Wuj Richin ri Q'axanri'il 14 - Kaqchiquel Bible

¹ Y roma ri' ri winaqi' israelita xesik'in chi oq'ej y chijun ri chaq'a' ri' janila xe'oq'.

² Y konojel k'a xkichop yech'on chirij ri Moisés y chuqa' chirij ri Aarón y nikibila' k'a: Más ta utz xa ta xojken kan pan Egipto, o re wawe' pa tz'iran ruwach'ulew.

³ ¿Achike roma toq ri Jehová nrajo' yojrukusaj chupan ri jun ruwach'ulew ri'? Roma xaxe nibeqaliba-qi' chutza'n espada. Y ri qixjayilal y ri qalk'ual ri ek'o, xaxe richin yebeqajacha' kan pa kiq'a' ri e etzelanel qichin. Más utz nuben chiqe roj wi yojtzolej chik el pan Egipto.

⁴ Tiqakanoj k'a jun chik aj-raqen ri nik'oje' pa qawi', richin yojtzolej chik pan Egipto, xecha'.

⁵ Y roma ri xkak'axaj ri Moisés y ri Aarón, rije' xkiqasaj-qa-ki' k'a pan ulew ri chiri' chikiwech ri kiwinaq.

⁶ Y ri Josué ri ruk'ajol ri Nun y ri Caleb ri ruk'ajol ri Jefuné, xkiretz k'a ri kitziaq chikij roma bis.

⁷ K'ari' xech'on kik'in konojel ri winaqi' y xkibij chike: Ri ruwach'ulew ri xbeqetamaj kan, kan xbeqanik'oj kan chijun y xqatz'et kan chi kan jebel-wi,

⁸ y nuya' ronojel ruwech tiko'n. Wi utz niqaben chuwech ri Jehová, rija' kan xtik'o k'a el chiqawech richin yojruk'uaj chupan ri ruwach'ulew ri' y xtujech pa qaq'a'.

⁹ Ri nrajo' ja ri man kixyakatej chirij ri Jehová, chuqa' man tixibij-iwi' chikiwech ri winaqi' ri richin ri ruwach'ulew ri', roma roj kan chaqba' xkeqach'ek, roma rije' kan man jun chik xtito'on ta kichin, jak'a roj kan k'o ri Jehová qik'in, xecha'.

¹⁰ Y kan jari' toq konojel ri winaqi' ri kimolon-ki' chiri', xkich'ob richin yekikamisaj chi abej, y kan jari' toq ri Jehová xuk'ut-ri' rik'in ruq'ij-ruk'ojlen pa ruwi' ri rachoch ri richin molojri'il chikiwech konojel rije'.

Ri Moisés nich'on koma ri ruwinaq

¹¹ Ri Jehová xubij chire ri Moisés: ¿K'a jampe' k'a xketane' re winaqi' richin yinketzelaj? ¿K'a jampe' xtapon ri q'ij richin chi rije' nikikuquba' ta kik'u'x wik'in, stape' rije' kan kitz'eton ri meyel taq banobel ri nubanon chikiwech?

¹² Y yin xtinben chi man xke'ok ta chupan ri ruwach'ulew, roma kan xtinya-pe jun nimalej yabil pa kiwi' rije', richin yeken y yek'is. Jak'a rat xkatikeriban jun chik k'ak'a' tinamit ri más nim y janila ruchuq'a' chikiwech ri ek'o wakami, xcha'.

¹³ Jak'a ri Moisés xubij chire ri Jehová: Rat xa kan rik'in k'a ri nimalej awuchuq'a' xawelesaj-pe re tinamit chiri' pan Egipto y toq rije' xtikak'axaj k'a ri nawajo' naben rik'in ri atinamit, xtikelesaj k'a rutzijol.

¹⁴ Rije' xtikitzijoj k'a chike ri winaqi' aj-Canaán. Y ri winaqi' aj-Canaán kak'axan chik k'a chawij rat, Jehová, chi kan atk'o chiqakojol roj y naya' q'ij chiqe richin chi yojtzijon awik'in; y kak'axan chi ri sutz' k'o pa qawi' ri paq'ij y toq niqachop binen, jari' ri nuk'uan qichin y ri chaq'a' nusaqirisaj ri qabey.

