Wuj Richin ri Q'axanri'il 13 - Kaqchiquel Bible

¹ Ri Jehová xch'on rik'in ri Moisés y xubij chire:

² Ke'ataqa-el achi'a' k'a pa ruwach'ulew Canaán, ri ruwach'ulew ri ninya' chike ri e rijatzul kan ri Israel. Tibekinik'oj k'a kan ri achike rubanik ri ruwach'ulew. Chikijujunal ri tzobaj tikiya' k'a jun chike ri aj-raqen pa ruwi' ri kitzobaj y jari' ri ke'ataqa-el.

³ Kan rutzij-wi k'a ri Jehová toq ri Moisés xeruteq-el ri achi'a'; xe'el k'a el ri achi'a' ri' toq ek'o ri chiri' pa tz'iran ruwach'ulew ri richin ri Parán. Konojel k'a ri achi'a' kan e aj-raqen k'a pa ruwi' ri kitzobaj, ri chikikojol ri e rijatzul kan ri Israel.

⁴ Jare' ri kibi' ri achi'a' nachanela': ri Samúa, ri ruk'ajol ri Zacur, richin ri tzobaj richin ri Rubén;

⁵ ri Savat, ri ruk'ajol ri Horí, richin ri tzobaj richin ri Simeón;

⁶ ri Caleb, ri ruk'ajol ri Jefuné, richin ri tzobaj richin ri Judá;

⁷ ri Igal, ri ruk'ajol ri José, richin ri tzobaj richin ri Isacar;

⁸ ri Oseas, ri ruk'ajol ri Nun, richin ri tzobaj richin ri Efraín;

⁹ ri Paltí, ri ruk'ajol ri Rafú, richin ri tzobaj richin ri Benjamín;

¹⁰ ri Gadiel, ri ruk'ajol ri Sodí, richin ri tzobaj richin ri Zabulón;

¹¹ ri Gadí, ruk'ajol ri Susí, richin ri tzobaj richin ri Manasés, ruk'ajol kan ri José;

¹² ri Amiel, ruk'ajol ri Guemalí, richin ri tzobaj richin ri Dan;

¹³ ri Setur, ri ruk'ajol ri Micael, richin ri tzobaj richin ri Aser;

¹⁴ ri Nahbí, ri ruk'ajol ri Vapsí, richin ri tzobaj richin ri Neftalí;

¹⁵ ri Gueuel, ri ruk'ajol ri Maquí, richin ri tzobaj richin ri Gad.

¹⁶ Jare' ri bi'aj kichin ri achi'a' ri xeruteq-el ri Moisés, richin nibekinachaj ri ruwach'ulew; y ri Oseas, ri ruk'ajol ri Nun, xya'ox chik jun rubi' roma ri Moisés y xubini'aj Josué.

¹⁷ Y ri Moisés xeruteq k'a el ri achi'a' richin nibekinik'oj jebel ri ruwach'ulew y xubij-el chike: Kixbiyin-q'anej chunik'oxik ri ruwach'ulew Canaán. Tinik'oj kan jebel ri pa xokon chire ri ruwach'ulew ri' y k'ari' kixjote-el chuwi' taq juyu'.

¹⁸ Tinik'oj kan jebel ri ruwach'ulew ri achike rubanon y titzu' kan jebel ri achike kibanik ri winaqi' ri ek'o chiri', wi kan k'o kuchuq'a' o xa maneq, wi e k'iy o xa man e k'iy ta.

¹⁹ Titz'eta' kan chi utzil ri akuchi ek'o-wi, wi utz o xa man utz ta. Chuqa' titzu' kan jebel ri achike kibanik ri nima'q taq tinamit, wi sutin-kij chi tz'aq, o xa maneq.

²⁰ Chuqa' kan titzu' kan chi utzil ri qasanbel-ulew, wi e utz o xa yalan chaqi'j, wi ek'o che' chuwech o xa man jun. Man tixibij-iwi' richin nik'en-pe kiwech ri che' ri richin ri ruwach'ulew ri', xcha-el chike. Y chupan ri q'ij ri' jari' toq ri uva nuchop nuya' ruwech.

²¹ Y rije' jari' toq xebe-el y xbekinik'oj k'a ri ruwach'ulew. Xkichop k'a el ri chiri' pa tz'iran ruwach'ulew rubini'an Sin ri k'o pa xokon y xe'apon k'a pa tinamit Rehob, chunaqaj ri tinamit Hamat.

