat; kan tikibana' ri samaj chupan ri wachoch; jak'a man kejel-apo chupan ri jay akuchi man jun wineq nok-apo, roma kan ch'aron chuwe yin, y chuqa' man tikichop ri porobel-pom, richin chi man yeken ta rije' ni rix chuqa'.

⁴ Rije' xkesamej k'a awik'in y pa kiq'a' rije' xtik'oje-wi ronojel ruwech samaj richin ri wachoch. Y man jun wineq ri xa man richin ta ri itzobaj rix, ri xtijel ta apo iwik'in chubanik ri samaj ri'.

⁵ Jak'a rix ri k'o chi yixpa'e' chuwech ri samaj richin ri wachoch yin y chuqa' ri samaj rik'in ri porobel, richin chi man niyakatej ta chik woyowal pa kiwi' ri iwinaq israelita.

⁶ Roma ri levita xencha-pe chikikojol ri winaqi' richin ri tinamit, richin jun sipanik chiwe rix; kan e jachon k'a chuwe yin richin chi nikisamajij ri wachoch.

⁷ Rat y ri e ak'ajol ri xkixbanon ri samaj richin sacerdote; kan xtiben k'a ri samaj rik'in ri porobel y ri samaj ri k'o chi niban chirij-apo ri tasbel rupan ri wachoch. Jare' k'a ri isamaj rix y ja yin ri xisipan chiwe richin niben. Jak'a xabachike ta jun chik wineq ri xtijel-apo iwik'in chubanik ri samaj, kan xtiken, xcha' ri Dios.

Ri nikiq'axbej-ki' ri sacerdote

⁸ Xeri' ri Jehová xubij chuqa' chire ri Aarón: Yin kan nuya'on pan aq'a' ronojel ruwech sipanik ri nikijech chuwe ri awinaq israelita. Y re' kan nuya'on chawe rat y chike ri ak'ajol richin chi rik'in re' niq'axabej-iwi'. Y re' kan kere' xtuben-apo richin jantape'.

⁹ Rat y ri e ak'ajol kan xtik'en-wi k'a juba' chire ronojel ri kamelabel richin kuyubel-mak, ri sipanik richin ri xajanbel y ri sipanik richin jalajoj ruwech ixin. Y ri juba' ri xtik'en, ja ri juba' chire ri man yeporox ta. Ronojel k'a re sipanik re', kan e ch'aron chuwe yin y roma ri' kan awichin k'a rat y kichin chuqa' ri e ak'ajol.

¹⁰ Ronojel k'a re' kan chuwa-jay chire ri wachoch ri xtitej-wi. Konojel ri achi'a' ri yesamej pa wachoch kan xtikitej chuqa' re sipanik re'; kan keri' k'a tibana' chire ri ch'aron chuwe yin.

¹¹ Chuqa' ri sipanik ri xtok awichin rat, ja ri ch'aqa' chik sipanik ri nikiya' ri awinaq: Ri sipanik ri niyak chikaj y ri nisilox chinuwech. Re' kan awichin-wi rat y kichin ri awalk'ual ri k'a ek'o na awik'in. Konojel k'a ri ek'o pan awachoch ri kan e ch'ajch'oj, utz chuqa' nikitej. Re' kan kere' k'a xtuben-apo richin jantape'.

¹² Kan ronojel k'a chire ri nabey ruwech tiko'n ri nikiya-pe chuwe yin, kan jari' ri xtinya' chuqa' chiwe rix. Ninya' k'a chiwe ri más utz chire ri aceite olivo, ri más utz chire ri ruya'al uva y ri más utz chire ri jalajoj ruwech ixin.

¹³ Ronojel ri nabey taq ruwech ri tiko'n ri nuya' ri kulew ri awinaq, ri nikisuj chuwe yin, re' kan xtok-wi awichin rat; y konojel k'a ri ek'o pan awachoch ri kan e ch'ajch'oj utz chuqa' nikitej.

¹⁴ Ronojel k'a ri nikiya' ri awinaq ri kan ch'aron chuwe yin, kan xtok chuqa' awichin rat.

¹⁵ Kan konojel k'a ri nabey taq al, chi winaqi' chi chikopi', kan k'o chi yejach chuwe yin y ri' xke'ok chuqa' awichin rat. Xaxe k'a ri nabey taq al alaboni' y ri e nabey taq al achija' chikopi' ri man e ch'ajch'oj ta, kan k'o chi naya' q'ij richin yekol; kan k'o ri niya'ox kan pa kik'exel.

¹⁶ Ri kolbel kichin, nitoj k'a toq kitz'aqatisan chik jun kik'. K'o chi nitoj kan ka'i' onza saqipueq, y k'o chi netex rik'in ri etabel ri nukusex chupan ri wachoch yin.