¹⁵ Jak'a wi rat kan xke'ak'is re tinamit re' pa jun bey, ri winaqi' richin ri ch'aqa' chik ruwach'ulew ri kak'axan jebel chawij rat, xtikibij:

¹⁶ Ri ki-Dios re tinamit re' man xtikir ta xeruyuqej k'a pa ruwach'ulew ri rusujun chike y roma ri' xerukamisaj kan chupan ri tz'iran ruwach'ulew, xkecha'.

¹⁷ Wakami, nink'utuj k'a jun utzil chawe. Kan tak'utu' ronojel ri yatikir naben, kan achi'el ri asujun-pe, chi kan naben qoma roj,

¹⁸ roma rat kan man chi'anin ta nipe awoyowal, k'o janila joyowan-wech awik'in. Nakuy kimak ri itzel taq kibanobal y nakuy kimak ri nikipaba-ki' chawech, stape' kan naya' rutojbalil pa kiwi' ri kan e banoy richin ri etzelal y kan k'a niqaqa na pa kiwi' ri kalk'ual, ri kiy-kimam y numej k'a pa rukaj sol winaqi'.

¹⁹ Roma nim ri ajowabel ri k'o awik'in, nink'utuj utzil chawe chi takuyu' kimak re winaqi' re', kan achi'el ri abanon-pe kik'in toq k'a ek'o na pan Egipto, k'a keri' na tabana' kik'in re wakami, xcha'.

Ri Jehová nuya' ruk'ayewal pa ruwi' ri tinamit Israel

²⁰ K'ari' ri Jehová xubij chire ri Moisés: Roma ri ch'abel ri xabij chuwe, roma ri', yin xinkuy yan k'a ri kimak rije'.

²¹ Man rik'in ri', yin ninbij chi kan qitzij chi ri nuk'ojlen kan xtiq'alajin chijun re ruwach'ulew.

²² Jak'a konojel re winaqi' re' kitz'eton ri nuk'ojlen; kitz'eton ronojel ri nima'q taq banobel ri xinben pan Egipto; kitz'eton chuqa' ri xinben ri chiri' chupan ri tz'iran ruwach'ulew. Man rik'in ri' xa xinkitejtobej yan lajuj bey y man nikinimaj ta nutzij.

²³ Y roma ri' kan konojel k'a rije' man xtibekitz'eta' ta ri ruwach'ulew ri', ri kan nuya'on nutzij chi ninya' chike ri ite-itata'. Kan man jun k'a chike ri xetzelan wichin, ri xtitz'eton ta ri ruwach'ulew ri'.

²⁴ Jak'a ri nusamajel Caleb kan xtinya' q'ij chire richin chi xtok chupan ri ruwach'ulew ri', ri rutz'eton chik rija'. Xtok k'a chiri' roma ri ránima kan man junan ta rik'in ri kánima ri ch'aqa' chik; xaxe rija' ri xniman ri nutzij y xirutzeqelibej. Y chuqa' ri e rijatzul rija' kan xkebek'oje' k'a chupan ri ruwach'ulew ri'.

²⁵ Naqaj chik k'a ek'o-wi-apo ri winaqi' amalecita y ri winaqi' cananeo, ri chiri' pa taq taq'aj; jak'a rix, chua'q k'a xkixtzolej chik ri pa tz'iran ruwach'ulew y choj xkixbe pa ruchojmilal ri Kaqa-Palou, xcha'.

Ri rutojbalil-mak ri xqaqa pa kiwi' ri winaqi'

²⁶ Ri Jehová xch'on rik'in ri Moisés y rik'in ri Aarón y xubij chike:

²⁷ ¿K'a jampe' k'a xketane' re itzel taq winaqi' re', ri e rijatzul kan ri Israel chi itzel yech'on chuwij? Yin xenwak'axaj toq rije' yech'ojin.

²⁸ Tibij chike ri winaqi' ri', chi yin qitzij ri ninbij chi achi'el ri nikibij, kan keri' ri xtinben kik'in.

²⁹ Kan chupan k'a ri tz'iran ruwach'ulew xkech'otot kan ri kich'akul konojel ri k'o juwineq kijuna' pa jotol, roma xa xech'ojin chuwe yin.

³⁰ Kan qitzij ninbij chiwe chi rix man xkixok ta chupan ri ruwach'ulew ri nusujun chiwe, ri akuchi yixbek'oje-wi; jak'a ri Caleb, ri ruk'ajol ri Jefuné y ri Josué, ri ruk'ajol ri Nun, kan xke'ok k'a chupan ri ruwach'ulew ri'.