²² Rije' xe'ok k'a el ri chiri' pa xokon chire ri ruwach'ulew Canaán y pa jun tinamit rubini'an Hebrón, chiri' xe'apon-wi nabey. Y ja ri chiri' ek'o-wi oxi' achi'a' ri e rijatzul kan ri Anac. Y ri achi'a' ri' kibini'an Ahimán, Sesai y Talmai. Ri tinamit Hebrón wuqu' juna' nabey xban-q'anej chuwech ri tinamit Soan ri k'o pan Egipto.

²³ Y toq rije' xe'apon-el pa jun taq'aj kojol juyu', ja ri chiri' toq xkitzak'ij-pe jun nima-tzeqaj uva y e ka'i' k'a achi'a' ri xek'amon-pe chuwi-kitele'n, rik'in jun ruq'a-che', y chuqa' xekik'en-pe ruwech ri granada y ruwech ri wíkix.

²⁴ Y keri' ri taq'aj, ri chiri' kojol taq juyu' xubini'aj k'a kan Escol, roma ri tzeqaj uva ri xkitzak'ij-pe ri israelita.

Ri nachanela' xokibij ri achike ri xkitz'et kan pa Canaán

²⁵ Y toq q'axineq chik k'a kawineq q'ij, k'ari' xetzolej-pe.

²⁶ Y xe'apon k'a rik'in ri Moisés, ri Aarón y ri ch'aqa' chik kiwinaq, ri chiri' pa tz'iran ruwach'ulew Parán, ri chiri' pa tinamit Cadés. Y xkitzijoj k'a ronojel chike y xkik'ut chikiwech ri ruwech ri tiko'n ri nuya' ri chiri'.

²⁷ Y jari' toq xkichop rucholik chire ri Moisés: Roj xojapon pa ruwach'ulew ri akuchi xojateq-wi-el. Kan qitzij wi chi kan jebel ri ruwach'ulew y kan janila jebel niwachin ri tiko'n. Ja ruwech che' re' ri nuya' ri tiko'n chiri'.

²⁸ Jak'a ri winaqi' ri e chapayon ri ruwach'ulew ri', janila kuchuq'a'; y ri tinamit janila e nima'q y e tz'apen-kij chi tz'aq; y ri chiri' xeqatz'et chuqa' kan ri e rijatzul kan ri Anac, ri janila nima'q kipalen.

²⁹ Y ri keri' pa xokon chire ri Canaán, chiri' ek'o-wi ri amalecita; y ri chuwi' taq juyu', chiri' ek'o-wi ri winaqi' hitita, ri jebuseo y ri amorreo; y chunaqaj ri palou, chiri' ek'o-wi ri winaqi' cananeo y rije' chuqa' kiq'atapun ronojel ri ruwach'ulew k'a chuchi' ri raqen-ya' Jordán, xecha'.

³⁰ Y roma xewolol-q'anej ri winaqi' ri ek'o-apo chuwech ri Moisés, roma ri' ri Caleb xuben chike chi ketane-qa chi ch'owen, y xubij chike: Roj kan qitzij chi kan yojtikir chikij. Qojjote-el y tiqamaja' ri ruwach'ulew chikiwech, xcha'.

³¹ Jak'a ri achi'a' ri xebe junan rik'in ri Caleb chunik'oxik ri Canaán, xa xkibij: ¡Ni, man yojtikir ta yojbe-el y nibeqabana' oyowal kik'in ri winaqi' ri', rije' más kuchuq'a' chiqawech roj!, xecha'.

³² Y rije' kan xkitaluj k'a rutzijol chikikojol ri winaqi' chirij ri xbekitz'eta' kan ri pa ruwach'ulew y xkibila' k'a chike: Ri ruwach'ulew ri xbeqanik'oj kan roj, jun ruwach'ulew ri akuchi xa kan xaxe qakamik xtibeqila'; y konojel ri winaqi' ri xeqatz'et kan chiri' kan janila nima'q kipalen.

³³ Y chiri' chuqa' xeqatz'et kan ri achi'a' ri e rijatzul kan ri Anac, ri achi'a' ri más nima'q kipalen chikiwech ri ch'aqa' chik. Y roj roma kan taq oj kokoj ok, xqana-qa-qi' chi oj achi'el ok taq sak' y achi'el xa kan keri' ri xojkitz'et rije', xecha'.