San Mateo 20 - Kaqchiquel Bible

K'ambel-tzij pa kiwi' ri samajela' ri junan kajel xkik'ul

¹ Ri Jesús xubij re k'ambel-tzij re': Ri aj-chikajil ajawaren xa kan nijunamex rik'in jun achin rajaw jun ulew, ri xel-el nimaq'a' chikikanoxik samajela' richin yeruteq pa rulew ri rutikon uva chuwech.

² Rija' xeril k'a ri rusamajela', y xubij chike chi yerutoj achi'el ri k'o chi nikich'ek jun q'ij;*f28* k'ari' k'a xeruteq pa rusamaj.

³ Jak'a ri pa beleje' hora chire ri nimaq'a' ri', rija' xel chik el jun bey y xerutz'et k'a ri chiri' pa k'ayibel chi ek'o samajela' ri man jani kilon ta kisamaj.

⁴ Rija' xapon kik'in y xubij chike chi kebesamej chuqa' rije' pa rulew ri rutikon uva chuwech, y rija' xtuya' k'a chike ri ruk'amon chi nikich'ek. Y ri samajela' ri' kan xebe k'a.

⁵ Ri rajaw ri ulew ri', kan keri' chuqa' ri xubanala' kik'in ri ch'aqa' chik samajela' ri xeril toq xel-el pa nik'aj-q'ij y ri pa rox hora chire ri tiqaq'ij.

⁶ Y ri pa ro' hora chire ri tiqaq'ij, rija' xel chik el jun bey, y xeberila' k'a pe ch'aqa' chik samajela'. Y xubij chike: ¿Achike k'a roma ixk'o wawe' jun q'ij y man jun niben?, xcha' chike.

⁷ Y ri samajela' ri' xkibij chi man jun xya'on kisamaj. Jari' toq ri rajaw ri ulew xubij k'a chuqa' chike rije' chi kebe pa rusamaj, y xkerutoj ri ruk'amon.

⁸ Jak'a toq xqaqa-qa ri q'ij, ri rajaw ri ulew xubij k'a chire ri k'o pa kiwi' ri samajela': Ke'awoyoj-pe konojel ri samajela' y ke'atojo-el. Nabey ye'atoj-el ri xe'oqaqa pa ruk'isibel y xkeruk'isibej kan ri xe'oqaqa pa nabey, xcha'.

⁹ K'ari' ri samajela' ri xe'ok pa samaj ri pa ro' hora chire ri tiqaq'ij, xbekik'ulu-pe rajel jun kiq'ij.

¹⁰ Y toq xe'apon k'a ri samajela' ri xe'ok pa samaj nabey, xkich'ob chi rije' más k'iy kajel xtikik'ul, jak'a toq xkik'ul ri kajel, xkitz'et chi xaxe rajel jun kiq'ij ri xya'ox chike.

¹¹ Roma ri' xkichop k'a yech'ojin rik'in ri rajaw ri ulew,

¹² y xkibij chire: Ri ruk'isibel taq samajela' ri xe'ok pa samaj, ri xa jun hora ok xesamej, kan junan xaben chike qik'in roj, toq roj jun q'ij xojsamej y xojk'at chuwa-q'ij, xecha'.

¹³ Ri rajaw ri samaj xubij k'a chire jun chike ri samajela' ri': Rik'in ri junan xentoj ri ch'aqa' chik samajela' man jun itzel xinben chawe rat. Roma awik'in rat xa kan oj kanajineq kan chi ja ri nach'ek jun q'ij ri ninya' chawe.

¹⁴ Wakami rat xaxe k'a tak'uaj la awajel y utz yabe. Y jak'a chike ri samajela' ri k'a pa ruk'isibel xe'ok pa samaj, kan pa wánima k'a yin xpe-wi toq xinya-el ri kajel achi'el ri awajel rat.

¹⁵ Roma ronojel ri k'o wik'in yin, kan pa nuq'a' k'a yin k'o-wi richin ninben achike ri ninwajo' ninben rik'in. Rat xa itzel nana' chike rije' toq yin xa ja ri utz ninben, xcha'.

¹⁶ Wakami e k'iy k'a ri janila kiq'ij, jak'a xa kan xtapon ri q'ij toq xa maneq chik kiq'ij xtiban chike. Chuqa' e k'iy ri xa maneq ok kiq'ij, y kan xtapon ri q'ij toq ja rije' ri xtiya'ox kiq'ij. Roma kan e k'iy ri xe'oyox, jak'a xa e juba' ok ri xkecha'ox kan, xcha'.

Ri Jesús xunataj chik jun bey ri rukamik

¹⁷ Toq ri Jesús ruchapon-el bey richin nibe-q'anej pa Jerusalem, jari' toq xeruch'er-el e kablajuj rutijoxela' y xubij chike:

¹⁸ Rix iwetaman chi pa Jerusalem qachapon-wi-el bey, y ja ri chiri' ri xkijach-wi-el yin, ri xiqaqa-pe achi'el wineq chi'ikojol. Xkijach-el pa kiq'a' ri aj-raqen kichin ri sacerdote y pa kiq'a' ri etamanela' chirij ri pixa'. Rije' xtikibij k'a chi tiqaqa ri kamik pa nuwi'.