¹⁷ Jak'a ri nabey taq al kichin ri wákix, ri karne'l y ri tzuntzun, re' man naya' ta q'ij richin chi yekol, roma re' kan e ch'aron richin ye'ok wichin yin. Y ja ri kikik'el ri chikopi' ri xtiya' pa ruwi' ri porobel y xtiporoj chuqa' ronojel ri kiq'anal ri chikopi' ri'. Y re' jare' jun sipanik ri nijubulin chinuwech yin.

¹⁸ Jak'a ri kich'akul ri chikopi' ri' ri yesilox chinuwech yin, nok k'a awichin rat, achi'el ri ruwa-ruk'u'x y ri ra' ri k'o pa kijkiq'a' ri chikopi' ri' ri yesuj chuwe yin, kan ye'ok chuqa' awichin rat.

¹⁹ Kan ronojel k'a ri sipanik ri nisilox chinuwech, ri nikiya' ri awinaq, re' kan awichin k'a rat y kichin chuqa' ri awalk'ual, ri kan k'a ek'o na awik'in y re' kan kere' k'a xtuben-apo richin jantape'. Re' kan xtok k'a jun jikibel-tzij chinuwech yin, awichin rat y kichin chuqa' ri awijatzul, y man jun k'a xtijalo richin, xcha'.

²⁰ Y ri Jehová xubij chuqa' chire ri Aarón: Rix man xtiwichinaj ta k'a ulew, kan man xkixichinan ta k'a junan kik'in ri iwinaq. Roma chikikojol rije', rix kan ja yin ri xkiniwichinaj.

²¹ Jak'a ri winaqi' levita, yin ninya' chike ronojel ri numol-ri' ri jun chire ri lajuj ri nikiya-pe konojel ri awinaq; y jare' ri nikichinaj rije', roma nikiben ri samaj ri chiri' pa wachoch richin molojri'il.

²² Wakami k'a man jun bey chik kejel-apo chunaqaj ri wachoch ri ch'aqa' chik awinaq ri man e levita ta, richin chi man kemakun y yeken.

²³ Xa kan xaxe k'a ri levita xkesamej ri pa wachoch. Re jun ruchojmilal re' kan kere' k'a xtuben-apo richin jantape' pa kiwi' ri e kijatzul kan rije'; kan man xke'ichinan ta wi junan kik'in ri ch'aqa' chik kiwinaq.

²⁴ Roma ri' yin kan xinbij-wi chike rije' chi pa ruk'exel ulew yin ninya' chike ronojel ri numol-ri' ri jun chire ri lajuj ri nikiya' chuwe yin ri awinaq achi'el jun sipanik, xcha' ri Dios chire ri Aarón.

²⁵ Ri Jehová xch'on chik rik'in ri Moisés y xubij chire:

²⁶ Kere' tabij chike ri levita: Toq rix xtik'ul kan ronojel ri nimolotej chire ri lajuj ri xtikiya' ri iwinaq, ri ninya' yin chiwe richin niwichinaj, rix kan niwelesaj jun chire ri lajuj chire ronojel ri xtik'ul y jari' ri nisuj chuwe yin Jehová.

²⁷ Ri ch'aqa' chik iwinaq nikisuj chuwe ri kisipanik richin ri jalajoj ruwech ixin y ri sipanik richin ri vino. Roma ri' rix kan xtiben achi'el nikiben rije' rik'in ri sipanik ri'.

²⁸ Y rik'in re kere', rix kan xtiya' chuqa' ri isipanik chuwe yin, ri nik'en kan chire ronojel ri nik'ul ri jun chire ri lajuj ri nikiya' ri iwinaq. Ri sipanik k'a ri xtik'en-pe chuwe yin Jehová, xtijech k'a chire ri Aarón richin chi jari' ri nok richin rija'.

²⁹ Rix levita k'o k'a chi nik'en-pe chuwe yin Jehová, ri kan jebel-jebel chire ri nik'ul rix, jari' ri nich'er richin chi niya' chuwe yin.

³⁰ Toq xtisuj k'a ri isipanik chuwe yin, ri más jebel chire ronojel ri nik'ul, kan xtiben k'a chire achi'el itiko'n rix.

³¹ Y ri xtik'oje' kan iwik'in, jari' utz nitej rix y ri e aj pan iwachoch xabakuchi ri niwajo-wi. Ronojel k'a ri xtik'oje' kan iwik'in, jari' ri xtok achi'el iwajel, roma ri samaj ri niben pa wachoch.

³² Toq xisuj yan k'a ri sipanik ri más jebel chuwe yin; kan utz chik k'a nitej ri nik'oje' kan iwik'in y man jun mak xtiwejqalej. Richin keri' kan xtok ch'ajch'oj ri kisipanik ri iwinaq y kan man xkixken ta, xcha'.