Wuj Richin ri Q'axanri'il 17 - Kaqchiquel Bible

Toq ri ruch'ame'y ri Aarón xkotz'ijan

¹ Chirij ronojel re' ri Jehová xch'on chik k'a rik'in ri Moisés y xubij chire:

² Kach'on kik'in ri awinaq y tabij chike chi ri e kablajuj aj-raqen pa kiwi' ri kablajuj tzobaj winaqi' nikik'en-pe jujun kich'ame'y. K'ari' tatz'ibaj kan ri kibi' ri aj-raqen ri' chirij ri kich'ame'y.

³ Y chirij ri ch'ame'y richin ri tzobaj richin ri Leví xtatz'ibaj k'a ri rubi' ri Aarón. K'o k'a chi numol-ri' ronojel ri ch'ame'y ri ruk'exewach chikijujunal ri aj-raqen pa kiwi' ri tzobaj.

⁴ Y k'ari' ri ch'ame'y ri' xke'ak'uaj-apo ri pa wachoch, chuwech-apo ri káxa richin ri nujikibel-tzij, ri akuchi nink'ut-wi-wi' chiwech.

⁵ Y ri ch'ame'y ri richin ri achin ri xtincha', xtijotayin chi'anin, y rik'in ri' xtintz'apej kichi' ri winaqi' ri jantape' yeyakatej chuwij, xcha'.

⁶ Y keri', ri Moisés xch'on k'a kik'in ri ruwinaq, y ri e aj-raqen richin ri kitzobaj xkik'en-pe ri kich'ame'y. Chi kablajuj tzobaj xoruk'ulu-ri', jun k'a ch'ame'y ri xel-pe pa jujun tzobaj. Y ri ruch'ame'y k'a ri Aarón kan xok'ulun chuqa' chikikojol ri ch'ame'y ri'.

⁷ Y xeri' ri Moisés xeberuya-apo ri ch'ame'y chuwech ri Jehová chupan ri rachoch.

⁸ Y ri ruka'n q'ij toq ri Moisés xapon ri pa rachoch ri Jehová y xok-apo ri akuchi k'o-wi ri káxa, jari' toq xutz'et chi ri ch'ame'y ri ruk'exewach ri tzobaj richin ri Leví, ri k'o rubi' ri Aarón chirij, xjotayin-pe, xuya' rusi'j y ek'o ri man jani kebos y ek'o ri e bosneq chik y kan xeruya' ruwech ri kan cheq' chik. Almendra k'a ri xeruya' ri ch'ame'y ri'.

⁹ Xeri' ri Moisés kan jari' xerelesaj-pe ronojel ri ch'aqa' chik ch'ame'y ri k'o chuwech ri Jehová y xuk'ut chikiwech konojel ri winaqi'. Y rije' kan xekitzu' k'a y k'ari' chikijujunal ri aj-raqen xkik'uala-el ri kich'ame'y.

¹⁰ Y jari' toq ri Jehová xubij chik chire ri Moisés: Tatzolij chik apo ri ruch'ame'y ri Aarón chuwech ri káxa richin ri nujikibel-tzij, richin keri' nik'oje' kan jun retal chikiwech ri iwinaq pa kiwi' ri kan itzel yech'on chuwij. Re meyel banobel re' kan xtuben chi man chaq kech'on chuwij richin chi man xkeken ta, xcha'.

¹¹ Y ri Moisés kan xuben k'a achi'el ri xchilabex chire roma ri Jehová.

¹² K'ari' ri winaqi' xech'on k'a rik'in ri Moisés y xkibij: Wakami xa ja ajk'a re' xqojken re'. Xa jare' xqojk'is y man jun chik xqojtikir xtiqaben.

¹³ Roma xabachike k'a ri xtijel-apo rik'in ri rachoch ri Dios ri akuchi k'o-wi ri ruch'ame'y ri Aarón kan xtiken. ¿Xa qonojel ajk'a xqojken ri'?, xecha'.