¹⁹ Y chuqa' xkinkijech-el pa kiq'a' winaqi' ri xa man e judío ta richin xkinkitze'ej, xkinkich'ey y k'ari' xkinkibajij chuwech jun cruz richin yiken. Jak'a pa rox q'ij xkik'astej-pe, xcha'.

Ri kite' ri Jacobo y ri Juan xuk'utuj utzil chire ri Jesús

²⁰ K'o k'a jun ixoq kite' ri e ka'i' tijoxela' ri e ruk'ajol ri Zebedeo; e rachibilan chi ka'i' ral xejel-apo rik'in ri Jesús, y xxuke' k'a qa chuwech richin chi nuk'utuj jun utzil chire.

²¹ Ri Jesús xubij k'a chire ri te'ej ri' chi achike nubij ri ránima. Y ri ixoq xubij k'a chire ri Jesús: Yin ninwajo' k'a chi ri chila' pan ajawaren tabana' chi re ka'i' wal re' xketz'uye' ta apo awik'in; jun ta k'a ri pan awijkiq'a' y ri jun ta pan awajxokon, xcha' ri ixoq.

²² Jari' k'a toq ri Jesús xubij chike ri ka'i' alk'ualaxela' ri': Rix man iwetaman ta k'a ri nik'utuj. Roma ¿nikoch' kami chuqa' jun tijoj-poqonal achi'el ri xtiqaqa pa nuwi' yin?, xcha'. Y rije' xkibij chi ja', yetikir nikikoch'.

²³ Ri Jesús xubij chik k'a chike: Kan qitzij wi k'a chi rix xtikoch' na wi achi'el ri xtiban chuwe yin; jak'a ri nibij, chi rix niwajo' chi jun nitz'uye' pa wijkiq'a' y jun ri pa wajxokon, ri' man pa nuq'a' ta k'a yin k'o-wi richin chi ninya' chiwe. Roma ri nik'utuj rix, ri' xa pa ruq'a' chik ri nata' k'o-wi, xcha' ri Jesús.

²⁴ Jak'a toq ri lajuj chik tijoxela' xkak'axaj ri xbitej, xpe k'a koyowal chike ri e ka'i' tijoxela' ri kach'alal-ki'.

²⁵ K'ari' ri Jesús xeroyoj k'a konojel y xubij chike: Rix jebel iwetaman chi re chuwech re ruwach'ulew ri q'atoy taq tzij kan ek'o-wi pa kiwi' ri winaqi'; roma ri' kan nikina' chi ja rije' k'o kiq'ij y nikiben ri nikajo'.

²⁶ Jak'a ri chi'ikojol rix man keri' ta. Roma ri nrajo' k'a nik'oje' ruq'ij, k'o chi nuqasaj-ri' chubanik xabachike samaj.

²⁷ Wi k'o k'a chiwe rix kan nrajo' chi ja rija' ri nabey y k'o ta ruq'ij, kan tuqasaj k'a ri' richin nok jun ilinel.

²⁸ Yin, ri xiqaqa-pe achi'el wineq chi'ikojol, man ninpoqonaj ta yisamej koma ri ch'aqa' chik, roma xa kan richin ri' toq xipe. Jak'a yin ri yiya'on ri nuk'aslen richin keri' e k'iy ri yekolotej, xcha' ri Jesús.

Ri Jesús xeruk'achojirisaj ka'i' moyi'

²⁹ K'o k'a jun q'ij toq ri Jesús y ri rutijoxela' xe'el-pe pa tinamit Jericó; kan janila k'a chi winaqi' ri xetzeqeliben-pe kichin.

³⁰ Ek'o k'a e ka'i' moyi' e tz'uyul chuchi' bey toq xkak'axaj chi ri Jesús niq'ax-el keri'. Y rije' rik'in kuchuq'a' yech'on y nikibij: Qajaw, ri at riy-rumam kan ri rey David, tajoyowaj qawech, yecha'.

³¹ Jak'a ri winaqi' xekich'olij k'a richin man chik kech'on. Jak'a rije' xa rik'in más kuchuq'a' yech'on y nikibij: Qajaw, ri at riy-rumam kan ri rey David, tajoyowaj qawech, yecha'.

³² Jari' toq ri Jesús xpa'e-qa y xeroyoj. Y xubij chike: ¿Achike k'a niwajo' richin ninben iwik'in?, xcha' chike.

³³ Rije' xkibij: Qajaw, roj niqajo' k'a yojtzu'un, xecha'.

³⁴ Roma ri' ri Jesús xujoyowaj kiwech ri ka'i' achi'a' moyi' ri'. Jari' toq xuchop ri runaq'-kiwech, y xetzu'un. Y rije' xetzeqe-el chuqa' chirij ri Jesús.