³¹ Rix xibij chi ri iwalk'ual xke'uk'uex-el koma ri winaqi' ri e etzelanel iwichin. Jak'a yin man xtinya' ta q'ij chi keri' xtibanatej, roma ja yin xkiyuqen-el kichin, y xkenk'uaj chupan ri ruwach'ulew ri xiwixowaj rix.

³² Ri ich'akul rix xa xkepunupuxin kan chupan re tz'iran ruwach'ulew re'.

³³ Jak'a ri iwalk'ual kan xkek'ase' kan, y kawineq juna' k'a ri xkebiyin chupan ri tz'iran ruwach'ulew. Xkebe-kela' xkebe-kela' xtikiben achi'el nikiben ri yuq'unela'. Ja ri iwalk'ual ri xkeq'axan ri tijoj-poqonal, roma rix man xiben ta ri ibin chi niben; y keri' xtikiben k'a toq chi'iwonojel na rix xkixken kan ri pa tz'iran ruwach'ulew.

³⁴ Ri nachanela' kawineq q'ij ri xbekibana' richin xbekinik'oj ri ruwach'ulew. Y rix xtiq'axaj tijoj-poqonal roma ri imak y k'ari' xtiwetamaj achike rupoqonal ri xtiqaqa pan iwi', roma yin in yakatajineq chiwij. Re' k'o chi niq'axaj kawineq juna', jun juna' roma jun q'ij.

³⁵ Yin, Jehová, kan nubin wi k'a, chi kan keri' ri xtinben kik'in konojel ri winaqi' ri e banoy etzelal; rije' kan xeyakatej chuwij re wawe' chupan re tz'iran ruwach'ulew y roma ri' kan xkek'is y xkeken kan re wawe', xcha'.

Ri kikamik ri lajuj nachanela'

^36-37 Keri' chuqa' ri achi'a' ri xetaq roma ri Moisés richin chi xbeketamaj kan ri ruwach'ulew, ri xa man utz ta rutzijol ri xokiya' chirij ri ruwach'ulew ri' y rik'in ri' xkiben chike ri winaqi' chi xa xech'on itzel, ri Jehová kan xuya-pe jun nimalej yabil pa kiwi' ri achi'a' ri' y xeken.

³⁸ Y chike konojel ri xebenik'on kan ri ruwach'ulew, xaxe k'a ri Josué y ri Caleb ri man jun achike ta xkik'uluwachij.

Ri israelita xech'akatej-pe pan Hormá

³⁹ Y toq ri Moisés xutzijoj ronojel ri ch'abel chike ri winaqi' richin ri tinamit, rije' janila xq'axon ri kánima y janila xebison.

⁴⁰ Y pa ruka'n q'ij nimaq'a' yan xkibij: Jare' ojk'o, richin chi yojbe-el ri chiri' pa ruwach'ulew ri akuchi rubin-wi ri Jehová chi nuya' chiqe. Roj kan oj makuwineq-wi chuwech rija', xecha'. Y keri' xkichojmirisaj-ki' richin yebe-el chuwi' taq juyu' richin ri ruwach'ulew ri'.

⁴¹ Jak'a ri Moisés xa xubij chike: ¿Achike roma jun bey chik man ninimaj ta ri rupixa' ri Jehová? Roma wi xkixbe-el re wakami, ronojel man utz ta xtel chiwech.

⁴² Man kixbe-el ri pa ruwach'ulew ri', roma wi yixbe ri Jehová man nibe ta iwik'in, xa choj yixbech'akatej-pe, koma ri winaqi' ri aj chiri' ri e etzelanel iwichin.

⁴³ Roma ri amalecita y chuqa' ri cananeo xa kan xtikipaba-ki' chiwech, richin xtikiben oyowal iwik'in y xkixkikamisaj chi espada. Ri Jehová kan man xtibe ta iwik'in, roma rix xa man xiwajo' ta chik xitzeqelibej rija', xcha'.

⁴⁴ Man rik'in ri' ri israelita kan k'o kuchuq'a' xkina' y xebe-el chuwi' taq juyu', stape' ri Moisés y ri káxa richin ri rujikibel-tzij ri Jehová kan man xesilon ta el ri akuchi ek'o-wi-qa.

⁴⁵ Jak'a ri amalecita y ri cananeo xebeqaqa-pe chikij ri winaqi' israelita richin xekich'ek. Y e koqotan-pe k'a toq xe'oqaqa k'a chiri' pa tinamit Hormá.